ජනවාරි මස 01 වැනිදා සිට ලොතරැයි පතක මිල රුපියල් 30ක් දක්වා ඉහළ දැමීමට කටයුතු කළහොත් එදින සිට දිවයින පුරා ලොතරැයි පත් අලෙවි කිරීමෙන් වැළකී ...
ජනවාරි මස 01 වැනිදා සිට ලොතරැයි පතක මිල රුපියල් 30ක් දක්වා ඉහළ දැමීමට කටයුතු කළහොත් එදින සිට දිවයින පුරා ලොතරැයි පත් අලෙවි කිරීමෙන් වැළකී සිටින බව සමස්ත ලංකා ලොතරැයි අලෙවි නියෝජිතයන්ගේ සංගමය අවධාරණය කරයි.
ලොතරැයි පතක මිල ඉහළ දැමීමට ආණ්ඩුව ගෙන ඇති තීරණය පිළිබඳ දැනුවත් කිරීම සඳහා ඊයේ (29) කොළඹදී කැඳවා තිබූ මාධ්‍ය හමුවකට එක්වෙමින් එහි සභාපති ක්‍රිෂාන්ත මාරඹගේ මහතා මේ බව සඳහන් කළේය.
තවදුරටත් විරෝධය පළ කිරීම සඳහා ජනවාරි මස 03 වැනිදා කොළඹ කොටුව දුම්රියපොළ ඉදිරිපිටදී දැවැන්ත උද්ඝෝෂණයක් පවත්වන බවත් ඒ සඳහා සියලු ලොතරැයිපත් අලෙවිකරුවන්ට සහ පාරිභෝගික ජනතාවට ආරාධනා කරන බවත් හෙතෙම සඳහන් කෙළේය.
ආණ්ඩුව තම ඉල්ලීම් නොසලකා හරිමින් ලොතරැයි මිල වැඩි කළහොත් තමන් ඉල්ලුම් කළ කොමිස් මුදල ලබාදිය යුතු අතර ලොතරැයි දිනුම් සඳහා ලබාදෙන මුදල වැඩිකළ යුතු බවද මාරඹගේ මහතා පෙන්වා දුන්නේය.
මේ වන විට ලොතරැයිපත් වර්ග 20කට වැඩි සංඛ්‍යාවක් අලෙවි වන අතර ඒ අනුව දිනකට ලොතරැයි පත් ලක්‍ෂ 45ක් පමණ අලෙවි වෙයි.
ආණ්ඩුවට ඉන් මිලියන විස්සක් පමණ ආදායමක් හිමිවෙන බවත් මහජන සුබසාධනය සඳහා ආරම්භ කළ ලොතරැයි පත මඟින් ජනතාවට ලැබිය යුතු ප්‍රතිලාභ අහිමි වෙමින් පවතින බවත් පැවසූ මාරඹගේ මහතා හතළිස් දහසකට ආසන්න පිරිසක් ලොතරැයි පත් අලෙවි කරන බවත් ඒ අය ගැනත් ආණ්ඩුව සිතිය යුතු බවත් කියා සිටියේය.
COMMENTS