ලෝක දේශපාලන වේදිකාව මේ දිනවල අතිශය උණුසුම් වී ඇත්තේ ඇමෙරිකානු ප්රකෝටිපති ජෙෆ්රි එප්ස්ටයින්ගේ ආන්දෝලනාත්මක ලිපිගොනු හෙළිදරව් වීමත් සමගය. ල...
ලෝක දේශපාලන වේදිකාව මේ දිනවල අතිශය උණුසුම් වී ඇත්තේ ඇමෙරිකානු ප්රකෝටිපති ජෙෆ්රි එප්ස්ටයින්ගේ ආන්දෝලනාත්මක ලිපිගොනු හෙළිදරව් වීමත් සමගය. ලොව ප්රබලතම රාජ්ය නායකයන්, ව්යාපාරිකයන් සහ බුද්ධිමතුන්ගේ නම් රැසක් මේ හරහා කරළියට පැමිණ ඇති අතර, ඉන්දීය දේශපාලනය මවිතයට පත්කරමින් වර්තමාන ඉන්දීය බලශක්ති අමාත්ය හර්දීප් සිං පූරිගේ නමද එම ලිගොනු අතර ප්රමුඛව සටහන් වී තිබේ.
අද වනවිට භාරතීය ජනතා පක්ෂයේ ප්රබලයකු මෙන්ම නරේන්ද්ර මෝදිගේ සමීපතමයකු වන හර්දීප් සිං පූරි යනු ශ්රී ලාංකිකයන්ට අමුත්තෙකු නොවේ. 1980 දශකයේ මෙරට ඉරණම තීරණය කළ ලේ වැකි යුදමය වාතාවරණය පවතින සමයේ, තිරය පිටුපස සිටි ප්රධානතම රාජ්යතාන්ත්රික ‘මොළකරු’ වන්නේ මොහුය. එදා වේළුපිල්ලේ ප්රභාකරන්ව සාකච්ඡා මේසයට ගෙන ඒම සඳහා ඉන්දීය රජය වෙනුවෙන් පෙනී සිටි හර්දීප් පූරි, අද තම දේශපාලන ජීවිතයේ දරුණුම අභියෝගයට මුහුණ දී සිටින්නේ අන්තර්ජාතික මට්ටමේ ලිංගික අපරාධකරුවකු ලෙස හංවඩු ගැසුණු එප්ස්ටයින් සමග පැවැත්වූවා යැයි කියන සබඳතාවක් හේතුවෙනි.
හර්දීප් සිං පූරිගේ ලාංකේය භූමිකාව ආරම්භ වන්නේ 1984 වසරේදීය. ඔහු 1984 සිට 1988 දක්වා කොළඹ පිහිටි ඉන්දීය මහ කොමසාරිස් කාර්යාලයේ දේශපාලන අංශයේ පළමු ලේකම්වරයා ලෙස සේවය කළේය. එය ශ්රී ලංකාවේ වාර්ගික අර්බුදය දරුණු ලෙස ඇවිළී ගිය යුගයකි. එකල කොළඹ සිටි ඉන්දීය මහ කොමසාරිස් ජේ.එන්. ඩික්සිත් මහතා සිය Assignment Colombo කෘතියේ සටහන් කරන පරිදි, 1987 ඉන්දු-ලංකා සාම ගිවිසුම අස්සන් කිරීමේ තීරණාත්මක සාකච්ඡා මෙහෙයවූ ප්රධාන නළුවා වූයේ පූරිය. ඉන්දියාවේ බලපෑම මත ශ්රී ලංකාවේ සාමය ඇති කිරීමට උත්සාහ කළ ඒ යුගයේ, එල්.ටී.ටී.ඊ. නායක වේළුපිල්ලේ ප්රභාකරන් සමග ඍජුව ගනුදෙනු කිරීමේ වගකීම පැවරී තිබුණේ ඔහුටය. ගිවිසුමේ අන්තර්ගතය පිළිබඳ ප්රභාකරන් සහ ඔහුගේ සගයන් සමග රහසිගතව සහ නිල වශයෙන් සාකච්ඡා පවත්වමින්, ඔවුන්ව නවදිල්ලියට ගෙන්වා ගැනීමට අවශ්ය වටපිටාව සකස් කළේ හර්දීප් පූරි විසිනි.
එම මෙහෙයුම කොතරම් බරපතළ වූයේද යත්, සාම ගිවිසුම අස්සන් කිරීමට පෙර ප්රභාකරන්ව සහ ඔහුගේ පවුලේ සාමාජිකයන්ව ඉන්දීය ගුවන් හමුදාවට අයත් හෙලිකොප්ටර් යානා මගින් මදුරාසිය හරහා දිල්ලියට රැගෙන යාමේ සම්පූර්ණ සංවිධාන කටයුතු සිදුකළේ පූරිය. ප්රභාකරන්ගේ බිරිඳ මතිවදනී සහ දරුවන් සමග ඔවුන්ව අශෝක හෝටලයේ රඳවා තබමින්, රජීව් ගාන්ධි හමුවට ප්රභාකරන්ව ඉදිරිපත් කිරීමට පෙර අවශ්ය මානසික සහ දේශපාලන පසුබිම පූරි විසින් සකස් කරන ලදී. එහිදී පූරි විසින් ප්රභාකරන් වෙත එක් සුවිශේෂ සහතිකයක් ලබාදී තිබිණි. එනම්, ගිවිසුම පිළිබඳ එකඟ වුවත් නැතත් ප්රභාකරන්ව යළි ආරක්ෂිතව යාපනයට ගෙනැවිත් ඇරලවන බවයි. මෙම රාජ්යතාන්ත්රික මැදිහත්වීම ඉතිහාසයේ ලියැවී ඇත්තේ ඉන්දියාව මෙරට අභ්යන්තර දේශපාලනයට ඍජුව අතපෙවූ තීරණාත්මක සන්ධිස්ථානයක් ලෙසය. රජීව් ගාන්ධි සහ ජේ.ආර්. ජයවර්ධන 1987 ජූලි 29 වැනි දින සාම ගිවිසුමට අස්සන් තබන විට, ඒ අසලින්ම සිටි එක් පුද්ගලයකු වූයේ මේ හර්දීප් සිං පූරිය.
