Hot!

සාකච්ජා අසාර්ථකයි. ඇමති දුමින්දට විරෝධය පා ගොවීහු පිටව යති! (ජායාරූප)

සාකච්ජා අසාර්ථකයි. ඇමති දුමින්දට විරෝධය පා ගොවීහු පිටව යති! (ජායාරූප)

රුපියල් 40,000ක එම වන්දි මුදලෙන් ලබා දීමට ඉතිරිව ඇති රුපියල් 30000ක ඉතිරි මුදල ලබා දෙන ලෙස අවස්ථා කිහිපයකදීම බලධාරීන් දැනුවත් කළද ඉල්ලීම ඉටු නොවීම හේතුවෙන් උද්ඝෝෂණයක් සංවිධානය කළ බවයි සමස්ත ලංකා ගොවි ජන සම්මේලනය සඳහන් කළේ. අද උදෑසන සිට සන්ධ්‍යාව වනතුරුම උද්ඝෝෂණයේ නිරත ගොවි නියෝජිතයන් පාර්ලිමේන්තු වට රවුමේ රැඳී සිටි අතර පස්වරු 12.30 පමණ අමාත්‍යංශ ලේකම්වරයා සමඟ සාකච්ජාවකට සමස්ත ලංකා ගොවි ජන සම්මේලනයේ සංවිධායක නාමල් කරුණාරත්න මහතා ඇතුළු ගොවි නියෝජිතයන් දස දෙනෙකුට දැනුම් දී තිබුණ නමුත් අමාත්‍ය දුමින්ද දිසානායක මහතා එහි නොසිටි බැවින් අමාත්‍යංශ ලේකම්වරයා සමඟ සාකච්ජාව ප්‍රතික්ෂේප කෙරිණි.

පස්වරු 2.45ට පමණ අමාත්‍යවරයා අමාත්‍යංශයට පැමිණීමෙන් පසුව සාකච්ජාව ආරම්භ විය. සාකච්ජාව පැවැත්වෙන අතරතුරත් සෙසු ගොවි නියෝජිතයන් අමාත්‍යාංශයට ප්‍රවේශ වන මාර්ගයේ විරෝධතාවේ නිරත විය.

සාකච්ජාවේදී අදහස් දක්වමින් අමාත්‍යවරයා සඳහන් කළේ මේ මොහොතේ රටේ මුදල් ප්‍රශ්නයක් ඇති බවත් එහෙත් ගොවි ජනතාවගේ ප්‍රශ්න දෙස සානුකම්පිතව බලන බවත්ය. ඒ අනුව ජනාධිපතිවරයා, අගමැතිවරයා සහ මුදල් අමාත්‍යවරයා සමඟ සාකච්ජා කර වන්දි ප්‍රශ්නයට විසඳුමක් ලබා දෙන බවයි අමාත්‍යවරයා පැවසුවේ.

මේ අතර ගොවි නියෝජිතයන් ප්‍රශ්න කර සිටියේ ඉතිරි වන්දි මුදල ලබා දීමට තව කෙතරම් කාලයක් ගතවේද යන්නයි. ඊට පිළිතුරු දෙමින් අමාත්‍යවරයා කියා සිටියේ දින වකවානු පිළිබඳ නිශ්චිතව කීමට නොහැකි බවයි. කෙසේ වෙතත් නියං සහනාධාර ලෙස මාස දෙකක් සඳහා රු.පන්දහසක් ලබා දෙන බවත් එය මසකට රු. දෙදහස් පන්සියය බැගින් වාරික දෙකකදී ලබා දෙන බවයි අමාත්‍යවරයා ප්‍රකාශ කළේ. මුදල් අර්බුදයක් පවතින මොහොතක රු.පන්දහසක් හෝ ලැබීම විශාල දෙයක් බව දුමින්ද දිසානායක මහතා පැවසිය.

දෙපාර්ශවය අතර සාකච්ජාව එකඟතාවකින් තොරව අවසන් වූ අතර සාකච්ජාවෙන අනතුරුව මාධ්‍ය වෙත අදහස් දක්වමින් සමස්ත ලංකා ගොවි ජන සම්මේලනයේ සංවිධායක නාමල් කරුණාරත්න මහතා මාධ්‍ය වෙත අදහස් දක්වමින් කියා සිටියේ ඉතිරි වන්දි මුදල් ලබා දීම පිළිබඳව අමාත්‍යවරයාට පිළිතුරු නොමැති බවයි. මහකන්නයට අදාළව මෙම වන්දි මුදල ලබා දෙන බවට ආණ්ඩුව පොරොන්දු වූ අතර එය මාස හතරක කාලයක් තුළ ලබා දෙන බව ආණ්ඩුව ප්‍රකාශ කළ බව නාමල් කරුණාරත්න මහතා සිහිපත් කළේය. මේ වන විටත් මුල් කොටස හෝ නොලැබුණ ගොවීන් සිටින බවයි ඔහු පැවසුවේ. පවතින නියගය නිසා විලච්චිය ප්‍රදේශයේ කන්න හතරක් වගා කිරීමට නොහැකි වූ බව කියා සිටි කරුණාරත්න මහතා අවධාරණය කළේ අද දවස වන විට ගොවියන්ට බොන්න කැඳ උගුරක්වත් නොමැති බවයි.

ආණ්ඩුව,වන්දි මුදල් ලබා දීම වෙනුවට රු. පන්දහසේ බඩු මලු දෙකක් දී ප්‍රශ්නය මඟ හැරීමට සුදානම් වන බව වැඩිදුරටත් අදහස් දක්වමින් නාමල් කරුණාරත්න මහතා කියා සිටියේය.

නිශාන්ත ප්‍රියදර්ශන

0 comments:

Post a Comment