කෝටිපතියා පැහැරගැනීමේ සුලමුල හෙළිවෙයි

රුපියල් කෝටි 2ක කප්පමක් ඉල්ලා බම්බලපිටියේ කෝටිපති ව්‍යාපාරික මොහොමඩ් සුලෙයිමාන් මහතා පැහැරගැනීම සැලසුම් කර ඇත්තේ ඔහුගේ ව්‍යාපාරික ස්ථානයේ...

රුපියල් කෝටි 2ක කප්පමක් ඉල්ලා බම්බලපිටියේ කෝටිපති ව්‍යාපාරික මොහොමඩ් සුලෙයිමාන් මහතා පැහැරගැනීම සැලසුම් කර ඇත්තේ ඔහුගේ ව්‍යාපාරික ස්ථානයේ මූල්‍ය කටයුතු බාරව සිටි පුද්ගලයා බවට තොරතුරු අනාවරණය කරගෙන තිබේ.

මෙම සිද්ධිය පිළිබඳව මාධ්‍ය දැනුවත් කිරීමට අද (02) පැවති මාධ්‍ය හමුවේදී නියෝජ්‍ය පොලිස්පති අජිත් රෝහණ මහතා ඒ පිළිබඳ තොරතුරු මාධ්‍ය වෙත ඉදිරිපත් කළේය.

ෆාකිර් අස්ලම් මොහොමඩ් නැමැති මෙම පුද්ගලයා වසර 8ක් තිස්සේ අදාළ ව්‍යාපාරිකයා ළඟ සේවය කර ඇති බවත් ඔහුගේ සුවච කීකරුකම නිසා මෙම ව්‍යාපාරිකයා විසින් එහි මුදල් කටයුතු එම සේවකයාට පවරා ඇති බවත් මාධ්‍ය හමුවේදී නියෝජ්‍ය පොලිස්පතිවරයා පැවසීය.

තම ස්වාමියාගේ ව්‍යාපාරය සතුව විශාල මුදලක් ගැවසෙන බව හොඳින්ම හඳුනා ගැනීමෙන් පසු ඔහු මෙම සැලසුම සකස් කර ඇති බවත්, ඒ අනූව කප්පම ගැනීම ඔහු විසින් සැලසුම් කර ඇති බවත්, ඊට සම්බන්ධ සැකකරුවන් 8 දෙනෙකු මේවන විට අත්අඩංගුවට ගෙන ඇති බවත්, ඔහු එහිදී කියා සිටියේය.

පසුගියදා ඇතිවූ ගංවතුර අවස්ථාවේදී මෙම සැකකරුගේ නිවස හානි වී ඇති බවත්, එම අවස්ථාවේදී එය යළි සාදා ගැනීමට ව්‍යාපාරිකයා විසින් රුපියල් ලක්ෂ 5ක්ද ව්‍යාපාරිකයාගේ බිරිඳ විසින් තවත් රුපියල් 50,000ක්ද මෙම සේවකයා වෙත ලබාදී ඇති බවත් අජිත් රෝහණ මහතා තවදුරටත්ම පැවසීය.

ව්‍යාපාරිකයා පැහැරගැනීමේ සැලසුම මාස එකහමාරක සිට සැලසුම් කර ඇති අතර පැහැර‍ගැනීමට යොදාගත් වාහනය ද ඊට දින දෙකකට පෙර රුපියල් 43,000ක් ගෙවා කුලියට ලබාගත් එකක් බවත්, අනාවරණය වී ඇත.

එම මුදල ගෙවා ඇත්තේ පැහැර ගැනීමට සම්බන්ධ වූ පුද්ගලයෙකුගේ බිරිඳකගේ රන් ආභරණ උකස් තැබීමෙන් බවත්, වාහනය තුළදී ව්‍යාපාරිකයාගේ හිසට මොට ආයුධයකින් සිදුකළ පහරදීමක් නිසා එම අවස්ථාවේදීම මියගොස් ඇති බවත්, පරීක්ෂණවලදී අනාවරණය වී තිබේ.

පැහැරගත් පුද්ගලයින්ගේ අරමුණ රුපියල් කෝටි දෙකේ කප්පම ගැනීම වුවත් හිසට එල්ල කළ පහරින් ව්‍යාපාරිකයා මියැදෙයි ඔවුන් කිසිසේත් නොසිතා ඇතැයි සඳහන්ය.

ව්‍යාපාරිකයා පැහැරගත් දිනට පසුදින මෙම සේවකයා ව්‍යාපාරික ස්ථානයට පැමිණ ඇති බවත්, එසේ පැමිණ ඇත්තේ විදේශගතව සිටි එම ව්‍යාපාරිකයාගේ පියා දිවයිනට පැමිණි පසුදාම සිය පුතා නිදහස් කර ගැනීමට අදාළ මුදල ලබාදෙනු ඇතැයි විශ්වාසයෙන් බවද පොලීසිය අනාවරණය කරගෙන ඇත.

මෙසේ අත්අඩංගුවට ගත් 8 දෙනාගෙන් 6 දෙනෙකුම මුස්ලිම් ජාතිකයින් බවද මෙම සිද්ධිය පිටුපස ජාතිවාදී ගැටළුවක් නැති බවද එම මාධ්‍ය හමුවේදී අජිත් රෝහණ මහතා කියා සිටියේය.

පොලිසියට විවිධ චෝදනා එල්ල වෙද්දී මෙම ඝාතනයට සම්බන්ධ සැකකරුවන් ඉතා කෙටි කලක් තුළ අත්අඩංගුවට ගැනීමට පොලීසිය සමත් වූ බවද ඒ මහතා පෙන්වාදුන්නේය.

මේ අතර මෙම ඝාතනය සම්බන්ධයෙන් අත්අඩංගුවට ගත් සැකකරුවන් 8 දෙනා පැය 48ක කාලයක් රඳවාගෙන ප්‍රශ්න කිරීමට අධිකරණය අවසර දී තිබේ.