මූල්‍ය අපරාධ කොට්ඨාසය මඟින් මෙතෙක් සිදුකර ඇති පරීක්ෂණවලට අනුව සිදු වී ඇති මූල්‍ය වංචාවන් අතරින් රුපියල් බිලියන 272 ක පමණ වූ අතිවිශාල මුදලක්...
මූල්‍ය අපරාධ කොට්ඨාසය මඟින් මෙතෙක් සිදුකර ඇති පරීක්ෂණවලට අනුව සිදු වී ඇති මූල්‍ය වංචාවන් අතරින් රුපියල් බිලියන 272 ක පමණ වූ අතිවිශාල මුදලක් උපයාගත ඩුබායි බැංකුවක තැන්පත් කර ඇත්තේ හිටපු ප්‍රභූ දේශපාලනඥයකුගේ තරුණ මන්ත්‍රී පුතකු විසින් බව අනාවරණය කරගෙන තිබේ.
මෙම මුදල මෙරට අයවැය පියවීමට තරම් ප්‍රමාණවත් වූ එකක් බවට අදහසක් පළකරන මූල්‍ය අපරාධ කොට්ඨාසය එතරම් මුදලක් උපයා ගත්තේ කෙසේද යන්න සම්බන්ධවද තොරතුරු රැසක් අනාවරණය කරගෙන තිබේ. මූල්‍ය අපරාධ කොට්ඨාසයට ලැබුණ පැමිණිල්ලක් මත මේ සම්බන්ධව පරීක්ෂණ පවත්වන මූල්‍ය අපරාධ කොට්ඨාසය එම ගිණුමට අදාළව මූල්‍ය තොරතුරු හෙළිකර ගැනීම සඳහා පොලිස් පරීක්ෂණ කණ්ඩායමක් එම ඩුබායි බැංකුව වෙත ගොස් ඇතත් එම තොරතුරු එම බැංකුව විසින් පරීක්ෂණ අංශවලට ලබා දී නොමැති බව ද මූල්‍ය අපරාධ කොට්ඨාස ආරංචි මාර්ග සඳහන් කරයි.
විවිධ වංචාකාරී ක්‍රියාවලින් උපයා ගන්නා ලද රුපියල් බිලියන ගණන් වූ මුදල් පසුගිය කාලයේදී විදෙස් බැංකුවල තැන්පත් කිරීම සහ විදෙස් ව්‍යාපාරික ආයතන සමඟ ගනුදෙනු කිරීමට අදාළ සිදුවීම් 86 ක් සඳහා මූල්‍ය අපරාධ කොට්ඨාසය ජාත්‍යන්තර සහාය ඉල්ලා තිබේ. මේ වන විට එම ඉල්ලීම්වලින් පරීක්ෂණ 39 කට ජාත්‍යන්තර සහාය ලැබී තිබේ.
එක්සත් රාජධානිය මඟින් පරීක්ෂණ 13 කට සහාය ලැබී ඇත. සිංගප්පූරුව මඟින් තවත් පරීක්ෂණ 13 කට ද, ඉන්දියාව විසින් තවත් 13 කට ද, අමෙරිකාව විසින් පරීක්ෂණ 8 කට අදාළ මූල්‍ය ගනුදෙනු තහවුරු කර ගැනීම සඳහා සහාය ලබා දී තිබේ.
2015 ජනවාරි 21 වැනිදා අමාත්‍ය මණ්ඩල තීරණයකට අනුව එම වසරේ පෙබරවාරි මස 13 වැනි දින ගැසට් පත්‍රයක් මඟින් ප්‍රකාශයට පත්කර මූල්‍ය අපරාධ කොට්ඨාසය පිහිටවනු ලැබිණි.
අනතුරුව රුපියල් කෝටි සිය ගණන් වූ විවිධ මූල්‍ය වංචා, අපරාධවලට අදාළ පැමිණිලි 335 ක් මූල්‍ය අපරාධ කොට්ඨාසය වෙත ලැබී තිබුණි.
මෙම පැමිණිලි සම්බන්ධව පරීක්ෂණ පවත්වා නීතිමය ක්‍රියාමාර්ගවලට පිවිසීමට අදාළ උපදෙස් ඉල්ලා නීතිපතිවරයා වෙත පරීක්ෂණ ලිපිගොනු 89 ක් යවා තිබේ.
ඉන් නීතිපති උපදෙස් ලැබී පවරා ඇති නඩු සංඛ්‍යාව 12 ක් වෙයි. මහාධිකරණවල මෙම නඩු පවරා තිබේ.
මූල්‍ය අපරාධ කොට්ඨාසය වෙත පැමිණිලි ලැබී ඇති නමුත් ඒ යටතේ පරීක්ෂණ කිරීමට අදාළ නොවන පැමිණිලි 115 ක් ඊට අදාළ වෙනත් පරීක්ෂණ අංශ වෙත යවා ඇත.
තවදුරටත් විමර්ශන යටතේ පැමිණිලි 131 ක් සිදුවෙමින් පවතී.
දැනට මහාධිකරණවල පවරා ඇති නඩු 12 මෙසේ වෙයි.
දිවි නැඟුම සංවර්ධන දෙපාර්තමේන්තුවට අයත් මුදල් රුපියල් මිලියන 36 කට අධික ප්‍රමාණයක් සාපරාධී පරිහරණය කිරීම.
