මීට සුළු මොහතකට සිම්බාබ්වේ පිතිකරුවන් සිය දෙවැනි ඉනිම අවසන් කළේ සියලු දෙනා දැවී ලකුණු 377 ක් ලබා ගනිමිනි. ලකුණු 10 ක මුල් ඉනිමේ වාසිය...
මීට සුළු මොහතකට සිම්බාබ්වේ පිතිකරුවන් සිය දෙවැනි ඉනිම අවසන් කළේ සියලු දෙනා දැවී ලකුණු 377 ක් ලබා ගනිමිනි.
ලකුණු 10 ක මුල් ඉනිමේ වාසියක් සමග දෙවැනි ඉනිම ඇරඹූ සිම්බාබ්වේ කණ්ඩායමේ පළමු කඩුලු 5 ලකුණු 59 ක් තුළ බිඳදැමීමට හේරත් ප්රමුඛ පන්දු යවන්නන් සමත් වුවද ඉන්පසු සිකන්දර් රාසා සහ පීටර් මුවර් හයවැනි කඩුල්ලට ලකුණු 86 ක් එක් කිරීමට සමත් විය. මුවර් ලකුණු 40 කට දැවීයාමෙන් පසුව රාසා සමග එක්වූ මැල්කම් වොලර් හත්වැනි කඩුල්ල සඳහා ලකුණු 144 ක් එක්කළේ ශ්‍රී ලංකා නායකයාගේ නළලත රැලි ගන්වමිනි. වොලර් 68 කට දැවීයාමෙන් පසු ඉනිමේ සාර්ථක පිතිකරුවා වූ සිකන්දර් රාසා ද ලකුණු 127 කට දැවී ගියේය.
පළමු ඉනිමේ නැංගුරම වූ ක්‍රෙග් අර්වින් (160) ආදර්ශයට ගනිමින් කඩාවැටී තිබූ සිම්බාබ්වේ දෙවැනි ඉනිම ගොඩනැංවූ රාසා සිය මංගල ටෙස්ට් ශතකය වාර්තා කළේය. පළමු ඉනිමේදී අර්වින් හා එක්ව නවවැනි කඩුල්ලට අර්ධ ශතක සබඳතාවයක් පැවැත්වූ ඩොනල්ඩ් තිරිපානෝ දෙවැනි ඉනිමේදී නායක ක්‍රිමර් හා එක්ව නවවැනි කඩුල්ල සඳහා ලකුණු 55 ක් එක් කළේ සිය කණ්ඩායම වෙනුවෙන් තමන්ට පිත්තෙන්ද යමක් කළහැකි බව පෙන්වමිනි. නායක ක්‍රිමර් අවාසනාවන්ත ලෙස අර්ධ ශතකයට ලකුනු දෙකක් තිබියදී දසවැනි කඩුල්ල ලෙස දැවී යද්දී ලකුණු පුවරුව කියවුනේ 377 ක් ලෙසයි.
පන්දු යැවීමේදී නැවතත් සාර්ථක වූ රංගන හේරත් කඩුලු 6 ක් දවාගැනීමට සමත් විය. එය ඔහුගේ ඉනිමක කඩුලු 5 ක් දවාගත් 31 වැනි අවස්ථාව මෙන්ම තරගයක කඩුලු 10 ක් දවාගත් 08 වැනි අවස්ථාව ද වේ. දිල්රුවන් පෙරේරා කඩුලු තුනක් සහ ලහිරු කුමාර එක් කඩුල්ලක් දවාගත්තේය.
මෙම තරගය ජයග්‍රහණය කිරීම සඳහා ශ්‍රී ලංකාවට ලකුණු 388 ක අසීරු ඉලක්කයක් ලැබී තිබේ. අවසන් වරට ශ්‍රී ලංකාව තුළදී ලකුණු 300 ට වඩා වැඩි ඉලක්කයක් හඹාගොස් ජයගෙන ඇතතේ 2006 වසරේදී දකුණු අප්‍රිකානුවන්ට එරෙහිවයි. එමෙන්ම මෙම තරගය සිම්බාබ්වේ කණ්ඩායම ජයගත හොත් එය ඔවුන් ශ්‍රී ලංකාවට එරෙහිව ජයගන්නා පළමු ටෙස්ට් තරගය වනු ඇත.
ශ්‍රී ලංකාවට තරගය ජයගැනීම සඳහා හෝ පරාජයේ අවමානයෙන් ගැලවීම සඳහා හෝ තවත් පැය 9 කට ආසන්න කාලයක් තිබෙන අතර ඕවර් 120 කට වැඩි ප්‍රමාණයකට මුහුණදීමට සිදුවේ.
COMMENTS