යුද හමුදාපතිගේ නිල කාළය වසරකින් දීර්ඝ කරයි

යුද හමුදාපති ලුතිනන් ජෙනරල් ක්‍රිෂාන්ත ද සිල්වා මහතාගේ නිල කාලය තවත් වසරකින් දීර්ඝ කර තිබේ. ජනාධිපති මෛත්‍රීපාල සිරිසේන මහතා යුද හමුදාපති...

යුද හමුදාපති ලුතිනන් ජෙනරල් ක්‍රිෂාන්ත ද සිල්වා මහතාගේ නිල කාලය තවත් වසරකින් දීර්ඝ කර තිබේ.

ජනාධිපති මෛත්‍රීපාල සිරිසේන මහතා යුද හමුදාපති ජෙනරල් ක්‍රිෂාන්ත ද සිල්වා මහතාගේ සේවා කාලය මේ මස 22 වන දා සිට තවත් වසරකින් දීර්ඝ කර ඇතැයි හමුදා ප්‍රකාශක බ්‍රිගේඩියර් ජයනාත් ජයවීර මහතා පැවසීය.

පසුගිය වසරේ පෙබරවාරි මස 20 වන දා ඔහු හමුදාපති ධූරයට පත් කළේ, ජනාධිපති මෛත්‍රීපාල සිරිසේන මහතා විසිනි. ලුතිනන් ජෙනරල් ක්‍රිෂාන්ත ද සිල්වා මහතා 2013 වසරේ අගෝස්තු මස සිට 2014 මැයි දක්වා යුද හමුදා මාණ්ඩලික ප්‍රධානී ලෙස කටයුතු කළේ ය.

ඔහු යුද හමුදා ස්වේච්ඡා බල සේනාවේ සේනාධිනායක ලෙස ද සේවය කර තිබේ.

කොළඹ රාජකීය විද්‍යාලයේ ආදි සිසුවෙකු ද වන ලුතිනන් ජෙනරල් ක්‍රිෂාන්ත ද සිල්වා මහතා ශ්‍රී ලංකා යුද හමුදාවේ 21 වන හමුදාපතිවරයා යි.

1981 වසරේ ජූලි මාසයේදී ශ්‍රී ලංකා ඉංජිනේරු සේවා බළකායේ දෙවැනි ලුතිනන්වරයෙකු ලෙස සේවය ආරම්භ කළ ක්‍රිෂාන්ත ද සිල්වා මහතාට වසර 35කට අධික කාලයක් හමුදා ක්ෂේත්‍රයේ අත්දැකීම් තිබේ.

ඇමෙරිකාව, පාකිස්තානය, ඉන්දියාව, චීනය, ඉන්දුනීසියාව වැනි රටවල් ගණනාවක ආරක්ෂාව පිළිබඳව හදාරා ඇති ක්‍රිෂාන්ත ද සිල්වා මහතා ආරක්ෂක අධ්‍යාපනය සම්බන්ධයෙන් පශ්චාත් උපාධියක්ද හිමිකරගෙන තිබේ.

එසේම ඔහු රණ වික්‍රම පදක්කම (RWP), උත්තම සේවා පදක්කම (USP) හා විශේෂ සේවා පදක්කම (VSV) යන හමුදා ක්ෂේත්‍රයේ ඉහළම පදක්කම් ලබාගෙන ඇති හමුදා නිලධාරියෙකි.