හම්බන්තොට වරායේ ව්‍යාපෘතියේ ආයෝජනය කළ එකම දේශිය සමාගම දොට්ට?

හම්බන්තොට වරාය ව්‍යාපෘතිය යටතේ ඉදිකරමින් පවතින දකුණු ආසියාවේ විශාලතම LPG ආනයන හා අපනයන පර්යන්තයේ වැඩ කටයුතු හදිසියේම නවතා දමන ලෙස ලාෆ්ස් ස...

හම්බන්තොට වරාය ව්‍යාපෘතිය යටතේ ඉදිකරමින් පවතින දකුණු ආසියාවේ විශාලතම LPG ආනයන හා අපනයන පර්යන්තයේ වැඩ කටයුතු හදිසියේම නවතා දමන ලෙස ලාෆ්ස් සමාගමට දැනුම් දී ඇතැයි වාර්තා වේ.

ලබන අප්‍රේල් 28 දින විවෘත කිරීමට නියමිත මෙම ව්‍යාපෘතියේ මේ වන විට සියයට 80ක වැඩ කටයුතු අවසන් කර තිබේ. හම්බන්තොට වරාය ව්‍යාපෘතියට අදාලව දේශීය ආයෝජකයෙකු විසින් සිදුකරන එකම ව්‍යාපෘතියද මෙය වේ.

හම්බන්තොට වරාය හා සම්බන්ධ පළමු මෙන්ම දැවැන්තම ආයෝජනය ලෙසින් හැඳින්විය හැකි අතර මේ සඳහා වන සම්පූර්ණ ආයෝජනය ඇමරිකානු ඩොලර් මිලියන 80 ඉක්මවනු ලබයි.

හම්බන්තොට වරයා චීන සමාගමට පවරා දීමටත් පෙර සිටම 2016 වසරේදී මෙම ව්‍යාපෘතිය ආරම්භ කර තිබූ අතර ඊට අදාලව ශ්‍රී ලංකා රජය සමග දේශීය සමාගමක් වන ලාෆ්ස් සමාගම අතර ගිවිසුම් අත්සන් කර තිබිණි.

නමුත් වරාය අධිකාරියේ පරිපාලනය විසින් ලාෆ්ස් සමාගමට මේවන විට දන්වා ඇත්තේ ලාෆ්ස් LPG පර්යන්ත ව්‍යාපෘතියට අදාල ගිවිසුම අවලංගු කර නව ගිවිසුමක් අත්සන් කරන ලෙසයි.

එහිදී ලාෆ්ස් සමාගම ප්‍රකාශ කර ඇත්තේ මේවන විට චීන සමාගම සහ ශ්‍රී ලංකා රජය අත්සන් කර ඇති ගිවිසුම් අනුව නව ගිවිසුමක් අත්සන් කළ හැකිය යන්නයි. නමුත් වරාය අධිකාරිය ශ්‍රී ලංකා රජය සහ චීන සමාගම අත්සන් කළ එම ගිවිසුම ලබා දීමට අකමැත්ත ප්‍රකාශ කර ඇතැයි වාර්තා වේ.

මේවන විටත් අදාල ව්‍යාපෘතියේ ඉදිකිරීම් කටයුතු සියයට 80ක් නිම කර ඇති අතර මේවන විට නල එලීමේ කටයුතු සිදු කරයි. වරාය අධිකාරියේ සභාපතිවරයාගේ අනුදැනුම මත හම්බන්තොට වරාය භාර නිලධාරියා විසින් එම නල එලීමේ කටයුතුද නවතා දමන ලෙස ලාෆ්ස් සමාගම දන්වා ඇතැයි වාර්තා වේ. මේ හේතුවෙන් හම්බන්තොට වරායේ ලාෆ්ස් LPG පර්යන්ත ව්‍යාපෘතිය විවෘත කිරීමේ කටයුතු අතරමග නවතා දැමීමට සිදුවනු ඇති බව වාර්තා වේ.

හම්බන්තොට LPG ව්‍යාපෘතියෙන් ලාෆ්ස් දොට්ට?

දේශීය ආයෝජකයින් පවසන්නේ හම්බන්තොට වරාය ව්‍යාපෘතියෙන් දේශීය ව්‍යාපාරිකයින් ඉවත් කිරීමේ සැලසුමක් පවතින බවයි.

මේ සම්බන්ධයෙන් අදහස් දැන ගැනීමට වරාය අධිකාරියේ සභාපති පරාක්‍රම දිසානායක මහතා අප සම්බන්ධ කර ගැනීමට කිහිපවරක් උත්සාය කළද එම උත්සාහය ව්‍යර්ථ විය.

මේ සම්බන්ධයෙන් අදහස් දැන ගැනීමට ලාෆ්ස් සමූහ ව්‍යාපාරයේ සභාපති ඩබ්ලිව්. කේ. එච්. වෑගපිටිය මහතාද සම්බන්ධ කර ගැනීමට උත්සාය කළද එයද ව්‍යර්ථ විය.

මෙහිදී ඉදිකෙරෙනු ලබන ලාෆ්ස් LPG පර්යන්තය, ගබඩා කිරීමේ ධාරිතාවය අනුව දකුණු ආසියාවේ විශාලතම LPG ආනයන හා අපනයන පර්යන්තයක් වනු ඇත.

ලොව විශාලතම නාවුක ගමන් මාර්ගයක හම්බන්තොට වරාය පිහිටා තිබෙන අතර ලොව ඉතා වේගයෙන් වර්ධනය වන LPG වෙළෙඳපොළවල් වන ඉන්දියාව, බංග්ලාදේශය, මියන්මාරය, නැගෙනහිර හා දකුණු ආප්‍රිකානු කලාපය ආසන්නයෙන්ද හම්බන්තොට වරාය පිහිටා තිබීම උපක්‍රමශීලී ලෙස අපට විශාල වාසි රැසක් අත්පත් කර ගත හැකියි. මෙම ව්‍යාපෘතිය හරහා හම්බන්තොට ප්‍රදේශය ආශ්‍රිතව නව රැකියා විශාල ප්‍රමාණයක් බිහිවෙයි.