ඊයේ (23) පස්වරුවේ හොර දැව තොගයක් වාහනයකින් ගෙනවිත් දමන බවට ලැබුණු තොරතුරක් පිළිබඳව සොයා බැලීමට තම වසමට ගිය ග්‍රාම නිලධාරිවරයාට එම දැව තොගය...
ඊයේ (23) පස්වරුවේ හොර දැව තොගයක් වාහනයකින් ගෙනවිත් දමන බවට ලැබුණු තොරතුරක් පිළිබඳව සොයා බැලීමට තම වසමට ගිය ග්‍රාම නිලධාරිවරයාට එම දැව තොගය ගෙන ආ පිරිස පහර දී ඇති අතර ඔහු මේ වනවිට ගලේවෙල රෝහලෙහි ප්‍රතිකාර ලබයි.
මෙලෙස පහර කැමට ලක්ව ඇත්තේ ගලේවෙල ප්‍රාදේශීය ලේකම් කොට්ඨාසයේ පුවක්පිටිය හා නබඩගහවත්ත වසම් දෙකේ සේවය කරන ග්‍රාමනිලධාරීවරයා වන වයි.එම්.ඩබ්ලිව්. ධර්මවර්ධන බණ්ඩාර මහතායි.
පහරදුන් බවට සැකපිට මේ වනවිට පුද්ගලයන් 03දෙනකු හා ඉරන ලද විවිධ වර්ගවලට අයත් දැව තොගයක් ද පොලිස් භාරයට ගත් බව පොලිසිය කියයි.
ග්‍රාමනිලධාරීවරයා ප්‍රකාශ කළේ කාලයක සිට තම වසමේ නීති විරෝධී අන්දමින් දැව ජාවාරම් සිදුවන බවත් අවස්ථා කීපයකදී තමන් මෙම ජාවාරමට නීතිය ක්රියාත්මක කර තිබෙන බවත්ය.
ඊයේ තමන් වසමේ සිටින අවස්ථාවේ ගම්වාසියෙකු තමන්ට දුරකතනයෙන් මෙලෙස දැව තොගයක් වාහනයකින් බාන බව පැවසූ බවත් ඒ අනුව තමන් අදාළ ස්ථානයට ගොස් බලද්දී එම ක්‍රියාව සත්‍ය බව දැකගන්නට හැකි වූ බවත් පසුව තමන් පොලිසියට ඇමතුමක් ගැනීමට උත්සාහ කරද්දී දැව බාමින් සිටි 05දෙනකු තමාට පහරදුන් බවත් පහර කෑමට ලක්වූ ග්‍රාම නිලධාරීවරයා පැවසීය.
ඔහු සතුව තිබු රාජකාරි දිනපොත හා යතුරු කැරැල්ලක් පහරදුන් පිරිස පැහැරගෙන ඇති අතර සිද්ධිය සිදුවූ ස්ථානය අසල සිටි නිවැසියන් විසින් ඔහුව බේරාගෙන රෝහල්ගත කර තිබේ.
එම චෝදනාව පිළිබඳව මේ වනවිට අත්අඩංගුවට පත්ව සිටින පහරදුන් බව කියන පුද්ගලයාගේ පුතෙකු වූ මොහොමඩ් නපිස් මහතාගෙන් විමසීමේදී ඔහු ප්‍රකාශ කළේ මෙම ග්‍රාමනිලධාරීවරයා නිතර නිතර තම පියාගේ වැඩවලට විරුද්ධව නීතිය හමුවට අරගෙන යන බවයි.
ඔහු වැඩිදුරටත් අදහස් දක්වමින් කියාසිටියේ තමන් කිසිවිටෙක අදාළ ග්‍රාමනිලධාරීවරයාට පහර නුදුන් බවයි.
සිද්ධිය පිළිබඳ වැඩිදුර විමර්ශන දඹුල්ල පොලීසිය විසින් සිදුකරයි.
ඡායාරූප පහතින්.
දඹුල්ල - කාංචන කුමාර ආරියදාස
COMMENTS