ඉදිරි පළාත් පාලන මැතිවරණයේදී එක්සත් ජනතා නිදහස් සන්ධානයට අයත් දේශපාලන පක්ෂ වෙන වෙනම තරග කිරීමට විධායක සභා රැස්වීමේදී තීන්දු කෙරුණු බව එක්ස...
ඉදිරි පළාත් පාලන මැතිවරණයේදී එක්සත් ජනතා නිදහස් සන්ධානයට අයත් දේශපාලන පක්ෂ වෙන වෙනම තරග කිරීමට විධායක සභා රැස්වීමේදී තීන්දු කෙරුණු බව එක්සත් ජනතා නිදහස් සන්ධානයේ මහලේකම් මහින්ද අමරවීර මහතා පැවැසීය.
මහජන එක්සත් පෙරමුණේ නායක පාර්ලිමේන්තු මන්ත‍්‍රී දිනේෂ් ගුණවර්ධන මහතා විධායක සභාවේදී එම යෝජනාව ඉදිරිපත් කළ බවද මහින්ද අමරවීර මහතා කීය.
කෙසේ වෙතත් තමා එක්සත් ජනතා නිදහස් සන්ධානයේ මහලේකම්වරයා ලෙස පළාත් පාලන මැතිවරණයට එක්ව තරග කළ යුතු බවට යෝජනාවක් ඉදිරිපත් කළ බවද අමරවීර මහතා පැවැසීය.
මේ අතර ලංකා කම්කරු කොංග‍්‍රසය නියෝජනය කරන පාර්ලිමේන්තු මන්ත‍්‍රී ආරුමුගම් තොණ්ඩමන් සහ ජාතික කොංග‍්‍රසය නියෝජනය කරන ඒ.එල්.එම්. අතාවුල්ලා යන මහත්වරුන් එම සාකච්ඡාවේදී ශ්‍රී ලංකා නිදහස් පක්ෂය සමග එක්ව තරග කිරීමට තීරණය කර තිබේ.
කොළඹ ජනාධිපති කාර්යාලයේදී ජනාධිපති මෛත‍්‍රීපාල සිරිසේන මහතාගේ ප‍්‍රධානත්වයෙන් පැවැති එක්සත් ජනතා නිදහස් සන්ධාන විධායක සභාව රැස්වීමට ශ්‍රී ලංකා මහජන පක්ෂය, දේශ විමුක්ති ජනතා පක්ෂය, ලංකා කම්කරු කොංග‍්‍රසය, ජාතික කොංග‍්‍රසය, ප‍්‍රජාතන්ත‍්‍රවාදී එක්සත් ජාතික පෙරමුණ, ශ්‍රී ලංකා කම්කරු පක්ෂය ඇතුළු සන්ධානයට අයත් පක්ෂවල නායකයින් සහභාගි වී ඇත.
එහිදී අදහස් දක්වමින් ජනාධිපතිවරයා ප‍්‍රකාශ කර ඇත්තේ චරිත ඝාතන හා ප‍්‍රචණ්ඩ ක‍්‍රියාවලින් තොර නිදහස් සහ සාමකාමී මැතිවරණ ව්‍යාපාරයක් වෙනුවෙන් සියලූදෙනා කැපවිය යුතු බවය.
මෙවර මැතිවරණ ජයග‍්‍රහණය තීරණය වන්නේ අපේක්ෂකයන් මත වන බැවින් සන්ධානයේ සියලූ පක්ෂ පිරිසිදු සහ නිවැරදි දේශපාලන ගමනක් සහිත අපේක්ෂකයින් ඉදිරිපත් කළ යුතු බවද ජනාධිපතිවරයා එහිදී ප‍්‍රකාශ කර තිබේ.
COMMENTS