ට‍්‍රම්ප්ගේ බද්ද නීති විරෝධී බව ශ්‍රේෂ්ඨාධිකරණය තීන්දු කරයි.. ඇමරිකානු ආර්ථිකය අධි අවදානමක!

ජනාධිපති ඩොනල්ඩ් ට්‍රම්ප් විසින් ලොව පුරා රටවලට එරෙහිව ඒකපාර්ශ්විකව පනවන ලද දැවැන්ත ‘හදිසි තීරුබදු’ (Emergency Tariffs) ෆෙඩරල් නීතිය උල්ලං...

ජනාධිපති ඩොනල්ඩ් ට්‍රම්ප් විසින් ලොව පුරා රටවලට එරෙහිව ඒකපාර්ශ්විකව පනවන ලද දැවැන්ත ‘හදිසි තීරුබදු’ (Emergency Tariffs) ෆෙඩරල් නීතිය උල්ලංඝනය කිරීමක් බවත්, ඒවා නීතිවිරෝධී බවත් ඇමරිකානු ශ්‍රේෂ්ඨාධිකරණය ඊයේ (සිකුරාදා) තීන්දු කළේය. මෙය ට්‍රම්ප් පරිපාලනය සිය දෙවන ධුර කාලය තුළ ලැබූ බරපතලම අධිකරණ පරාජය ලෙස සැලකේ.

අගවිනිසුරු ජෝන් රොබට්ස් ප්‍රමුඛ විනිසුරු මඩුල්ලේ 6-3 ක බහුතර එකඟතාවයෙන් මෙම තීන්දුව ප්‍රකාශයට පත් කරන ලදී. හදිසි අවස්ථාවලදී ආනයන පාලනය කිරීමට ජනාධිපතිවරයාට බලය ලබා දෙන 1970 දශකයේ "ජාත්‍යන්තර හදිසි ආර්ථික බලතල පනත" (IEEPA) මගින් මෙලෙස අසීමිත ලෙස තීරුබදු පැනවීමට අවසර නොලැබෙන බව අධිකරණය අවධාරණය කළේය.

තීන්දුව ප්‍රකාශයට පත් කරමින් අගවිනිසුරු ජෝන් රොබට්ස් සඳහන් කළේ, "ප්‍රමාණය, කාලසීමාව සහ විෂය පථය සීමා රහිත වූ මෙවැනි බදු පැනවීමක් සඳහා කොංග්‍රස් මණ්ඩලයේ පැහැදිලි අවසරයක් තිබිය යුතු බවයි". මෙම තීන්දුව සඳහා කොන්සර්වේටිව් විනිසුරුවරුන් වන ඇමී කෝනි බැරට් සහ නීල් ගොර්සච් ද ලිබරල් විනිසුරුවරුන් සමඟ එක්වීම විශේෂත්වයකි.

මෙම තීන්දුවත් සමඟ රජය විසින් දැනටමත් එකතු කර ඇති ඩොලර් බිලියන 134 කට අධික තීරුබදු ආදායමට කුමක් සිදුවේද යන්න පිළිබඳව දැඩි අවිනිශ්චිතතාවයක් මතු වී ඇත.

දැනටමත් 301,000 කට අධික ආනයනකරුවන් පිරිසකගෙන් මෙම බදු එකතු කර ඇත.මෙම මුදල් නැවත ගෙවීමට සිදුවුවහොත් එය ඇමරිකානු ආර්ථිකයට දැඩි බලපෑමක් එල්ල කරනු ඇතැයි ට්‍රම්ප් පරිපාලනය අනතුරු අඟවයි.කෙසේ වෙතත්, මෙම මුදල් ආපසු ගෙවීම සම්බන්ධයෙන් ශ්‍රේෂ්ඨාධිකරණය මෙතෙක් නිශ්චිත නියෝගයක් නිකුත් කර නොමැති අතර, එය පහළ උසාවි මගින් තීරණය කරනු ඇතැයි අපේක්ෂා කෙරේ.

ධවල මන්දිරයේ පැවැති ආණ්ඩුකාරවරුන්ගේ හමුවකදී ජනාධිපති ට්‍රම්ප් මෙම තීන්දුව "ලැජ්ජා සහගත" එකක් ලෙස හඳුන්වා දී ඇත. තීරුබදු නොමැතිව ඇමරිකාව දුප්පත් ජාතියක් වනු ඇති බවට ජනාධිපතිවරයා සහ අධිකරණ දෙපාර්තමේන්තුව මීට පෙර තර්ක කර තිබුණි.

ට්‍රම්ප් පරිපාලනය විසින් චීනයට එරෙහිව 145% ක් දක්වාත්, ඉන්දියාව සහ බ්‍රසීලය වැනි රටවලට 50% ක් දක්වාත් තීරුබදු ඉහළ නංවා තිබුණි. මෙම තීන්දුවත් සමඟ ජනාධිපතිවරයාට හිතුමතේ බදු පැනවීමට ඇති බලය සීමා වී ඇති අතර, එය ඉදිරි දේශපාලන සහ ආර්ථික ගමන්මගට තීරණාත්මක බලපෑමක් එල්ල කරනු ඇත.