රංගේ බණ්ඩාර, වසන්ත සේනානායක යන රාජ්‍ය ඇමතිවරුන්ට අගමැති රනිල් වික්‍රමසිංහ මහතා පක්ෂ නායකත්වයෙන් ඉවත් කරන්න බලයක් නැති බව ගාල්ල දිස්ත්‍රික්...
රංගේ බණ්ඩාර, වසන්ත සේනානායක යන රාජ්‍ය ඇමතිවරුන්ට අගමැති රනිල් වික්‍රමසිංහ මහතා පක්ෂ නායකත්වයෙන් ඉවත් කරන්න බලයක් නැති බව ගාල්ල දිස්ත්‍රික් එජාප මන්ත්‍රි විජේපාල හෙට්ටිආරච්චි මහතා පවසයි.
ඒ ඊයේ (04) මන්ත්‍රිවරයාගේ නිවසේ පැවති මාධ්‍ය හමුවකදිය.
මන්ත්‍රිවරයා එහිදී මෙසේ අදහස් දැක්වීය.
“වසන්ත සේනානායක හා රංගේ බණ්ඩාර කෑ ගහනවා නායකයා ඉවත් කරන්න ඕන කියලා. වසන්ත සේනානායක රාජ්‍ය ඇමතිතුමා පක්ෂයේ උරුමය ගැන කථා කරනවා. එයා පක්ෂය මාරු කරලා ශ්‍රි ලංකා නිදහස් පක්ෂයට ගිහින් නැවත එජාපයට ආපු කෙනෙක්. එයාට බැහැ පක්ෂ නායකත්වය වෙනස් කරන්න. රංගේ බණ්ඩාර රාජ්‍ය ඇමතිතුමාටත් බලයක් නැහැ. මේවා හුදකලාවේ කරන ප්‍රකාශ. මේ අය මාධ්‍ය සංදර්ශන තමයි පවත්වන්නේ. පුළුවන් නම් කණ්ඩායම ඇතුළේ මේවා කථා කරන්න. අද ආණ්ඩු පක්ෂ කණ්ඩායම් රැස්වීම තියෙනවා. පුළුවන් නම් මේවා කණ්ඩායම් රැස්වීමේ දී කථා කරන්න. සමහර විට හිතෙනවා ඇති මේ වගේ ප්‍රකාශ කළ විට අගමැතිතුමා භයවෙලා ඇමති ධුරයක් දේවි කියලා. එහෙමත්ද දන්නේ නැහැ. මේ වගේ ප්‍රකාශ කරන්නේ. අගමැතිතුමාට රකින්න පරපුරක් නැහැ. අගමැතිතුමා එම ධුරයෙන් ඉවත් කරන්න එජාප පසු පෙළ මන්ත්‍රී කණ්ඩායම කැමති නැහැ. නමුත් එජාපය තුල ප්‍රතිසංවිධානයක් විය යුතුයි. දැන් අගමැතිවරයා ඉවත් කරලා ආණ්ඩුව හා පක්ෂය කඩන්න අපි සුදානම් නැහැ. ඊට පස්සේ මහින්ද රාජපක්ෂ හදන්නේ දෙගොල්ලන්ටම කරන්න බැහැ කියලා යලි බලය ගන්න තමයි පිඹුරුපත් හදන්නේ. එවා ගැන අපි දන්නවා. ඒ කුමන්ත්‍රණ අපි පරාජය කරනවා. එජාපයේ කවුරු හරි විශ්වාසභංගයට අත්සන් කරනවා නම් ඒ අත්සන් කරන්නේ පක්ෂයට ආදරයට නෙවෙයි. වරප්‍රසාදවලටයි.”
“පත්තරවල තියෙනවා එජාපයෙන් දහයක් යනවා පහළොවක් යනවා කියලා. ඒ යන අය කවුද කියලා අපි දැන ගත යුතුයි. හැංගි හැංගි වෙස් බැන්දාට එලියේ නේ නටන්න වෙන්නේ. හැංගි හොරා මේ වගේ දේවල් කරණ අයම තමයි පස්සේ අගමැතිතුමා හමුවෙලා නොයෙකුත් වරප්‍රසාද ලබා ගන්නේ. කලිනුත් එහෙම කරපු ඇතමුන් නියෝජ්‍ය ඇමතිකම් රාජ්‍ය ඇමතිකම් ලබාගෙන තනතුරුවල ඉන්නවා. ඒ කාලයේ අගමැතිතුමා පක්ෂ නායකත්වයෙන් ඉවත් කළ යුතු බවට කියු අය දැන් අගමැතිතුමා එක්ක ඉන්නවා. විශ්වාසභංගය පුස්සක්. එකාබද්ධයේ කල්ලිය පසුගිය දිනවල අලුතෙන් ආණ්ඩුවක් හදන්න සෑහෙන උත්සාහයක් ගත්තා නමුත් 113 සොයා ගන්න බැරි වුනා. එක අසාර්ථක වුනාට පසු විශ්වාසභංග ගේන්න හදනවා. එක එක වරප්‍රසාදවලට යටවෙන යු.එන්.පි මන්ත්‍රිවරු නැහැ. රංගේ බණ්ඩාර මහත්තයා රාජ්‍ය ඇමතිවරයෙක්. එයා ඇමතිකමෙන් අස්වෙලා තමයි විශ්වාසභංග යෝජනාවක් ගෙන්න ඕන. ඇමති ධුරයේ ඉදගෙන විශ්වාසභංග ගේන්න සහ ඒවාට අත්සන් කරන්න සදාචාරාත්මක අයිතියක් නැහැ. 19වැනි සංශෝධනය යටතේ අගමැතිවරයා කාටවත් ඉවත් කරන්න බැහැ. එක එක අගුපිල්වල කථා කරලා විශ්වාසභංග ගේන්න බැහැ. පුළුවන් නම් විශ්වාසභංගයක් අගමැතිවරයාට එරෙහිව ගේන්න කියලා මම අභියෝග කරනවා.”යැයිද ඒ මහතා වැඩිදුරටත් පැවසීය.
(ගාල්ල ලලිත් චාමින්ද )
COMMENTS