පානීය ජලය ඉල්ලා පසුගිය 25දා අම්බලන්තොට නගරයේ තිස්ස - මාතර ප්‍රධාන මාර්ගය අවහිර කරමින් විරෝධතාවයේ නියැළුණු භික්ෂුන් වහන්සේ නමක් ඇතුළු 32ට අ...
පානීය ජලය ඉල්ලා පසුගිය 25දා අම්බලන්තොට නගරයේ තිස්ස - මාතර ප්‍රධාන මාර්ගය අවහිර කරමින් විරෝධතාවයේ නියැළුණු භික්ෂුන් වහන්සේ නමක් ඇතුළු 32ට අද (01) හම්බන්තොට අධිකරණය විසින් ඇප ලබාදී තිබේ.
පසුගිය 28වනදා අම්බලන්තොට පොලීසියට භාරවීමෙන් පසු අත්අඩංගුවට ගැනුණු මෙම පිරිස අධිකරණයට ඉදිරිපත් කිරීමෙන් පසු අද දින දක්වා රක්ෂිත බන්ධනාගාර ගත කර සිටියේය.
ඒ අනුව එක් අයෙකුට රුපියල් ලක්ෂ දෙක බැගින්වූ ශරීර ඇප මත 32දෙනාට ශරීර ඇප 32ක් මත මුදාහැරීමට හම්බන්තොට මහේස්ත්‍රාත් අධිකරණයේ විනිසුරු මංජුල කරුණාරත්න මහතා නියෝග කළ අතර නැවත නඩුව විභාගයට ගැනීම ලබන දෙසැම්බර් මස 01 වැනිදා ලෙස නම් කෙරුණි.
අම්බලන්තොට රුහුණු රිදියගම ප්‍රදේශයේ කරබගලමුල්ල, ගොඩකොග්ගල්ල යන ග්‍රාම නිලධාරි වසම් 02ක ජනතාව පානිය ජලය ඉල්ලා පසුගිය මස 25 වනදා පෙරවරු 11.00 සිට සවස 03.00 පමණ වෙනතෙක් පැය 04ක පමණ කාලයක් තිස්ස - මාතර ප්‍රධාන මාර්ගය අම්බලන්තොට නගරයෙන් හරස් කරමින් විරෝධතාවයේ නියැලිණි.
ඒ අනුව විරෝධතාවයේ නියැලුණු පිරිස අත්අඩංගුවට ගනු ලැබුවේ අයුතු ජනරාසිය ,මහජන පීඩාව, අනර්ථය යන කාරණා යටතේ චෝදනා ගොනුකරමිනි.
මේ වනවිටත් එම ග්‍රාම නිළධාරී වසම් දෙකෙහි පවුල් 540ක පුද්ගලයින් 2500කට වැඩි පිරිසක් පානිය ජලය නොමැතිව පීඩි විඳිමින් සිටී.
අත්අඩංගුවේ පසුවී ඇප මත නිදහස් වුණු කොග්ගල්ල විවේකාරාම විහාරයේ විහාරාධිපති වලකුබුරේ ධම්මාරාම හිමි මේ සම්බන්ධයෙන් අදහස් දක්වමින් කියාසිටියේ, "අපි වතුර ලබා ගන්න තමයි මේ අරගලය කලේ. ඒ අතරතුර පාරවල් වහලා අපිකල වැරදි වැඩක් නිසා අධිකරණයෙන් දීපු නියෝගය සදහා අපි සියලු දෙනාම ගරු කරනවා. දින හතරක් අපි ඒ නිසා බන්ධනාගාර ගතකර හිටියා. අදටත් දින 14ක් වෙනවා අදටත් තාම වතුර ලැබුනේ නෑ. මේ ගැන රටේ ජනාධිපති අගමැති ප්රමුඛ බලධාරිගේ අවධානය යොමුකරලා අපිට ඉක්මනින්ම ජලය ලබාදෙන්න කියලා තමයි අපේ එකම ඉල්ලීම'' යනුවෙනි.
ඡායාරූප පහතින්.
හම්බන්තොට - රාහුල් සමන්ත හෙට්ටිආරච්චි
COMMENTS