ආගමික ශාස්තෘන්ට, පුජ්‍ය පක්ෂයට, දෙමව්පියන්ට සහ ගුරුදෙගුරුන්ට පමණක් වන්දනාමාන කරන ලෙස ඉල්ලා සිටින මුදල් හා ජනමාධ්‍ය අමාත්‍යවරයා බලය ඉදිරිය...
ආගමික ශාස්තෘන්ට, පුජ්‍ය පක්ෂයට, දෙමව්පියන්ට සහ ගුරුදෙගුරුන්ට පමණක් වන්දනාමාන කරන ලෙස ඉල්ලා සිටින මුදල් හා ජනමාධ්‍ය අමාත්‍යවරයා බලය ඉදිරියේ කිසිවෙකු නැමෙන්න අවශ්‍ය නොමැති බව අවධාරණය කරයි.
"මම උදේ මෙතනට ආවම ශිෂ්‍ය නායිකාවක් වෙන්න ඇති මට බුලත් අතක් දීල වැන්ද. මම විශ්වාස කරන හැටියට මෙය සිදු නොවිය යුත්තක්. බලය ඉදිරියේ අපි කාටවත් නැමෙන්න ඕනෙ නෑ. තමන්ගෙ ආගමේ ශාස්තෘවරුන්ට වඳින්න, පූජ්‍ය පක්ෂයට වඳින්න, මවට පියාට වඳින්න, ගුරුවන්ට වඳන්න. ඒ ඇති. මෙතනට ප්‍රාදේශීය සභාවේ සභාපති ආවත් වඳිනවා, මන්ත්‍රී ආවත් වඳිනවා, කැබිනට් ඇමැති ආවත් වඳිනවා. මම ගෙදර ගිහින් මොන විදිහේ නීති විරෝධී වැඩ කරනව ද කියල ඔයාල කොහොම ද දන්නෙ? ඒ නිසා ගරුකරන කෙනෙකුට ගරු කරන්න. කොන්ද කෙලින් තියාගෙන වැඩ කරන්න පුළුවන් සමාජයක් බිහි කරන්නයි අපට ඕනෙ.“ යැයි මංගල සමරවීර ඇමැතිවරයා කියා සිටියේය.
2014 අයවැයයෙන් අධ්‍යාපනය සඳහා රුපියල් බිලියන 196 කට අඩුවෙන් වෙන් කල බව සිහිපත් කර දුන් ඇමැතිවරයා මෙවර අයවැයෙන් බිලියන 333 පමණ අධ්‍යාපනය වෙන් කල බව 26 සඳුදා මාතර සාන්ත තෝමස් උසස් බාලිකා විද්‍යාලයේ සිසු නේවාසිකාගාරය විවෘත කිරීම සහ නව සිවු මහල් පංති කාමර ගොඩනැගිල්ලට මුල් ගල තැබීමේ අවස්ථාවට එක්වෙමින් පෙන්වා දුනි.
ගෝත්‍රික මත පරදා නවීන ලොව ජය ගත හැකි තරුණ පරපුරක් බිහි කිරීම රජයේ අපේක්ෂාව බව කී මුදල් හා ජනමාධ්‍ය අමාත්‍ය මංගල සමරවීර රටක් දියුණවට පත් වීම යනු තරුණ පරපුර අධ්‍යාපනය අතින් ඉදිරියට ගමන් කිරීම බවයි පවසන්නේ.
ඩිජිටල් විප්ලවයට සරිලන ලෙස තරුණ පරපුරුක් නිර්මාණය කිරිම වත්මන් රජයේ අරමුණ බවයි මංගල සමරවීර ඇමැතිවරයා වැඩි දුරටත් කියා සිටියේ.
COMMENTS