අගමැතිවරයාට එරෙහි විශ්වාසභංගයට ඡන්දය ලබාදීම සම්බන්ධයෙන් ශ්‍රී ලංකා නිදහස් පක්ෂය තුළ මේවන විට මත දෙකක් පවතින බව මේ වනවිට වාර්තා වේ. අගමැති...
අගමැතිවරයාට එරෙහි විශ්වාසභංගයට ඡන්දය ලබාදීම සම්බන්ධයෙන් ශ්‍රී ලංකා නිදහස් පක්ෂය තුළ මේවන විට මත දෙකක් පවතින බව මේ වනවිට වාර්තා වේ.
අගමැතිවරයාට එරෙහි විශ්වාසභංග යෝජනාවට පක්ෂව ඡන්දය ලබා දෙන බව අමාත්‍ය දයාසිරි ජයසේකර මහතා පවසයි.
ඔහු මේ බව පැවසුවේ අද (04) පාර්ලිමේන්තුවේ පැවැත්වෙන අගමැති රනිල් වික්‍රමසිංහ මහතාට එරෙහිව විශ්වාසභංග යෝජනාව පිළිබඳ විවාදයට එක්වෙමිනි.
හෙට දිනයේදී ගෙදර ගියත් විශ්වාසභංග පක්ෂව ඡන්දය ප්‍රකාශ කරන බවත් තම ඡන්දය මුදල්වලට පාවා නොදෙන බවත් අමාත්‍යවරයා ප්‍රකාශ කළේය.
“විශ්වාසභංගයට පක්ෂව ඡන්දය දෙන්න දෙවැනිදා රාත්‍රී අපි තීන්දු කළා. සමහරු අද පාර්ලිමේන්තු එන්නේ නැතිවෙන්න තීරණය කරලා තියෙනවා. කොන්දක් තියන මන්ත්‍රීවරුන් විදියට අපිට එහෙම කරන්න බෑ. ඡන්දය නොදී හැංගෙන්න සිටිනවා නම් ඒ අයට ජනතාවට මුහුණ දෙන්නට වෙනවා. අපි එජාපයට ගිහිනුත් නෑ. පොදුජන පෙරමුණට ගිහිනුත් නෑ. අපි තවම ශ්‍රීලනිපයේ.“
විශ්වාසභංග යෝජනාවේ සඳහන් කරුණුවලට හෘද සාක්ෂියට අනුව එකඟ වෙන්න සිදුවෙනවා. ජනතාවටත් ඇඟිල්ල දිගු කරනවා. ජනපතිවරණයේදී ලක්ෂ 62ක් ජනපතිට ඡන්දය දීලා පාර්ලිමේන්තු මැතිවරණයේදී එක්සත් ජාතික පක්ෂයට ආසන 106ක් හා එක්සත් ජනතා නිදහස් සන්ධානයට ආසන 95ක් ලබාදෙමින් සභාග ආණ්ඩුවක් පිහිටුවීමට අවස්ථාව දුන්නා.
අපි පක්ෂව ඡන්දය දෙනවා. ජනපති අපිට යන්න කිව්වොත් අපි යනවා. එක්සත් ජාතික පක්ෂයට මුක්කු ගහන්න අපි අවේ නෑ. දේශපාලන මතවාද තිබුණත් අගමැති සමග පෞද්ගලික ගැටුමක් නෑ. එක්සත් ජාතික පක්ෂයට අවශ්‍ය ලෙස අපි කටයුතු කරන්නේ නෑ.“යැයිද දයාසිරි ජයසේකර මහතා පැවසී ය.
මේ අතර අගමැතිවරයාට එරෙහි විශ්වාසභංග යෝජනාවේදී අමාත්‍ය එස්.බි දිසානායක මහතා පක්ෂව ඡන්දය දෙන බව ප්‍රකාශ කළේය.
ඒ අද(04) අමාත්‍යවරයා පාර්ලිමේන්තු සංකීර්ණයට පැමිණෙන අවස්ථාවේදී මාධ්‍යවේදීන් නැගු ප්‍රශ්නයකට පිළිතුරු දෙමිනි.
තවද ශ්‍රී ලංකා නිදහස් පක්ෂයේ බහුතරයක් විශ්වාසභංගට පක්ෂව ඡන්දය දෙන බවද අමාත්‍යවරයා පැවසී ය.
