"ජනපතිට කියන්න" වෙබ් අඩවියට අනවසරයෙන් ප්‍රවිශ්ට වී ජනාධිපති මෛත්‍රිපාල සිරිසේන මහතා වෙත යොමු කරන ලද යෝජනා, දුක්ගැනවිලි, පෞද්ගලික...
"ජනපතිට කියන්න" වෙබ් අඩවියට අනවසරයෙන් ප්‍රවිශ්ට වී ජනාධිපති මෛත්‍රිපාල සිරිසේන මහතා වෙත යොමු කරන ලද යෝජනා, දුක්ගැනවිලි, පෞද්ගලික හඬ පට හා ලිපි ලේඛන ලක්ෂයකට අධික ප්‍රමාණයක් සොරකම් කිරීම සම්බන්ධයෙන් රහස් පොලිසිය විසින් අත්අඩංගුවට ගත් සැකකරුවකු ලබන 19 තෙක් රිමාන්ඩ් භාරයේ තබන ලෙස කොළඹ ප්‍රධාන මහෙස්ත්‍රාත් ලාල් බණ්ඩාර මහතා ඊයේ (9) නියෝග කළේය.
ජනාධිපති සහකාර ලේකම් චමීර කන්නන්ගර මහතා ඉකුත් 7දා රහස් පොලිසියේ අධ්‍යක්ෂවරයා වෙත කරන ලද පැමිණිල්ලකට අනුව සැකපිට අත්අඩංගුවට ගත් අහංගම, කතලුව පදිංචි අනුරුද්ධ හර්ෂාන් අබේසූරිය නමැති සැකරුවකු මෙසේ රිමාන්ඩ් භාරයට පත් කෙරිණි.
සැකකරුගෙන් ප්‍රශ්න කිරීමේදී තමා "ජනපතිට කියන්න" වෙබ් අඩවිය වෙත පිවිස ගවේශනය කිරීමේදී එම වෙබ් අඩවියට කිසිම අපහසුතාවකින් තොරව ඇතුළු වීමට හැකිවූ බවත් එම වෙබ් අඩවියේ ඇති අඩුපාඩු හා එය වෙත ලැබෙන මහජන පැමිණිලි සම්බන්ධයෙන් ක්‍රියාමාර්ගයක් නොගැනීම දැනුවත් කිරීම සඳහා අදාළ ක්‍රියාව සිදු කළ බවත් පැවැසූ බවද රහස් පොලිසිය අධිකරණය වෙත දන්වා සිටියේය.
සැකකරු භාරයේ තිබූ පරිගණක උපාංග, දත්ත තොගයක්ද රහස් පොලිසිය භාරයට ගෙන තිබිණි.
මෛත්‍රීපාල සිරිසේන මහතා ජනපති වී වසරක් සපිරීම නිමිත්තෙන් ජනතාවගේ ප්‍රශ්න කෙළින්ම ජනපතිට යොමු කිරීම සඳහා ‘ජනපති හද බිම - ජනපතිට කියන්න‘ වැඩසටහන ඇරැඹීය.
ඒ අනුව ඕනෑම දුරකතනයකින් 1919 අංකය අමතා අවශ්‍ය භාෂාව තෝරාගෙන අංක දෙක ඇතුළු කර ‘ජනපතිට කියන්න‘ සේවාව සමග සම්බන්ධ විය හැකි අතර තැපැල් පෙට්ටිය 123 කොළඹ ලිපිනයෙන් තැපැල් මාර්ගයෙන් ද, tell@presidentsoffice.lk විද්‍යුත් ලිපිනයෙන් ද, tell.president.gov.lk වෙබ් අඩවිය ඔස්සේ ද, ස්මාර්ට් ජංගම දුරකතන ඔස්සේ ජනපතිට කියන්න ඇප්ලිකේෂන්ය මාර්ගයෙන් ද මෙම සේවාව හා සම්බන්ධ විය හැකි බව ජනපති ලේකම් කාර්යාලයය සඳහන් කරයි.
COMMENTS