යාපනය ඇතුළු උතුරු පළාතේ මේ දිනවල සිදුවන සුළු සුළු ප්‍රචණ්ඩකාරී ක්‍රියා යුද්ධයක් දක්වා වර්ධනය වීමට ඉඩ නොදීමට රජය හා ජනතාව දැඩි අවබෝධයකින් ය...
යාපනය ඇතුළු උතුරු පළාතේ මේ දිනවල සිදුවන සුළු සුළු ප්‍රචණ්ඩකාරී ක්‍රියා යුද්ධයක් දක්වා වර්ධනය වීමට ඉඩ නොදීමට රජය හා ජනතාව දැඩි අවබෝධයකින් යුතුව ක්‍රියා කළ යුතුව ඇතැයි උතුර පළාත් සෞඛ්‍ය අමාත්‍ය පී. සත්‍යලිංගම් මහතා පැවසීය.
අමාත්‍යවරයා මේ බව කියාසිටියේ යාපනය විශ්වවිද්‍යාලයේ සිසුන් දෙදෙනෙකු පොලීසිය විසින් වෙඩිතබා මරාදැමුවේ යැයි කියන සිද්ධියක් සම්බන්ධයෙන් විරෝධය පළකිරීම සදහා මේ දිනවල උතුරු පළාතේ සිදු කෙරෙන යම් යම් ප්‍රචණ්ඩ ක්‍රියා නිසා ඉදිරියේදී ඇතිවිය හැකි තත්ත්වයන් ගැන තොරතුරු දැනගැනීමට අමාත්‍යවරයා විමසූ අවස්ථාවේදීයි.
එහිදී අදහස් දැක්වූ අමාත්‍යවරයා ප්‍රකාශ කළේ මේ දිනවල උතුරේ සිදුවන ක්‍රියා පිළිබදව වැරදි ආකල්පයකින් බැලීමටත් සාමය කඩ කිරීමට අවශ්‍ය පුද්ගලයින්ට උඩගෙඩි දීමටත් ක්‍රියා නොකරන ලෙස තමන් දකුණේ ජනතාවගෙන් ඉල්ලා සිටින බවත් උදාවී ඇති සාමය ස්ථාපිත කිරීමට සියළු දෙනාම කැප විය යුතු බවත්ය.
එමෙන්ම යාපනය විශ්වවිද්‍යාලයේ සිසුන් දෙදෙනාට වෙඩි තැබීමේ සිද්ධිය පිළිබදව රජය අපක්ෂපාතී පරීක්ෂණයක් පවත්වා වැරදිකරුවන්ට නිසි දඩුවම් ලබාදීමටත් මෙවැනි සිද්ධීන් යළි ඇති නොවීමටත් වගබලා ගත යුතු බව ද ඔහු පැවසීය.
එය එසේ වුවහොත් උතුරු පළාතේ සිදුවන ප්‍රචණ්ඩකාරී ක්‍රියා අවම වන බවට විශ්වාසය පළකළ අමාත්‍යවරයා සාමකාමී වාතාවරණය තවදුරටත් පවත්වාගෙන යාමට නම් සැකකටයුතු සිදුවීම් සිදුනොවීමට වගබලාගැනීම ඉතා වැදගත් බව අවධාරණය කළේය.
දිනසේන රතුගමගේ
COMMENTS