ආන්දෝලනාත්මක බටලන්ද වධකාගාරය සම්බන්ධයෙන් කරුණු විමර්ශනය කළ ජනාධිපති කොමිෂන් සභා වාර්තාවෙන් හිටපු ජනාධිපති රනිල් වික්‍රමසිංහ මහතා ඇතුළු පහළ...
ආන්දෝලනාත්මක බටලන්ද වධකාගාරය සම්බන්ධයෙන් කරුණු විමර්ශනය කළ ජනාධිපති කොමිෂන් සභා වාර්තාවෙන් හිටපු ජනාධිපති රනිල් වික්‍රමසිංහ මහතා ඇතුළු පහළොස් දෙනෙකුට එම සිද්ධිය සම්බන්ධයෙන් දැඩි චෝදනා එල්ල කර ඇත.
බටලන්ද ජනාධිපති කොමිෂන් සභා වාර්තාවේ සඳහන් වන ආකාරයට, මෙම සිද්ධිය සම්බන්ධයෙන් සෘජුවම හෝ අනියම් ලෙස වගකිවයුතු පුද්ගලයන් අතරට හිටපු ජනාධිපති රනිල් වික්‍රමසිංහ මහතා ද ඇතුළත් වේ.
කොමිෂන් සභා වාර්තාවට අනුව, රනිල් වික්‍රමසිංහ මහතාට එල්ල වී ඇති චෝදනා අතර පහත කරුණු ඇතුළත් වේ:
1. සිය අමාත්‍ය ධුර බලතල අයුතු ලෙස භාවිත කරමින් පොලිස් නිලධාරීන්ට නිවාස ලබා දීමට නියම කිරීම
2. බටලන්ද නිවාස සංකීර්ණයේදී පොලිස් නිලධාරීන් කැඳවා රැස්වීම් පැවැත්වීම
3. පොලිස් රාජකාරියට මැදිහත්වීම සහ නීතිය ක්රියාත්මක කිරීමේදී ඊට මැදිහත්වීම
4. නිවාසවල නීති විරෝධී රැඳවුම් මධ්‍යස්ථාන පිහිටුවීම
5. ඊ2, ඊ8, හා 1/8 යන නිවාසවල පුද්ගලයන් රඳවා තැබීම සහ වද හිංසනයට ලක් කිරීම
බටලන්ද වධකාගාරය පවත්වාගෙන යෑම සම්බන්ධයෙන් විශේෂයෙන් කිහිප දෙනෙකුට චෝදනා එල්ල වී ඇත. ඒ අතර ප්‍රධාන වන්නේ:
– ජ්‍යෙෂ්ඨ පොලිස් අධිකාරී නලින් දෙල්ගොඩ
– සහකාර පොලිස් අධිකාරී ඩග්ලස් පීරිස්
– ප්‍රධාන පොලිස් පරීක්ෂක රංජිත් වික්‍රමසිංහ
එසේම තවත් කිහිප දෙනෙකුට ද මෙම වාර්තාවෙන් චෝදනා එල්ල වී ඇත.
බටලන්ද කොමිෂන් සභා වාර්තාවේ නීතිඥ විජයදාස ලියනාරච්චි මහතාගේ මරණය සම්බන්ධයෙන් ද වැදගත් තොරතුරු රැසක් අනාවරණය කර ඇති අතර එම කොමිසම හමුවේ සාක්ෂි දුන් හිටපු පොලිස්පති අර්නස්ට් පෙරේරා මහතා ප්‍රකාශ කර ඇත්තේ 1988 අගෝස්තු 31 වැනිදා නායකයකු දුරකතනයෙන් අමතා නීතිඥ විජයදාස ලියනආරච්චි කොළඹට ගෙනැවිත් බාරදෙන ලෙස තමාට දැනුම් දුන් බවයි.
