ජාතික ආණ්ඩුව නියෝජනය කරන අමාත්‍යවරුන් වන සුසිල් ප්‍රේමජයන්ත, නිමල් සිරිපාල ද සිල්වා, අනුර ප්‍රියදර්ශන යාපා ඇතුළු පිරිසක් අද සවස ආණ්ඩුවෙන් ...
ජාතික ආණ්ඩුව නියෝජනය කරන අමාත්‍යවරුන් වන සුසිල් ප්‍රේමජයන්ත, නිමල් සිරිපාල ද සිල්වා, අනුර ප්‍රියදර්ශන යාපා ඇතුළු පිරිසක් අද සවස ආණ්ඩුවෙන් ඉවත් වෙන බව එක්සත් ජනතා නිදහස් සන්ධාන පාර්ලිමේන්තු මන්ත්‍රී වෛද්‍ය රමේෂ් පතිරණ මහතා පවසයි.
ඔහු මේ බව පැවසුවේ අද (04) පාර්ලිමේන්තුවේ පැවැත්වෙන අගමැති රනිල් වික්‍රමසිංහ මහතාට එරෙහිව විශ්වාසභංග යෝජනාව පිළිබඳ විවාදයට එක්වෙමිනි.
ඉන් අනතුරුව යහපාලන ආණ්ඩුව අවසන් බවද පෙන්වා දුන් මන්ත්‍රීවරයා පසුගිය මැතිවරණයේ අග්‍රාමාත්‍යවරයාට හිමිවූයේ ලක්ෂ 30ක් බවත් ශ්‍රී ලංකාවේ ජාතීන් අතර ගැටුම් ඇති කිරීමේ ඉතිහාසයක් එක්සත් ජාතික පක්ෂයට තිබෙන බවත් කියා සිටියේය.
"මෛත්‍රීපාල සිරිසේන මහතා අපේ ආණ්ඩුව පාවාදීලා බලයට ආවට පස්සේ රටේ සම්පත් විකුණන්න කටයුතු කරනවා. ශ්‍රී ලංකා නිදහස් පක්ෂය අද හවසට අපිත් එක්ක එකතු වුණාම ජාතික ආණ්ඩුවක් නෑ. අවවාදයට වඩා ආදර්ශය උතුම් යන කියමනක් තිබෙනවා. අගමැතිතුමා ඉල්ලා අස්වෙන්න." යනුවෙන් මන්ත්‍රීවරයා වැඩිදුරටත් පැවසී ය.
මේ අතර විශ්වාසභංග යෝජනාව සම්බන්ධයෙන් පාර්ලිමේන්තුවේ පැවැත් වෙන විවාදයට එක්වෙමින් පාර්ලිමේන්තු මන්ත්‍රී මහින්දානන්ද අලුත්ගමගේ මහතා සඳහන් කළේ අද දිනයේ දී අග්‍රාමාත්‍ය රනිල් වික්‍රමසිංහ මහතාට එරෙහි විශ්වාසභංග යෝජනාවට හිමිවන ප්‍රතිඵලයෙන් පසුව එක්සත් ජාතික පක්ෂය දෙකඩ වීම කිසිවෙකුටත් නැවැත්විය නොහැකි බවයි.
මොන තරම් කොන්දේසි පැමිණියද හෘද සාක්ෂියට එකඟය විශ්වාසභංග යෝජනාවට පක්ෂව ඡන්දය ලබා දෙන ලෙස ද මන්ත්‍රීවරයා මෙහිදී ඉල්ලීමක් කරමින් සභාවෙන් ඉල්ලා සිටියේය.
මෙරට ආර්ථිකය හැසිර වු ප්‍රධාන පුද්ගලයා අගමැතිවරයා බවත්, ඔහු එයින් අසාර්ථකත්වයට පත්වු බවත් අලුත්ගමගේ මහතා මෙහිදී වැඩිදුරටත් සඳහන් කළේය.
ආර්ථික කමිටුව හරහා සියලු සොරකම් සිදු කරනු ලැබූ බවත්, ආර්ථික කමිටුව අහෝසි කරන විට එයට සම්බන්ධ වු සියලු දෙනා දුක්වන බව ද මන්ත්‍රීවරයා මෙහිදි කියා සිටියේය.
මේ අතර අද දිනයේ දී විශ්වාසභංග යෝජනාව පරාජය වීමෙන් අනතුරුව පාර්ලිමේන්තුවෙන් එළියේ එක්සත් ජාතික පක්ෂයේ පිරිසක් කුණු බිත්තර ප්‍රහාරයක් එල්ල කිරීමේ සුදානමින් සිටින බව ද මන්ත්‍රීවරයා වැඩිදුරටත් පැවසී ය.
COMMENTS