සීගිරිය ඉලුක්වල ප්‍රදේශයේ වටිනා ඉඩම් උතුරු මැද හිටපු මහ ඇමැති පේෂල ජයරත්න මහතා සහ හිතවතුන් පිරිසක් පැමිණ අත්පත් කර ගැනීමට යන බව පවසා දඹුල්...
සීගිරිය ඉලුක්වල ප්‍රදේශයේ වටිනා ඉඩම් උතුරු මැද හිටපු මහ ඇමැති පේෂල ජයරත්න මහතා සහ හිතවතුන් පිරිසක් පැමිණ අත්පත් කර ගැනීමට යන බව පවසා දඹුල්ල ප්‍රාදේශීය සභාවේ හිටපු මන්ත්‍රීවරයෙකු අතර දින කිහිපයක සිට ගැටුමක් ඇති වී තිබේ.
උතුරු මැද හිටපු මහ ඇමැති පේෂල ජයරත්න මහතාගේ කණ්ඩායමක් පැමිණ සීගිරිය ප්‍රදේශයේ ඉඩමක බලහත්කාරයෙන් ඇතුළු වී ගොඩනැගිලි ඉදිකරන බවට ලද තොරතුරක් අනුව මධ්‍යම පළාත් සභාවේ එක්සත් ජාතික පක්ෂ මන්ත්‍රී තිස්ස බණ්ඩාර හේරත් මහතා 28 දින පස්වරුවේ එම ස්ථානයට ගියේය.
ඒ යන විටත් ධාරානිපාත වර්ෂා නොතකා කණ්ඩායමක් තාවකාලික ගොඩනැගිල්ලක් ඉදි කරමින් සිටින අයුරු දැක ගැනීමට හැකියාව ලැබිණි. එම අවස්ථාවේම දඹුල්ල ප්‍රාදේශීය සභාවේ හිටපු මන්ත්‍රීවරයකු වූ හැලබආරච්ච් මහතා එම ස්ථානයට පැමිණ ඉදිකිරීම් කරමින් සිටි පිරිස සමඟ දැඩි උණුසුම් වචන හුවමාරුවක් ඇති කර ගත්තේය.
මෙම ස්ථානයට පැමිණි හිටපු ප්‍රාදේශීය සභා මන්ත්‍රීවරයා දැඩිව විවේචනය කරන්නට වූයේ අවි ආයුධ පෙන්වමින් මැර කණ්ඩායම් ගෙන උතුරු මැද පළාත් සභාවේ හිටපු මහ ඇමැති පේෂල ජයරත්න මහතා මෙම ඉඩම් කොල්ලය සිදුකළ බවත් තමන් මේ පිළිබඳව පොලිස් හදිසි ඇමතුම් අංශයට පැමිණිලි පහළොවක් ඉදිරිපත් කොට තිබෙන බවත් අවි ආයුධ පෙන්වා තමන්ව මරා දැමීමට පහරදීමට උත්සාහ කළ බවත් එමෙන්ම ඉඩම් බලහත්කාරයෙන් අත්පත් කර ගන්නා බවටත් උතුරුමැද මහ ඇමතිගේ හිටපු මහ ඇමැති පේෂල ජයරත්න මහතාට විරුද්ධව සීගිරිය පොලීසියේ පැමිණිලි හතරක් මේ වනවිට දමා ඇත. එහෙත් එකම පැමිණිල්ලක්වත් විභාගයක් සිදු කර නැති බව චෝදනා කරන්නට විය.
මේ ස්ථානයට පැමිණි පළාත් සභා මන්ත්‍රී තිස්ස බණ්ඩාර හේරත් මහතා සහ ඉදිකිරීම් කරමින් සිටි පුද්ගලයන් අතර උණුසුම් වචන හුවමාරුවක් ද ඇති විය. තිස්ස බණ්ඩාර හේරත් මහතා කියා සිටියේ මහ ඇමති නොව ජනාධිපති ආවත් තම බල ප්‍රදේශයේ ඉඩම් මංකොල්ල කෑමට කිසිවෙකුට තමන් ඉඩ ලබා නොදෙන බවය.
ඉඩම් පිළිබඳ ප්‍රශ්නයක් ඇත්නම් අධිකරණයට ගොස් විසඳා ගන්නා ලෙසත් එසේ නොමැතිව බලහත්කාරයෙන් පොලිසිය දේශපාලන බලය යොදාගෙන මෙවැනි ඉඩම් අත්පත් කර ගැනීමට තමන් කිසිදු ආකාරයකින් ඉඩක් ලබා නොදෙන බව සඳහන් කළේය.
කෙසේ වෙතත් ඉදිරියට පැමිණි ඉඩමේ අයිතිකරු බව කියන හිටපු ප්‍රාදේශීය සභා මන්ත්‍රීවරයා කියා සිටියේ පේෂල ජයරත්න හිටපු මහ ඇමතිවරයා සහ ඔහුගේ මිතුරන් පිරිස අල්ලාගෙන ඇති ඉඩම උතුරු මැද පළාත් හිටපු මහ ඇමැති බර්ටි ප්‍රේමලාල් දිසානායක මහතාගේ නමට තමන් විසින් ලියූ ඉඩමක් බවය. එමෙන්ම තමන් ඒ පිලිබදව කෘෂිකර්ම අමාත්‍ය බර්ටි ප්‍රේමලාල් දිසානායක මහතාගේ පුත් දුමින්ද දිසානායක මහතා ව දැනුවත් කළ බවද ඔහු කියන්නට විය.
කෙසේ වෙතත් මේ පිළිබඳ සම්බන්ධයෙන් සීගිරිය පොලිසියේ සුළු පැමිණිලි අංශයේ ස්ථානාධිපති පොලිස් පරීක්ෂක ඒ .සි . එල් .එච් .සොයිසා මහතාගෙන් විමසීමේදී කියා සිටියේ උතුරු මැද හිටපු මහ ඇමැති පේෂල ජයරත්න මහතාට විරුද්ධව පැමිණිලි කිහිපයක් ලැබී තිබෙන බවත් එම පැමිණිලි විභාග කිරීම සඳහා පේෂල ජයරත්න මහතාට සීගිරිය පොලිසියේ පෙනී සිටින ලෙස දැනුම් දුන්නද මෙතෙක් ඔහු නොපැමිණි බව ය.
කෙසේ වෙතත් මෙම පැමිණිලි විභාග කිරීමට නොහැකි වන නිසා මෙම සිද්ධිය පිළිබඳව අධිකරණයට කරුණු ඉදිරිපත් කරන බවද හෙතෙම සඳහන් කෙළේය. මේ පිළිබධව උතුරු මැද පළාත් හිටපු මහ ඇමැති පේෂල ජයරත්න මහතාගෙන් විමසීමේදී කිවේ ,තමන්ට පොලිසියේ පැමිණිලි ඇති බවට හෝ කැදවීමක් සිදු කර නොමැති බවත් තමන් ගේ නෑදෑයන් පිරිසකට උදව්වක් කිරීමට සීගිරියට ගිය අවස්ථාවේ පුද්ගලයකු පැමිණ තමන්ට බැන තර්ජනය කල බව ය.
(දඹුල්ල කාංචන කුමාර ආරියදාස )
COMMENTS