සිය වාර්ෂික වත්කම් සහ බැරකම් ප්‍රකාශ හෙළි නොකිරීම සම්බන්ධයෙන් හිටපු අමාත්‍ය සහ ඒකාබද්ධ විපක්ෂයේ පාර්ලිමේන්තු මන්ත්‍රී ජොන්ස්ටන් ප්‍රනාන්දු...
සිය වාර්ෂික වත්කම් සහ බැරකම් ප්‍රකාශ හෙළි නොකිරීම සම්බන්ධයෙන් හිටපු අමාත්‍ය සහ ඒකාබද්ධ විපක්ෂයේ පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතාට එරෙහිව ගොනු කර තිබෙන නඩු 5 ක් විභාග කිරීම ජුලි මස 23 වනදා සිදු කරන බව කොළඹ ප්‍රධාන මහේස්ත්‍රාත් අධිකරණය නියම කළේය.
ජොන්ස්ටන් ප්‍රනාන්දු මහතාට එරෙහිව ගොනු කර තිබෙන නඩු පහක් අද (04) කොළඹ ප්‍රධාන මහේස්ත්‍රාත් ලාල් රණසිංහ බණ්ඩාර මහතා ඉදිරියේ කැදවනු ලැබීය.
එහිදී අල්ලස් කොමිසමේ නිලධාරීන් අධිකරණයට දන්වා සිටියේ එම නඩුවේ සාක්ෂි කරුවකු ලෙස කැඳවීමට නියමිත හිටපු ජනාධිපති ලේකම් පී.බී.අබේකෝන් මහතා ඉදිරියේදී කැඳවීමට පියවර ගන්නා බවයි.
ඒ අනුව නඩු විභාගය ජුලි මස 23 වනදා පැවැත්වීමට නියම කළ කොළඹ ප්‍රධාන මහේස්ත්‍රාත් ලාල් රණසිංහ බණ්ඩාර මහතා එදිනට සාක්ෂිකරුවන්ට අධිකරණය හමුවේ පෙනී සිටින්නැයි අවවාද කළේය.
2010 වසරේ සිට 2014 වසර දක්වා කාලසීමාව තුළ අමාත්‍යවරයෙකු ලෙස කටයුතු කරමින් සිය වාර්ෂික වත්කම් සහ බැරකම් ප්‍රකාශ ඉදිරිපත් නොකිරීම තුළින් අල්ලස් පනත යටතේ වරදක් සිදුකර ඇතැයි චෝදනා කරමින් ජොන්ස්ටන් ප්‍රනාන්දු මහතාට එරෙහිව අල්ලස් කොමිසම මෙම නඩු පහ ඉදිරිපත් කර තිබේ.
COMMENTS