මාතර ස්වර්ණාභරණ වෙළෙඳසලක් කොල්ලකෑමට සැලසුම් කළ පාතාල නායක තාරකගේ මව වන ජානකී ප්‍රියන්ති සොයිසා නැමැත්තිය භාවිත කරන ජංගම දුරකථනයක් පිළිබඳ අ...
මාතර ස්වර්ණාභරණ වෙළෙඳසලක් කොල්ලකෑමට සැලසුම් කළ පාතාල නායක තාරකගේ මව වන ජානකී ප්‍රියන්ති සොයිසා නැමැත්තිය භාවිත කරන ජංගම දුරකථනයක් පිළිබඳ අලුත්ම තොරතුරක් අනාවරණය වී තිබේ.
එම දුරකතනය ඇයට ලබා දී ඇත්තේ දකුණේ දේශපාලනඥයකුගේ පදනමක් විසින් බවට තොරතුරු ලැබී ඇතැයි පොලිස් ආරංචි මාර්ග පවසයි.
පසුගිය පළාත් පාලන මැතිවරණයේ අපේක්ෂිකාවක් ලෙසද ඇය ඉදිරිපත් වූ අතර එකල ඇයගේ භාවිතයට මෙම ජංගම දුරකථනය ලබාදී ඇතැයි වාර්තා වේ.
මාතර කොල්ලයට අපරාධකරුවන් යොදා ගත් එක් යතුරුපැදියක ලියාපදිංචි හිමිකරු වූයේද තාරකගේ මවයි. ඉකුත් 22 වැනිදා කොස්ගොඩ පොලීසිය මඟින් ඇයව අත්අඩංගුවට ගෙන රක්ෂිත බන්ධනාගාර ගත කර තිබේ.
ඇය අත්අඩංගුවට ගන්නා අවස්ථාවේදී කොස්ගොඩ නානතොට ප්‍රදේශයේ පිහිටි ඇයගේ නිවෙසේ සඟවා තිබී මෙරට නිෂ්පාදිත මිලිමීටර් 9 පතරොම් භාවිත කරන ගල්කටස් වර්ගයේ ගිනි අවියක්ද පොලිසිය විසින් සොයා ගෙන තිබිණි. එසේම ඇය සතුව තිබූ ඇපල් වර්ගයේ ජංගම දුරකථනයක් සහ තවත් ජංගම දුරකථනයක් පොලිස් භාරයට ගැනුණි.
තාරක විසින් කරන ලද අපරාධවලදී මෙම ජංගම දුරකථන භාවිත කළේද යන්න ගැන විමර්ශනය කරන බවද එම ආරංචි මාර්ග සඳහන් කළේය.
එසේම තාරකගේ මව පළාත් පාලන මැතිවරණයට දින දෙකකට පෙරද කොස්ගොඩ පොලිසියේ නිලධාරීන් විසින් අත්අඩංගුවට ගනු ලැබීය.
අපරාධයක් සම්බන්ධයෙන් බළපිටිය මහෙස්ත්‍රාත් අධිකරණයේ විභාග වන නඩුවකට තාරක වෙනුවෙන් ඇප වී තිබුණේ ඔහුගේ මවය.
එහෙත් තාරක අධිකරණය මඟ හැරීම නිසා ඔහුගේ මව මෙලෙස අත්අඩංගුවට ගෙන තිබිණි. එදිනද කොස්ගොඩ පොලිසියේ නිලධාරීන් ඇයගේ නිවෙස පරීක්ෂා කරන අවස්ථාවේදී දකුණේ දේශපාලනඥයාගේ පදනමෙන් ඇයට ලබාදී තිබූ පක්ෂයේ හැඳුනුම්පතක්ද පොලිසිය විසින් නිරීක්ෂණය කර තිබිණි.
COMMENTS