මෙම නඩුවේ විත්තිකරුවන් වන්නේ හිටපු අමාත්‍ය බැසිල් රාජපක්ෂ දිවි නැඟුම අධ්‍යක්ෂක ජෙනරාල් අමිත කිත්සිරි යන අයයි. කොළඹ මහාධිකරණය හමුවේ මෙම නඩුව විභාග වෙයි.
සතොසට අයත් මුදල් රුපියල් ලක්ෂ 28 කට අධික මුදලක් සාවද්‍ය පරිහරණය කළේ යැයි හිටපු අමාත්‍ය ජොන්ස්ටන් ප්‍රනාන්දු, සතොස හිටපු ක්‍රියාකාරී අධ්‍යක්ෂ තාජා මොහිදීන් ශාකීර් සහ ලක් සතොස හිටපු සභාපති නලීන් රුවන්ජීව ප්‍රනාන්දු යන අයට එරෙහිව මෙම නඩුව පවරා තිබේ.
විනිමය සුරැකුම්පත් කොමිෂන් සභාවේ මුදල් රුපියල් ලක්ෂ පනහක් තාරුණ්‍යයට හෙටක් සංවිධානයට ලබාදීමෙන් සාවද්‍ය පරිහරණය කළේ යැයි සුරැකුම්පත් හා විනිමය කොමිෂන් සභාවේ නියෝජ්‍ය අධ්‍යක්ෂ ජනරාල් ගජවීර ආරච්චිලාගේ ධම්මික මන්පීර පෙරේරා, එම කොමිෂන් සභාවේ හිටපු සභාපති නාලක හර්ෂජීව ගොඩහේවා සහ තාරුණ්‍යයට හෙටක් සංවිධානයේ ක්‍රීඩා අධ්‍යක්ෂ මොහොමඩ් නවුෆර් ඊබ්‍රාහිම් යන අයට එරෙහිව එම නඩුව පවරා තිබේ.
මීට අමතරව පීපල්ස් ලීසිං සමාගමට අයත් රුපියල් මිලියන 388 කට අධික මුදලක් සාවද්‍ය පරිහරණය කිරීම. එම සමාගමට අයත් රුපියල් මිලියන 202 කට අධික මුදලක් සහ එම සමාගමටම අයත් රුපියල් ලක්ෂ පනහකට අධික මුදලක් සාවද්‍ය පරිහරණය කිරීම සම්බන්ධයෙන් සෙනිත් ට්‍රස්ට් සමාගමේ හිටපු අධ්‍යක්ෂවරයකු වූ කිංස්ලි චන්දන ගුණවර්ධන, කිත්සෙන් සංජීව බණ්ඩාරනායක, වෙන්නප්පුලි ආරච්චිගේ සුසන්ත සහ වැල්ලවත්තආරච්චිගේ දුමිදු චතුරංග සිල්වා යන අයට එරෙහිව නඩු පවරා තිබේ.
විදුලි සංදේශ නියාමන කොමිෂන් සභාවට අයත් රුපියල් මිලියන 600 ක් සාවද්‍ය පරිහරණය කිරීම සම්බන්ධයෙන් හිටපු ජනාධිපති ලේකම් ලලිත් වීරතුංග, එම කොමිෂන් සභාවේ හිටපු අධ්‍යක්ෂ ජනරාල් අනූෂ පැල්පිට යන අයට ද රුපියල් මිලියන 64 ක අල්ලසක් ඉල්ලා ඉන් රුපියල් මිලියන 15 ක් ලබාගැනීම සහ ඉතිරි මුදල් ඉල්ලා තර්ජනය කිරීම සම්බන්ධයෙන් හිටපු බස්නාහිර පළාත් ප්‍රධාන අමාත්‍ය ප්‍රසන්න රණතුංග, මොරින් ස්ටෙලා රණතුංග, නරේෂ් කුමාර් ෆාරික් යන අයට එරෙහිව නඩු පවරා තිබේ.
උපයාගත් ආකාරය හෙළිකිරීමට අපොහොසත් වූ දේපොළ සම්බන්ධයෙන් මිලියන 200 ක ඉඩම් අක්කර 16 ක් මිලදී ගැනීම සම්බන්ධව බැසිල් රාජපක්ෂ මහතාට ද, Gowers කෝපරේට් සර්විසස් ආයතන හරහා රුපියල් මිලියන 30 ක මුදලක් විශුද්ධිකරණය කිරීම නාමල් රාජපක්ෂ මහතා ඇතුළු පස්දෙනෙකුට ද,
දිවි නැඟුම ඉසුරුමත් නිවාස ව්‍යාපෘතියක් සඳහා අනුමැතියකින් තොරව රුපියල් බිලියන 2.99 සාවද්‍ය පරිහරණය සම්බන්ධව බැසිල් රාජපක්ෂ මහතා ඇතුළු දෙදෙනකුට ද, දිවි නැඟුම සංවර්ධන දෙපාර්තමේන්තුවේ රුපියල් 20,400,000.00 ක් ලබාගෙන මැතිවරණ නීති උල්ලංඝනය කරමින් සාවද්‍ය පරිහරණය සම්බන්ධ බැසිල් රාජපක්ෂ මහතා ඇතුළු පිරිසකට ද මෙසේ නඩු පවරා තිබේ.
මේ වංචා සම්බන්ධව මූල්‍ය අපරාධ කොට්ඨාසය අත්අඩංගුවට ගත් පිරිස 56 කි. අධිකරණයට ඉදිරිපත් වූ පිරිස 10 දෙනෙක් වෙති.
COMMENTS