උතුරු මැද පළාත් සභාවේ සභාපතිවරයාට එරෙහිව විශ්වාසභංග යෝජනාවක් මුල්කර ගනිමින් අද (18) එම පළාත් සභාවේ උණුසුම් තත්ත්වයක් හට ගත්තේය. සභාපතිවරය...
උතුරු මැද පළාත් සභාවේ සභාපතිවරයාට එරෙහිව විශ්වාසභංග යෝජනාවක් මුල්කර ගනිමින් අද (18) එම පළාත් සභාවේ උණුසුම් තත්ත්වයක් හට ගත්තේය.
සභාපතිවරයා විසින් අදාළ විශ්වාසභංග යෝජනාව විවාදයට ගැනීමට අවසර නොදීමෙන් මෙම තත්ත්වය ඇති වූ බවත් එහිදී එම උණුසුම්කාරී තත්ත්වය ගැටුමක් දක්වා දුරදිග ගිය බවත් වාර්තා වේ.
පළාත් සභාවේ ඒකාබද්ධ විපක්ෂයේ මන්ත්‍රීවරුන් සහ එක්සත් ජාතික පක්ෂ මන්ත්‍රීවරුන් අතර මෙම ගැටුම ඇති විය.
පළාත් සභාවේ එක්සත් ජාතික පක්ෂය නියෝජනය කරන මන්ත්‍රීවරුන් 11 දෙනෙකු විසින් මීට පෙර අදාළ විශ්වාසභංග යෝජනාව ඉදිරිපත් කර තිබු අතර එය ප්‍රතික්ෂේප වී තිබුණි.
කෙසේ වෙතත් අද දිනයේ පළාත් සභා ලේකම්වරයා විසින් එය න්‍යාය පත්‍රයට ඇතුළත් කිරීම හේතුවෙන් පළාත් සභාව තුළ මතභේදකාරී තත්ත්වයක් හටගත් බව වාර්තා වේ.
නොසන්සුන්තාව මධ්‍යයේ සභාපතිවරයා සභාව ලබන මස 8 වන දාට කල් තැබීමට කටයුතු කළත් විපක්ෂයේ මන්ත්‍රීවරු ඊට ඉඩ නොදුන්හ.
ගැටුමෙන් සභාවේ සෙන්කෝලයට ද හානි වී තිබේ.
COMMENTS