කිලිනොච්චිය, පරවිපරච්චාන් ප්‍රදේශයේ පිහිටි යුධ හමුදා කඳවුර සීමාව තුළ පවතින සිය මුල් ඉඩම් නිදහස් නොකරන්නේනම් මියයන තුරු උපවාස කරන බව පවසා ප...
කිලිනොච්චිය, පරවිපරච්චාන් ප්‍රදේශයේ පිහිටි යුධ හමුදා කඳවුර සීමාව තුළ පවතින සිය මුල් ඉඩම් නිදහස් නොකරන්නේනම් මියයන තුරු උපවාස කරන බව පවසා පරවිපරච්චාන් වැසියන් පිරිසක් කඳවුර ඉඳිරිපිට මාරාන්තික උපවාසයක් ආරම්භ කර තිබේ.
උපවාසයට එක්වු පරවිපරච්චාන් ජනතාව ප්‍රකාශ කළේ පරවිපරච්චාන් යුධ හමුදා කඳවුර පවතින සීමාව තුළ තමන්ගේ මුල් ඉඩම් අක්කර දහයක් පමණ පවතින බවත් එහි යුධ හමුදා කඳවුර පිහිටුවා තිබීම හේතුවෙන් සිය මුල් ඉඩම් මේ වන විට තමන්ට අහිමිවී ඇති බවත්ය.
යුධ හමුදා කඳවුර ඉවත්කොට අදාළ ඉඩම් කඩිනමින් නැවත තමන් වෙත ලබාදිය යුතු බවට ඉඩම් අයිතිකරුවන් ඉල්ලා සිටින අතර, යුධ හමුදා කඳවුර ඉවත්කොට සිය ඉඩම් නැවත පවරාදෙන තෙක් තමන් මාරාන්තික උපවාසයක නිරතවන බවද උපවාසකරුවන් පවසයි.
උපවාසකරුවන් වැඩිදුරටත් ප්‍රකාශ කර සිටියේ පරවිපරච්චාන් යුධ හමුදා කඳවුර ඉවත්කොට සිය මුල් ඉඩම් නිදහස් කරදෙන ලෙස ඉල්ලා තමන් පසුගිය මාසයේ දින 05ක් අඛණ්ඩ විරෝධතාවයක් පැවැත්වු බවත් එම විරෝධතාවය පැවති අවස්ථාවට පැමිණි විපක්ෂනායක ආර්. සම්බන්ධන් මහතා ජනාධිපතිවරයා, අගමැතිවරයා හා ආරක්ෂක ලේකම්වරයා සමඟ සාකච්ජා කොට සති 02ක කාලයකදි සිය ඉඩම් නිදහස් කරදෙන බවට පොරොන්දු වූ බවත්ය.
විපක්ෂනායකවරයා ලබාදුන් පොරොන්දුව ද මෙතෙක් ඉටුනොවු බැවින් තම ඉඩම් නිදහස් කරගැනීම වෙනුවෙන් තමන් මාරාන්තික උපවාසයක් ආරම්භ කළ බවත් සිය ඉල්ලීම් ඉටුවන තෙක් සිය උපවාසය අත්නොහරින බවත් ඔවුන් පැවසීය.
ඡායාරූප පහතින්.
වන්නි - රොමේෂ් මධුෂංඛ
COMMENTS