වාර්තාවට අනුව, එම නියෝගය අනුව ලියනාරච්චි මහතා කැලණිය ප්‍රදේශයේ කඩාකප්පල්කාරී ක්‍රියා මර්දන ඒකකයේ පොලිස් පරීක්ෂක කුලරත්න මහතා භාරගෙන ඇත. ඉන් දින දෙකකට පසුව දරුණු තුවාල සහිතව ලියනආරච්චි මහතා කොළඹ ජාතික රෝහලට ඇතුළත් කර ඇති අතර, ඔහුගේ හදවත මධ්‍යම රාත්‍රියට පැය භාගයකට පසු නතර වී ඇති බව වාර්තාවේ සඳහන් වේ.
පිටු 6780කින් සමන්විත බටලන්ද කොමිෂන් සභා වාර්තාව 1998 මැයි 5 වැනිදා හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මියට ලබා දී තිබුණද, එහි නිර්දේශ මේ දක්වා ක්රියාත්මක වී නොමැති බව දේශපාලන ආරංචි මාර්ග පවසයි.
වාර්තාවේ ප්‍රධාන නිර්දේශ අතර, පුරවැසියන්ගේ මූලික අයිතිවාසිකම් පිට පිටම උල්ලංඝනය කර ඇති හඳුනාගනු ලබන පුද්ගලයන්ගේ ප්‍රජා අයිතිවාසිකම් අහිමි කිරීමේ ස්වරූපයෙන් වූ සුදුසු දඬුවම් එම පුද්ගලයන්ට පැනවීමට අවශ්‍ය අධිකරණ බලය ශ්‍රේෂ්ඨාධිකරණයට පැවරීම ඇතුළත් වෙයි.
මෙම වාර්තාවට අනුව, 1987-1989 කාල සීමාවේදී එක්සත් ජාතික පක්‍ෂ සාමාජිකයන් 1960 දෙනෙකු ඝාතනය කර ඇති බවද වාර්තා වේ. එසේම එම කාල සීමාවේදී රාජ්‍ය දේපළවලට කරන ලද හානිය ද විශාල බව සඳහන් කරන එම වාර්තාව, ජනතා විමුක්ති පෙරමුණේ ප්‍රධානම ඉලක්කය වූයේ එක්සත් ජාතික පක්‍ෂයේ දේශපාලනඥයන් බවද දැක්වේ.
සභානායක අමාත්‍ය බිමල් රත්නායක මහතා විසින් ඉකුත් 14 වැනිදා (සිකුරාදා) පාර්ලිමේන්තුවට බටලන්ද කොමිෂන් සභා වාර්තාව ඉදිරිපත් කරනු ලැබීය.
මෙම වාර්තාව ජාත්‍යන්තර මට්ටමින් ද විශාල අවධානයක් දිනාගත් අතර, විශේෂයෙන් අල් ජසීරා රූපවාහිනිය රනිල් වික්‍රමසිංහ මහතා සමඟ සිදු කළ සාකච්ඡාවෙන් පසු මෙම වාර්තාව සම්බන්ධයෙන් මෙරට මෙන්ම විදේශවල ද ලොකු ආන්දෝලනයක් ඇති විය.
බටලන්ද කොමිෂන් සභා වාර්තාව 1998 වසරේදී එවකට ජනාධිපතිනි චන්ද්‍රිකා බණ්ඩාරනායක කුමාරතුංග මහත්මියට භාර දී ඇතත්, එය මෙතෙක් ක්රියාත්මක වී නොමැති බව පෙනී යයි. මෙම වාර්තාව මෙතරම් කාලයක් ප්‍රසිද්ධියේ සාකච්ඡාවට භාජනය නොවීම පිළිබඳව ද දැන් විවිධ ප්‍රශ්න මතුවෙමින් තිබේ.
දැන් වසර 27කට පසුව මෙම වාර්තාව පාර්ලිමේන්තුවට ඉදිරිපත් කිරීමත් සමඟ, මෙහි නිර්දේශ ක්රියාත්මක කිරීම සම්බන්ධයෙන් පාර්ලිමේන්තුව ඉදිරියේදී ගන්නා පියවර කෙරෙහි මහජන අවධානය යොමුව ඇත.
COMMENTS