කළුතර - පානදුර තරග පාවාදීමට සම්බන්ධ නිලධාරීන් හඳුනාගෙන ඔවුන්ට දඬුවම් පැමිණවීම ප්‍රමාද වන්නේ ඇයිදැයි හිටපු ටෙස්ට් ක්‍රිකට් නායක අමාත්‍ය අර...
කළුතර - පානදුර තරග පාවාදීමට සම්බන්ධ නිලධාරීන් හඳුනාගෙන ඔවුන්ට දඬුවම් පැමිණවීම ප්‍රමාද වන්නේ ඇයිදැයි හිටපු ටෙස්ට් ක්‍රිකට් නායක අමාත්‍ය අර්ජුන රණතුංග මහතා ක්‍රීඩා අමාත්‍ය දයාසිරි දයාසේකර මහතාගෙන් ප්‍රශ්න කර සිටියි.
ක්‍රීඩා අමාත්‍ය දයාසිරි ජයසේකර මහතාට ලිපියක් යොමුකරමින් ඔහු මේ බව විමසා තිබේ.
එම ලිපියෙන් අර්ජුන රණතුංග මහතා අවධාරණය කරන්නේ තරග පාවාදීමට වගකිවයුතු සහ වගවීමේ ක්‍රියාවලියට බැඳෙන එකී ක්‍රීඩාසමාජවල ඉහළ නිලධාරීන්ට එරෙහිව කිසිදු දඬුවමක් ලබා නොදීම විශ්මයාර්ථය දනවන කරුණක් බවයි.
තරග පාවාදීමේ සියලු වගකීම් ක්රීඩකයන් වෙත පටවා එකී ක්‍රීඩා සමාජවල ඉහළ නිලධාරීන් බේරීමේ සූක්ෂම සැලසුමක් මේ වනවිට ක්රියාත්මක වන බවද එම ලිපියේ දැක්වේ.
‘පානදුර - කළුතර තරග පාවාදීම සංවිධානාත්මක අපරාධයකි. එහි මූලික ඉලක්කය වූයේ ශ්‍රී ලංකා වරාය අධිකාරි කණ්ඩායම ප්‍රිමියර් ලීග් බී කාණ්ඩයෙන් ඒ කාණ්ඩයට යාම වැළැක්වීමයි. ඊට අමතරව පානදුර කණ්ඩායමට ඒ කාණ්ඩය සඳහා සුදුසුකම් ලබාගැනීමටත්, කළුතර කණ්ඩායමට ප්‍රිමියර් ලීග් බී කාණ්ඩයේ සිට සරා තරගාවලිය දක්වා පහළ වැටීම වළක්වාගැනීමේත් අරමුණින් තරගාවලියේ ප‍්‍රසාද ලකුණු සටහනට බලපෑමක් එල්ල කිරීමද මෙම තරග පාවාදීමේ අරමුණක් බව පැහැදිලිය. එය චේතනාන්විතව සිදු කරන ලද වංචාවකි, අපරාධයකි.
එවැනි සංවිධානාත්මක අපරාධයක් සිදු කිරීම ක‍්‍රීඩකයන්ට පමණක් සිදු කළ නොහැකි බව මගේ විශ්වාසයයි. ඒ සඳහා ක්රීඩකයන් පෙළඹවීමට සහ සැලසුම් සකස් කිරීමට ක්‍රීඩා සමාජවල ඉහළ නිලධාරීන්ගේ මැදිහත් වීම මෙන්ම අනුදැනුම අත්‍යවශ්‍යමය. ක්‍රීඩාවේ පාරිශුද්ධත්වය සුරැකීමටත්, මෙවැනි අශීලාචාර ක්‍රියා තවදුරටත් සිදු නොවීමටත් මේ තරග පාවාදීම පිටුපස සිටියේ කවුරුන්දැයි යන්න හඳුනාගැනීමද අත්‍යවශ්‍යය.’
COMMENTS