අද උදෑසන ශ්‍රී ලංකා නිදහස් පක්ෂයේ මන්ත්‍රී කණ්ඩායම රැස්වූ අතර, එම රැස්වීමෙන් අනතුරුව රාජ්‍ය අමාත්‍ය ඒ.එච්.එම්. ෆවුසි මහතා පැවසූවේ විශ්වාසභංග ඡන්ද විමසීමේදී නිදහස් පක්ෂය ඡන්දය දීමෙන් වැළකී සිටීමට තීරණය කළ බවයි.
එක්සත් ජනතා නිදහස් සන්ධාන මහ ලේකම් අමාත්‍ය මහින්ද අමරවීර මහතාගේ නිවසේ පැවති එම සාකච්ඡාවේදී මෙම තීරණය ගත් බවද අමාත්‍යවරයා පැවසී ය.
කෙසේ වෙතත් රාජ්‍ය අමාත්‍ය ලක්ෂ්මන් යාපා අබේවර්ධන මහතා එම සාකච්ඡාවෙන් අනතුරුව මාධ්‍ය වෙත අදහස් දක්වමින් කියා සිටියේ රාජ්‍ය අමාත්‍ය එච්.එම්. ෆවුසි විසින් සිදුකළ ප්‍රකාශය අසත්‍යය බවයි.
අදාළ රැස්වීමේදී නිදහස් පක්ෂ මන්ත්‍රී කණ්ඩායම තීරණය කරනු ලැබුවේ විශ්වාසභංගයට පක්ෂව ඡන්දය ලබාදීමට බව අමාත්‍යවරයා පැවසී ය.
රතන හිමිගේ තීරණය වෙනස් වෙයි
කෙසේ වෙතත් මීට පෙර අගමැතිවරයාට එරෙහි විශ්වාසභංගයට පක්ෂව ඡන්දය ලබා දෙන බවට පැවසූ අතුරලියේ රතන හිමියෝ අද(04) පස්වරුවේදී පාර්ලිමේන්තුවේදී මාධ්‍ය හමුවකට එක්වෙමින් සඳහන් කළේ විශ්වාස භංගය යෝජනාව ගැන ඡන්ද විමසීමේදී තමන් වහන්සේ ඡන්දය දීමෙන් වැළකී සිටින බවයි.
එහිදී රතන හිමියෝ වැඩිදුරටත් මෙසේ පැවසුහ.
‘ආණ්ඩුවට තව අවුරුද්දක් දෙනවා. එම අවුරුද්දක කාලය ඇතුළත කළ යුතු වැඩපිළිවෙළ සම්බන්ධ යෝජනාවලියක් ජනාධිපති මෛත්‍රීපාල සිරිසේන,අග්‍රාමාත්‍ය රනිල් වික්‍රමසිංහ සහ හිටපු ජනපති මහින්ද රාජපක්ෂ යන මහත්වරුන්ට බාර දුන්නා.’
‘එම යෝජනාවලිය තුළ රට ගොඩනගන්න අවශ්‍ය යෝජනා තියෙනවා. පක්ෂ තුනම එකතුවෙලා මේ යෝජනාවලිය ක්රියාත්මක කිරිමට බලාපොරොත්තු වෙනවා’ යැයි රතන හිමියෝ සඳහන් කළහ.
මුස්ලිම් ඇමැතිවරු රනිල්ට පක්ෂයි
මේ අතර ශ්‍රී ලංකා මුස්ලිම් කොංග්‍රසය, දෙමළ ප්‍රගතිශීලී සන්ධානය සහ සමස්ත ලංකා මහජන කොංග්‍රසය අද පැවැත්වෙන විශ්වාසභංග යෝජනාවට අදාළ ඡන්ද විමසීමේදී අගමැතිවරයාට සහය පළ කිරීමට තීරණය කර තිබේ.
එමෙන්ම විශ්වාසභංග ඡන්ද විමසීමේදී දෙමළ ජාතික සන්ධානය ඡන්දය ප්‍රකාශ කරන ආකාරය සම්බන්ධයෙන් මෙතෙක් අවසන් තීන්දුවක් ගෙන නැත.
ඒ පිළිබඳව සාකච්ඡා කිරීම සඳහා අදත් අවස්ථා කිහිපයකදී දෙමළ ජාතික සන්ධානයේ පාර්ලිමේන්තු මන්ත්‍රීවරුන් රැස්වී තිබිණි.
විශ්වාසභංග ඡන්ද විමසීමට පෙර රාජ්‍ය අමාත්‍යවරුන් වන පාලිත රංගේ බණ්ඩාර සහ වසන්ත සේනානායක මාධ්‍ය හමුවක් කැඳවමින් සඳහන් කළේ තමන් විශ්වාසභංගයට විරුද්ධව ඡන්දය භාවිත කරන බවයි.
COMMENTS