මැදපෙරදිග පවතින යුදමය වාතාවරණය හමුවේ සටන් විරාමයක් සඳහා කෙරෙන ඉල්ලීම් ඉරාන විදේශ අමාත්ය අබ්බාස් අරග්චි විසින් ප්රතික්ෂේප කර ඇත. තම රටේ ජ...
මැදපෙරදිග පවතින යුදමය වාතාවරණය හමුවේ සටන් විරාමයක් සඳහා කෙරෙන ඉල්ලීම් ඉරාන විදේශ අමාත්ය අබ්බාස් අරග්චි විසින් ප්රතික්ෂේප කර ඇත. තම රටේ ජනතාවගේ ආරක්ෂාව වෙනුවෙන් සටන අඛණ්ඩව කරගෙන යාම අත්යවශ්ය බව ඔහු අවධාරණය කළේය.
NBC පුවත් සේවයේ "Meet the Press" වැඩසටහන සමඟ සම්මුඛ සාකච්ඡාවකට එක්වෙමින් අරග්චි මහතා ප්රකාශ කළේ, ඇමරිකා එක්සත් ජනපදය සහ ඊශ්රායලය එක්ව ඉරාන වැසියන්, පාසල් සිසුවියන් ඝාතනය කරමින් රෝහල් වෙත පවා ප්රහාර එල්ල කරන බවයි.
පසුගිය වසරේ ඇති කරගත් සටන් විරාම ගිවිසුම් ඇමරිකාව සහ ඊශ්රායලය විසින්ම උල්ලංඝනය කර ඇති බව පෙන්වා දුන් ඔහු, යුද්ධයට ස්ථිර විසඳුමක් ලැබෙන තෙක් සටන අත්නොහරින බව පැවසීය.
ඉරානය සහ රුසියාව අතර පවතින්නේ ඉතා සමීප සහයෝගීතාවයක් බවත්, රුසියාව ඉරානයට විවිධ අංශවලින් උදව් කරන බවත් අමාත්යවරයා මෙහිදී සඳහන් කළේය. කෙසේ වෙතත්, රුසියාව විසින් ඇමරිකානු යුද නැව් සහ හමුදා ස්ථානගත කර ඇති ස්ථාන පිළිබඳ ඔත්තු තොරතුරු ඉරානයට ලබා දෙන බවට පැතිර යන වාර්තා පිළිබඳව ඔහු පැහැදිලි ප්රකාශයක් සිදු නොකළේය.
මේ සම්බන්ධයෙන් අදහස් දැක්වූ ඇමරිකානු එක්සත් ජාතීන්ගේ තානාපති මයික් වෝල්ට්ස් ප්රකාශ කළේ රුසියාව ඉරානයට ලබා දෙන සහයෝගය එතරම් ඵලදායී වී නොමැති බවත්, ඇමරිකානු හමුදාවන් විසින් ඉරානයේ ගුවන්, නාවික සහ ගොඩබිම් බලඇණිවලට දැඩි හානි පමුණුවා ඇති බවත්ය.
ඉරානය සතුව ඇමරිකාව දක්වා ප්රහාර එල්ල කළ හැකි මිසයිල පවතින බවට ජනාධිපති ඩොනල්ඩ් ට්රම්ප් කළ ප්රකාශය අසත්යයක් බව අරග්චි මහතා පැවසීය. ලෝකයට තර්ජනයක් නොවීම සඳහා ඉරානය සිය මිසයිල පරාසය හිතාමතාම කිලෝමීටර් 2,000කට සීමා කර ඇති බව ඔහු පෙන්වා දුන්නේය.
මීට අමතරව, අසල්වැසි ගල්ෆ් කලාපීය රටවල් හරහා ඇමරිකාව හෝ ඊශ්රායලය ප්රහාර එල්ල නොකරන්නේ නම්, එම රටවලට ප්රහාර එල්ල නොකරන බවට ඉරාන ජනාධිපති මසූඩ් පෙසෙෂ්කියන් (Masoud Pezeshkian) පොරොන්දු වී ඇති බවත් වාර්තා වේ. පසුගිය ප්රහාරවලදී කුවේටය, ඕමානය වැනි රටවල වැසියන්ට සිදු වූ හානි පිළිබඳව ජනාධිපතිවරයා සමාව අයැද සිටි බවද අරග්චි මහතා සඳහන් කළේය.
COMMENTS