කෙසේ වෙතත්, වර්තමානයේ ඔහු පත්ව සිටින්නේ මුළු ඉන්දියාවම කම්පනයට පත්කළ දේශපාලන කුණාටුවක මැදය. විදේශ මාධ්ය හෙළිදරව් කරන පරිදි, හර්දීප් සිං පූරි සහ ජෙෆ්රි එප්ස්ටයින් අතර ඊමේල් පණිවුඩ හුවමාරුව ආරම්භ වී ඇත්තේ 2014 වසරේදීය. ලිංගික අපරාධ සම්බන්ධයෙන් වැරදිකරු වූ එප්ස්ටයින් සමග පූරි විසින් ආයෝජන අවස්ථා පිළිබඳ දීර්ඝ වශයෙන් අදහස් හුවමාරු කරගෙන ඇති බව පෙනීයයි. විශේෂයෙන්ම ලින්ක්ඩ්-ඉන් නිර්මාතෘ රීඩ් හොෆ්මන් ඉන්දියාවට ගෙන්වා ගැනීම සහ මෝදි රජයේ ආර්ථික සැලසුම් පිළිබඳ පූරි විසින් එප්ස්ටයින් වෙත කරුණු ඉදිරිපත් කර ඇති බව එම ලිපිගොනුවල සඳහන් වේ. මෙම තොරතුරු කරළියට පැමිණීමත් සමග ඉන්දීය කොංග්රස් පක්ෂය ඇතුළු විපක්ෂ කණ්ඩායම් පූරිගේ ඉල්ලා අස්වීම ඉල්ලා දැඩි හඬක් නගමින් සිටී. මෙය ඉන්දීය රජයේ ප්රතිරූපයට එල්ල වූ මරු පහරක් ලෙස ඔවුහු හඳුන්වති.
පූරි මෙම චෝදනා තරයේ ප්රතික්ෂේප කරමින් පවසන්නේ, තමා එප්ස්ටයින් සමග පැවැත්වූ සියලු සබඳතා වෘත්තීය මට්ටමේ ව්යාපාරික කටයුතුවලට පමණක් සීමාවූ බවයි. එප්ස්ටයින්ගේ අපරාධකාරී පසුබිම ලොවට හෙළිවීමට පෙර ඔහු ජාත්යන්තර මට්ටමේ ව්යාපාරික සම්බන්ධීකාරකයෙකු ලෙස පෙනී සිටි බැවින්, ඔහු හරහා ඉන්දියාවට ආයෝජන ගෙන්වා ගැනීමට උත්සාහ කිරීමේ වරදක් නොමැති බව පූරිගේ තර්කයයි. දැනට ඔහුට එරෙහිව කිසිදු සාපරාධී චෝදනාවක් ගොනු වී නොමැති වුවද, දේශපාලනමය වශයෙන් මෙය ඔහුට දැඩි බලපෑමක් එල්ල කර ඇත. එදා සීතල යුද්ධය පැවති සමයේ කලාපීය බලවතා ලෙස ඉන්දියාව ශ්රී ලංකාව තුළ සිදු කළ මෙහෙයුම්වල ‘නිහඬ සාක්ෂිකරුවා’ වූ පූරි, අද මෙවැනි ගෝලීය මට්ටමේ අපකීර්තිමත් ගොනුවකට සම්බන්ධ වීම දෛවයේ සරදමකි.
හර්දීප් සිං පූරිගේ මෙම කතාවෙන් පැහැදිලි වන්නේ බලය සහ දේශපාලනය යන විෂය පථයන් කොතරම් සංකීර්ණද යන්නයි. එදා තරුණ රාජ්යතාන්ත්රිකයකු ලෙස ලංකාවේ ඉරණම තීන්දු කළ ඔහු, අද වයෝවෘද්ධ දේශපාලනඥයකු ලෙස තම පෞද්ගලික පාරිශුද්ධභාවය ඔප්පු කිරීමේ සටනකට අවතීර්ණ වී සිටී. ශ්රී ලාංකික අපට මෙම ලිපිය වැදගත් වන්නේ, අපේ රටේ අතීතය හැඩගැස්වීමට දායක වූ පුද්ගලයන් අද ලෝක දේශපාලනය තුළ නියෝජනය කරන භූමිකාව වටහා ගැනීමටය. එප්ස්ටයින්ගේ කළු සෙවණැල්ල පූරිගේ දීප්තිමත් දේශපාලන ගමන නතර කරාවිද, නැතහොත් ඔහු සුපුරුදු පරිදි මෙම අභියෝගයත් ජය ගනීවිද යන්න ඉදිරි කාලයේදී තීරණය වනු ඇත.
එස්. පතිනායක
මේ පුවත තව අයට බලන්න
COMMENTS