දින 05 ක් පුරාවට කිළිනොච්චියේ පරෙවිපන්ජාන් පළාතේ වැසියන් පිරිසක් තමන්ට අහිමි වූ ඉඩම් ආපසු ලබාදෙන ලෙස ඉල්ලමින් පවත්වාගෙන ගිය මාරාන්තික උපවා...
දින 05 ක් පුරාවට කිළිනොච්චියේ පරෙවිපන්ජාන් පළාතේ වැසියන් පිරිසක් තමන්ට අහිමි වූ ඉඩම් ආපසු ලබාදෙන ලෙස ඉල්ලමින් පවත්වාගෙන ගිය මාරාන්තික උපවාසය ඊයේ (11) අවසන් කළහ.
ඒ , ඊයේ වනිතා කටයුතු පිළිබද රාජ්‍ය ඇමතිනී විජයකලා මහේස්වරන් මහත්මිය උපවාසකරුවන් හමු වී කළ සාකච්ඡාවකින් පසුවයි.
අමාත්‍යවරිය එහිදී ඉදිරි මාස තුන ඇතුළතදී ඔවුන්ට අයත් ඉඩම් ආපසු ලබාදෙන බවට පොරොන්දු වීමත් සමඟ ඔවුන් උපවාසය අත්හළේය.
මෙම උපවාසය දියත් කොට තිබුණේ උතුරේ ආරක්ෂක අංශ විසින් කිළිනොච්චියේ පවුල් 45 කට පමණ අයත් ඉඩම් අක්කර 140 ක් පමණ අත්පත් කරගෙන සිටින බවට චෝදනා කරමිනි.
එම ස්ථානයට පැමිණි විජයකලා මහේස්වරන් රාජ්‍ය අමාත්‍යවරිය කියාසිටියේ තමන් කිළිනොච්චියේ යුද හමුදා බලධාරීන් සමග සාකච්ඡා කිරීමට පෙර මෙම ඉඩම් ප්‍රශ්නය ගැන ජනාධිපතිවරයා සමග කතා කළ බවයි.
අදාළ ඉඩම් රජයට අයිති නොමැති නිසා ඒවායෙහි අයිතිකරුවන්ට කඩිනමින් ලබාදීමටත්, යුද හමුදාවට රජයේ වෙනත් ඉඩමක් ලබාදීමටත් පියවර ගන්නා බවටත් ජනාධිපතිවරයා තමන්ට උපදෙස් ලබාදුන් බව අමාත්‍යවරිය එහිදී පැවසීය.
ඒ අනුව තමන් කිළිනොච්චියේ යුද හමුදා බලධාරීන් සමග සාකච්ඡා කළ අවස්ථාවේදී රජයෙන් ලැබෙන ඉඩමට මාස දෙකක් ඇතුළත යාමට හමුදා බලධාරීන් පොරොන්දු වූ බවද අමාත්‍යවරිය සදහන් කළාය.
ඉඩම් නොමැති උතුරේ වැසියන්ට ඉඩම් ලබාදීමේ වැඩ පිළිවෙළක් රජය විසින් අරඹා ඇති බවත් උතුරේ වැසියන්ගෙන් අත්පත් කරගෙන ඇති සියලුම ඉඩම් ආපසු ලබාදෙන දවස පැහැදිලි වශයෙන් ප්‍රකාශ කිරීමට හැකියාවක් නැතත් වත්මන් රජයට ඉතිරි වී ඇති ඉදිරි වර්ෂ හතර ඇතුළතදී එම ඉඩම් සියල්ලම ආපසු ලබාදෙන බවත් අමාත්‍යවරිය වැඩිදුරටත් කියා සිටියාය.
වන්නි - රොමේෂ් මධුෂංඛ
COMMENTS