ශ්‍රී ලංකා නිදහස් පක්ෂ දඹුල්ල ආසන සංවිධායක යු .ආර්.දයා නන්දසිරි මහතා සිය ආසන සංවිධායක ධුරයෙන් අද (16) දින සිට ඉල්ලා අස් වූ බව ලංකා නිදහස් ...
ශ්‍රී ලංකා නිදහස් පක්ෂ දඹුල්ල ආසන සංවිධායක යු .ආර්.දයා නන්දසිරි මහතා සිය ආසන සංවිධායක ධුරයෙන් අද (16) දින සිට ඉල්ලා අස් වූ බව ලංකා නිදහස් පක්ෂ සභාපති ජනාධිපති මෛත්‍රීපාල සිරිසේන මහතා වෙත ලිඛිතව දැනුම්දී සිටියේ ය.
දඹුල්ල සිය කාර්යාලයේදී අද (16) දින විශේෂ මාධ්‍ය හමුවක් පවත්වමින් දයා නන්දසිරි මහතා මේ බව දැනුම් දුන්නේය.
වසරකට වැඩි කාලයක් තමන් ආසන සංවිධායක ධුරය දැරූ බවත් තමන්ගේ පෞද්ගලික මුදල් වියදම් කරමින් ජනතාවට විශාල සේවාවක් ඉටු කළ ද සංවිධායක ධූරය හරහා තමන්ට කිසිදු සේවයක් ජනතාවට ඉටුකර දීමට අවස්ථාව ලබා නොදීමත් මෙවර වර පළාත් පාලන මැතිවරණයේදී ශ්‍රී ලංකා නිදහස් පක්ෂය හා එක්සත් ජනතා නිදහස් සන්ධානය සඳහා ලැබුණු මන්ත්‍රී ධුර තමන් නම් කර යැවූ අය ඉවත් කොට වෙනත් කණ්ඩායම් පත් කිරීම ආදි කරුණු මෙම ඉල්ලා අස් වීමට බලපා ඇතැයි හෙතෙම සඳහන් කළේය.
ශ්‍රීලංකා නිදහස් පක්ෂයේ දඹුල්ල ආසන සංවිධායක ලෙස කටයුතු කල ජනක බණ්ඩාර තෙන්නකෝන් මහතා ඉවත් කොට නව සංවිධායක ලෙස දයා නන්දසිරි මහතා පත් කළේය .ඔහු ව්‍යාපාරිකයෙකි .
තමන් ඉදිරියට ජනතාව සමඟ ව්‍යාපාරිකයෙකු ලෙස සුපුරුදු පරිදි ජීවත් වන බවත් සඳහන් කර සිටියේය. ශ්‍රී ලංකා නිදහස් පක්ෂයේ සභාපති ජනාධිපති මෛත්‍රීපාල සිරිසේන මහතා වෙත යවන ලද ඉල්ලා අස්වීමේ ලිපියේ ඔහු වැඩිදුරටත් සදහන් කොට ඇත්තේ කෘෂිර්මික ප්‍රදේශයක් වන මාගේ ආසනයේ පුරන් වී ඇති වැව් ප්‍රතිසංස්කරණයට මුදල් ඉල්ලා සිටි නමුත් ඒවාද මෙතෙක් නොලැබුණු අතර එක්සත් ජාතික පක්ෂයේ මන්ත්‍රීවරු ඒවා ක්රියාත්මක කරති.
සංවර්ධන යෝජනා රැසක් මා ඉදිරිපත් කළ නමුත් කිසිදු යෝජනාවක් මෙතෙක් ක්රියාත්මක වී නැත. එවැනි කරුණු කාරණා නිසා අප බලවත් අපහසුතාවයට පත්ව සිටින්නේමු. මා පක්ෂයෙන් ඉවත් නොවී පාක්ෂිකයෙකු ලෙස ඉදිරියටත් ඔබතුමා සමග සිටින අතර ඔබතුමාගේ සංකල්පය සහ යහපත් නීතිගරුක පාලනය හා රට මෙහෙයවන ආකාරය ගැන මගේ පැහැදීමක් ඇත.
නමුත් පොදුවේ පක්ෂයෙන් ආසනයේ ජනතාවට කිසිදු දෙයක් නොලැබෙන නිසාත් දඹුල්ල සෑම රජයේ ආයතන එකම නිලධාරීන් ක්‍රියා කරන ආකාරය ඉතා කණගාටුදායක බවත් මේ ගැටලු මට මෙන්ම අනෙකුත් ආසන සංවිධායකවරුන්ට ඇතැයි මා සිතමි.
එසේම ආසනයේ ජනතාව අපෙන් නගන ප්‍රශ්න වලට උත්තර නොමැති තරම්ය. මෙම කරුණු කාරණා නිසා පාරේ බැස යා නොහැකි තත්ත්වයකට අප පත්ව සිටින්නේ. මේ නිසා මා දඹුල්ල ශ්‍රී ලංකා නිදහස් පක්ෂ ආසන සංවිධායක ධූරයෙන් අද සිට ඉල්ලා අස්වන බව මෙයින් දැනුම් දෙමි.
දයා නන්දසිරි මහතා අස්වීමේ ලිපි ශ්‍රී ලංකා නිදහස් පක්ෂ මහලේකම් එක්සත් ජනතා නිදහස් සන්ධානයේ මහලේකම් මධ්‍යම පළාත් ප්‍රධාන අමාත්‍ය සරත් ඒකනායක මාතලේ දිස්ත්‍රික් නිදහස් පක්ෂ ප්‍රධාන සංවිධායක ලක්ෂ්මන් වසන්ත පෙරේරා යන මහත්ම මහත්මීන්ට මෙන්ම දඹුල්ල ප්‍රාදේශීය ලේකම් කාර්යාලය වෙත ද යවා තිබේ.
(දඹුල්ල කාංචන කුමාර ආරියදාස)
COMMENTS