වනජීවි දෙපාර්තමේන්තුව භාරයේ රඳවාගෙන සිටින අලි ඇතුන් වහා නිදහස් කර මහනුවර ඇසළ පෙරහර මංගල්‍ලයට සහභාගිවීමට අවස්ථාව ලබාදෙන ලෙස ඉල්ලමින් ඇත් ගො...
වනජීවි දෙපාර්තමේන්තුව භාරයේ රඳවාගෙන සිටින අලි ඇතුන් වහා නිදහස් කර මහනුවර ඇසළ පෙරහර මංගල්‍ලයට සහභාගිවීමට අවස්ථාව ලබාදෙන ලෙස ඉල්ලමින් ඇත් ගොව්වන් පිරිසක් ඊයේ (09) ශ්‍රි දළදා මාලිගාවේ මහා මඵව ඉදිරිපිට සත්‍යග්‍රහයක නිරත විය.
හීලෑ අලි ඇතුන් සුරැකීමේ සංවිධානයේ සභාපති පූජ්‍ය මාගල්කන්දේ සුදත්ත හිමියන් සහ මෙවර දළදා පෙරහර මංගල්‍ලය සඳහා සහභාගිවන අලි ඇතුන්ගේ ඇත් ගොව්වන් රැසක් මීට සහභාගී වූ අතර එහිදී ඔවුන් කියා සිටියේ ජනාධිපතිවරයා හෝ අග්‍රාමාත්‍යවරයාගේ ලිඛිත පොරොන්දුවක් ලැබෙන තුරු මෙම සත්‍යග්‍රහය අවසන් නොකරන බවයි.
මේ සම්බන්ධයෙන් අදහස් දැක්වූ ඇත් ගොව්වන් කියාසිටින්නේ මේ වනවිට අලි ඇතුන් 39 දෙනෙකු වනජීවී දෙපාර්තමේන්තුවේ රක්ෂිත සහ රැඳවුම් මධ්‍යස්ථානවල ගාල් කර ඇති බවත් එම නිසා තම ජීවන වෘත්තියටද බලපෑම් එල්ලවී ඇති බවත්ය.
සත්‍යග්‍රහය පිළිබඳව අදහස් වනජීවී අමාත්‍ය ගාමිණී ජයවික්‍රම පෙරේරා මහතා ප්‍රකාශකළේ නීති විරෝධීව ළඟ තබා ගත් බව කියන අලින් අධිකරණ නියෝගයකට අනුව වනජීවී භාරයට ගත් බවත් අලි ඉල්ලා උද්ඝෝෂණ කළත් නීතිය අතට ගැනීමට ඉඩදීමට කිසිවිටක තමා සුදානම් නැති බවත් අදාළ පිරිස් පෙරහර කඩාකප්පල් කිරීමට ගෙනයන මෙම වැඩපිළිවෙළ වත්මන් රජය තරයේ ප්‍රතික්ෂේප කරන බවත් ය.
කෙසේවෙතත් ඊයේ රාත්‍රියේ දෙවන කුඹල් පෙරහැර අලි ඇතුන් සහිතව වීදි සංචාරය කෙරුණි.
COMMENTS