ඇතැම් අය අන් අයගේ අමාත්‍යංශවලට ඇගිලි ගහනවා - අර්ජුන රණතුංග

ඇතැම් දේශපාලඥයන් තම අමාත්‍යංශයේ කටයුතු සිදු කිරීමට ඉඩ නොදී ඊට අතපොවන බවත් මේ නිසා අමාත්‍යංශයේ රාජකාරී කිරීම ගැටලුවක් බවට පත්ව තිබෙන බව ම...

ඇතැම් දේශපාලඥයන් තම අමාත්‍යංශයේ කටයුතු සිදු කිරීමට ඉඩ නොදී ඊට අතපොවන බවත් මේ නිසා අමාත්‍යංශයේ රාජකාරී කිරීම ගැටලුවක් බවට පත්ව තිබෙන බව මහනුවර දී අස්ගිරි පාර්ශවයේ මහා නායක අතිපූජ්‍ය වරකාගොඩ ඤාණරතන හිමිපාණන් වහන්සේ බැහැ දකිමින් අමාත්‍යවරයා උන්වහන්සේ වෙත මේ බව කීවේය.

පසුගිය කාලයේදී වරාය සේවකයන්ගේ වැඩ වර්ජන කිහිපයක් දියත් වුණු බවත් එයින් රැසක්ම සේවයන්ගේ සාධාරණ ඉල්ලීම් වන නමුත් මහජන පීඩාව අවම කිරීම සදහා වර්ජන නතර කරන ලෙස තමන් සේවකයන්ගෙන් ඉල්ලා සිටි බව අමාත්‍යවරයා කීවේය.

අමාත්‍යංශයට බලපෑම් එල්ලවුවත් ජනාධිපතිවරයා සෘජුව කටයුතු කරන බැවින් තමන්ට කිසිදු ගැටලුවක් නොමැති බව ද අමාත්‍යංශවල ගැටලු අදහස් ප්‍රකාශ කිරීමේ අයිතිය හා නිදහස ඒ මහතා ලබාදී ඇතැයි ද අමාත්‍යවරයා සදහන් කළේය.

නව අමාත්‍යංශයේ රාජකාරී ආරම්භ කිරීමෙන් පසු මහා නායක හිමියන් බැහැ දැකීමට තීරණය කළත් එය තරමක් දුරට ප්‍රමාද වුණු බව කී අමාත්‍යවරයා සිය අමාත්‍යංශයට පැවරෙන රාජකාරී රැසක් ඇතැයි ද කීවේය.
ක්‍රිකට් ක්‍රීඩාවේදී දේශපාලඥයන් පිළිබද අවධානය යොමුකරනවාට වඩා ක්‍රීඩකයන් පිළිබදව අවධානය යොමු කිරීම වැදගත් යැයි ද අමාත්‍යවරයා කීවේය. පාසල් ක්‍රිකට් ක්‍රිඩාව ද මේ වන විට සංවර්ධනය කළ යුතුව ඇතැයි කී අමාත්‍යවරයා අග්‍රාමාත්‍යවරයා ඒ සදහා රුපියල් මිලියන සියයක පමණ මුදලක් ලබා දී ඇතැයි කීවේය. මේ වන විට පාසල් ක්‍රිකට් ක්‍රීඩාවේ යම් පරිහානියක් දැකිය හැකි යැයි ඔහු සදහන් කළේය.

ඉදිරි ලෝක කුසලාන තරගයේදී තරගාවලියට ප්‍රථමයෙන් එංගලන්ත හා බටහිර කොදෙව් තරගාවලියක් පවතින බවත් යම් අයුරකින් බටහිර කොදෙව් පිළ ජය ලැබුවොත් ශ්‍රී ලංකා කණ්ඩායමට තේරීම් තරගයකට මුහුණදීමට සිදුවන බව ද ශ්‍රී ලංකා ක්‍රිකට් කණ්ඩායම ටෙස්ට් තරගවලට අවතීරණය වී මේ දක්වා කිසිදු දිනක එවැනි තේරීම් තරගයකට එළැඹ නැතැයි ද අමාත්‍ය අර්ජුන රණතුංග මහතා මහා නායක හිමියන් හමුවේ කියා සිටියේය.
නදීක දයා බණ්ඩාර - මහනුවර
https://www.youtube.com/watch?v=FHu7aL4CSkY&feature=youtu.be