හිටපු ජනපති මහින්ද රාජපක්ෂ මහතා ආරක්ෂා කිරීමට රජය සූදානම් බවත් හිටපු ජනපතිවරයා ආරක්ෂා කිරීමෙන් තමන්ට එළැඹෙන මැතිවරණයේදී විශේෂ වාසියක් සැලස...
හිටපු ජනපති මහින්ද රාජපක්ෂ මහතා ආරක්ෂා කිරීමට රජය සූදානම් බවත් හිටපු ජනපතිවරයා ආරක්ෂා කිරීමෙන් තමන්ට එළැඹෙන මැතිවරණයේදී විශේෂ වාසියක් සැලසෙන බැවින් ඔහු ආරක්ෂා කිරීමට පියවර ගන්නා බවත් අගමැති රනිල් වික්‍රමසිංහ මහතා අද(8) පාර්ලිමේන්තුවේදී පැවසීය.
හිටපු ජනපතිවරයා එළැඹෙන පළාත් පාලන මැතිවරණය වෙනුවෙන් ඡන්ද රැස්වීම් සඳහා සහභාගීවන බවත් එහිදී දැනට ඇති ආරක්ෂාව දැඩි කරන ලෙසත් ඉල්ලමින් ඒකාබද්ධ විපක්ෂයේ කණ්ඩායම් නායක දිනේෂ් ගුණවර්ධන මහතා පාර්ලිමේන්තුවෙන් කළ විශේෂ ඉල්ලීමට පිළිතුරු දෙමින් අගමැතියරයා මේ බව පැවසීය.
මහින්දට 154ක් - චන්ද්‍රිකා 61ක්
දැනට ආරක්ෂකයින් 154ක් හිටපු ජනපතිවරයාට ලබාදි ඇති බවත් ඊට වඩා ආරක්ෂාවක් අවශ්‍ය නම් එයද ලබාදෙන බවත් නමුත් මෙතෙක් බුද්ධි අංශ වාර්තා මගින් හෝ පොලිසිය මගින් එවන් අවශ්‍යතාවයක් මතුකර නැති බවත් අගමැතිවරයා පෙන්වා දුන්නේය.
හිටපු ජනාධිපති මහින්ද රාජපක්ෂ මහතාට සහ හිටපු ජනධිපති චන්ද්‍රිකා බණ්ඩාරනායක කුමාරතුංග මහත්මියට ප්‍රමාණවත් ආරක්ෂාවක් සපයා ඇතැයි හෙතෙම සඳහන් කළේය.
ඒ අනුව මහින්ද රාජපක්ෂ මහතාට ආරක්ෂක නිලධාරීන් 154ක් ද හිටපු ජනාධිපතිනිය චන්ද්‍රිකා බණ්ඩාරනායක කුමාරතුංග මහත්මියට ආරක්ෂක නිලධාරීන් 61ක් අනියුක්ත කර ඇත.
COMMENTS