මෙරට ත්රස්තවාදය පරාජය කිරීමේදී බලවත්වූයේ ධර්මයේ බලය බවත් බෞද්ධ දර්ශනය තුළ වන අවිහිංසාවදී බලවේගය ත්‍රස්තවාදීන්ගෙන් රට මුදාගැනීමට ඉහවල්වූ බ...
මෙරට ත්රස්තවාදය පරාජය කිරීමේදී බලවත්වූයේ ධර්මයේ බලය බවත් බෞද්ධ දර්ශනය තුළ වන අවිහිංසාවදී බලවේගය ත්‍රස්තවාදීන්ගෙන් රට මුදාගැනීමට ඉහවල්වූ බවත් නගර හා බස්නාහිර සංවර්ධන අමාත්‍ය පාඨලී චම්පික රණවක මහතා පවසයි.
අමාත්‍යවරයා මේ බව ප්‍රකාශ කළේ අපවත්වී වදාල අතිපූජ්‍ය ගංගොඩවිල සෝමහිමියන් අනුස්මරණය කරමින් හෙළතුරුණු සවිය සංවිධානය මගින් කොළඹ 07, තුරග තරග පිටියේ සංවිධානය කර තිබූ ගුණානුස්මරණ උත්සව අවස්ථාවකට සහභාගී වෙමිනි.
එහිදී වැඩිදුරටත් අදහස් දැක්වූ අමාත්‍යවරයා මෙසේද පැවසීය.
" ගංගොඩවිල සෝම ස්වාමීන් වහන්සේ, කුරා කුහුඹුවකුටත් හානියක් නොකොට ඉතාම අවිහිංසා වදනේ බලයෙන් තමයි ඒ මහා සමාජ වෙනස කරන්නට කටයුතු කළේ. විශේෂයෙන්ම උන්වහන්සේ කළ දේශපාලන බලපෑම අපි අමතක කළ යුතු නැහැ. ලක්‍ෂ පහ හමාරක් ජනතාව, බොහෝම දැන උගත් ජනතාව එදා 2004 වර්ෂයේදී අපේ ස්වාමීන්වහන්සේලාට ඡන්දය දීමෙන් තමයි මේ රටේ එතෙක් කල් පැවතිච්ච මේ ද්වි පක්‍ෂ තට්ටුමාරු ක‍්‍රමය ජාතික දේශපාලයකට පෙරළන්න පුළුවන් වුනේ. සෝම ස්වාමීන්වහන්සේ වෙනුවෙන් උන්වහන්සේ අැති කරපු ඒ ධාර්මික බලවේගයේ අනුහසින් මේ රටේ දැන උගත් ජනතාව ප‍්‍රධාන පක්‍ෂ දෙකේ වියගහෙන් ගැලවිලා ස්වාධීනව හිතන්න, ජාතික අරමුණුවලින් වෙනුවෙන් පෙරට එන්න ගත්ත තීරණය නිසා තමයි රට වෙනස් වුනේ. ත්රස්තවාදය පරාජය කරන්න පුළුවන් වුනේ. ශ‍්‍රී ලංකා නිදහස් පක්ෂයේ කවුරුවත් ත්රස්තවාදය පරාජය කරන්න පුළුවන් කියලා කිව්වේ නැහැ. එක්සත් ජාතික පක්ෂයේ කවුරුවත් ත්රස්තවාදය පරාජය කරන්න පුළුවන් කියලා කිව්වේ නැහැ. අද හුගාක් දෙනෙක් ඒකට උරුමකාරයෝ වෙලා තියෙනවා.
රටේ ඒකීයභාවය ආරක්‍ෂා කරගන්න ඕනේ කියලා කිව්වේ ඒ සෝම ස්වාමීන්වහන්සේගේ ධාර්මික බලවේගය. ඒ බලවේගය නිසා තමයි ඒ පක්‍ෂවලට වෙනස් වෙලා අද අපිට නිදහස අත්පත්වෙලා තියෙන්නේ. අද නොයෙක් දෙනා නොයෙක් තැන්වල නැවත වතාවක් ඒ බෙදුම්වාදී අදහස ගෙනයන්න උත්සාහ කරනවා. මේ ළඟදි උතුරු පළාතේ පළාත් සභාව බෞද්ධ සිද්ධස්ථාන තහනම් කිරීමේ යෝජනාවක් සම්මත කරලා තියෙනවා. මේකෙන් පේනව ඒ ගොල්ලන්ගේ හිත් ඇතුලේ කැකෑරෙන වෛරය කොයිතරම් ද කියලා. නමුත් වෙනත් කිසිම පලාත් සභාවක් ඒ දෙමළ ජනයාගේ අයිතිවාසිකම් යටපත් කරන විදිහේ යෝජනා සම්මත කරලා නැහැ.
නන්දිකඩාල්වල ජයගත්තෙත් ධර්මයේ බලවේගයයි. අනාගතයේ එවැනි දෑ සිදුකරන්න සිටින සියළු දෙනාටම කියන්න තියෙන්නේ, මේ රටේ වසර 2300ක් තිස්සේ රැගෙන ආපු මේ උරුමය අපරාජිතව අපේ නව පරම්පරාවල් ගෙන යන බවයි. ඒ නව පරම්පරාවේ බලය ඔබ තමයි දුවේ පුතේ. ඒ නිසා තවත් වසර දහස් ගණනක් මේ සම්බුද්ධ ශාසනයේ චිරස්තිථියත් ඒ වගේම වෙනත් සියළුම ඕනම දැක්මක් අදහන්න මිනිසුන්ට තිබෙන අයිතියත් ඒ අයිතිය වෙනුවෙන් පෙනී සිටින නිවහල් චින්තකයෝ හැටියට ඔබ සියළු දෙනාම නැගී සිටලා ඉදිරි කාලයේදීත් මේ රට ඉදිරියට ගෙනයන්න සෑම ආකාරයකම අන්තවාදයන්, මූලධර්මවාදයන් ඒ වගේම හිංසාවාදයන් පරාජය කරලා මේ රට ඒ අවිහිංසාවාදයේ තෝතැන්න බවට පත් කරන්නට ඔබ හැම කැපවෙයි කියලා බලාපොරොත්තු වෙනවා".
COMMENTS