අගමැතිවරයා විශ්වාසභංග යෝජනාවෙන් ජයග්‍රහණය කළත් නැතත්, ඉන්පසුව ද්‍රවිඩ ජාතික සන්ධානයේ නායක ආර්. සම්බන්ධන් මහතාට විපක්ෂ නායක ධුරය අහිමිවීමේ...
අගමැතිවරයා විශ්වාසභංග යෝජනාවෙන් ජයග්‍රහණය කළත් නැතත්, ඉන්පසුව ද්‍රවිඩ ජාතික සන්ධානයේ නායක ආර්. සම්බන්ධන් මහතාට විපක්ෂ නායක ධුරය අහිමිවීමේ අවදානමක්‌ මතුව ඇතැයි දේශපාලන ආරංචි මාර්ග පවසයි.
ඒකාබද්ධ විපක්ෂය ඉදිරිපත්කර ඇති විශ්වාසභංග යෝජනාවට පක්ෂව සම්බන්ධන් මහතා ඇතුළු දෙමළ ජාතික සන්ධානය ඡන්දය ලබාදී එය ජයග්‍රහණය කළහොත් ආණ්ඩු පෙරළියක් සිදුවන බැවින් එවිට විපක්ෂ නායක ධුරය සම්බන්ධන් මහතාගෙන් ගිලිහී යනු ඇත.
ඒකාබද්ධ විපක්‍ෂයේ මන්ත්‍රීවරයෙකු සඳහන් කළේ ඒ අනුව අනිද්දා (04) රාත්‍රි 9.30 ට පාර්ලිමේන්තුවේදී විශ්වාසභංග යෝජනාවට අදාළ ඡන්ද විමසීමෙන් අනතුරුව පසුදා ආර්. සම්බන්ධන් මහතා විපක්ෂ නායක ධුරයේ කටයුතු කිරීම අභියෝගයට ලක්‌ කරන බවයි.
අගමැති රනිල් වික්‍රමසිංහ මහතා මෙම විශ්වාසභංග යෝජනාවෙන් ජයග්‍රහණය කළොත් ආණ්‌ඩුවේ සිටින ශ්‍රීලනිප කණ්‌ඩායම ජාතික ආණ්‌ඩුවෙන් ඉවත්ව විපක්‍ෂයට පැමිණෙන බවට මේ වනවිටත් ප්‍රකාශ කර ඇති බවත් ඒ අනුව විපක්ෂ නායක ධුරය හිමිවන්නේ එජනිසයට බවත් එම මන්ත්‍රීවරයා පෙන්වා දුන්නේය.
විශ්වාසභංග යෝජනාව ජයග්‍රහණය කර රනිල් වික්‍රමසිංහ මහතාට අගමැති ධුරය අහිමි වූවොත් නව කැබිනට්‌ මණ්‌ඩලයක්‌ යටතේ නව ආණ්‌ඩුවක්‌ පිහිටුවනු ලබන බවද එහිදීද සම්බන්ධන් මහතාගේ විපක්ෂ නායක ධුරය අවදානම් තත්ත්වයකට පත්වනු ඇතැයිද වාර්තා වේ.
යම් හෙයකින් සම්බන්ධන් මහතා ඇතුළු ද්‍රවිඩ ජාතික සන්ධානය රනිල් වික්‍රමසිංහ මහතාට පක්ෂව ඡන්දය ලබාදී තිබුණොත් තවදුරටත් ඔහුට විපක්ෂ නායක ධුරයේ සිටීමට සදාචාරාත්මක අයිතියක්‌ නැතැයිද මන්ත්‍රීවරයා ප්‍රකාශ කළේය.
මේ නිසා මෙම විශ්වාසභංග යෝජනාවෙන් රනිල් වික්‍රමසිංහ මහතා මෙන්ම ආර්. සම්බන්ධන් මහතාද අපහසුතාවකට පත්ව ඇතැයිද වාර්තා වේ.
ඒ අනුව ආර්. සම්බන්ධන් මහතාගේ විපක්ෂ නායක ධුරය අභියෝගයට ලක්ව ඇති බව පාර්ලිමේන්තු මන්ත්‍රීවරුන් අතරද සාකච්ඡා වෙමින් පවතී.
මෙහිදී යෝජානා වී ඇති ප්‍රධාන කාරණය වන්නේ තම පක්ෂයේ ස්වාධීනත්වය පෙන්වමින් විශ්වාසභංගයට පක්ෂව හෝ විපක්ෂව ඡන්ද පාවිච්චි නොකර සිටීම වඩාත් යෝග්‍ය කාර්යය වනු ඇති බවයි.
COMMENTS