වත්මන් ආණ්ඩුව බලයට පත්කර ගැනීම සඳහා මූලිකත්වය ගනිමින් වෙහෙස වූ නමුත් දැන් තමන්ටත් කියන්නට ඉතිරි වී ඇත්තේ "රැවටුණා - වැරදුණා" යන්...
වත්මන් ආණ්ඩුව බලයට පත්කර ගැනීම සඳහා මූලිකත්වය ගනිමින් වෙහෙස වූ නමුත් දැන් තමන්ටත් කියන්නට ඉතිරි වී ඇත්තේ "රැවටුණා - වැරදුණා" යන්න පමණක් බව නාරාහේන්පිට අභයාරාමයේ විහාරාධිපති මුරුත්තෙට්ටුවේ ආනන්ද හිමියන් පවසයි.
"දෙවනි එන්නත ලබාගැනීම පිණිස සෞඛ්‍ය අමාත්‍යාංශයට අග්‍රාමාත්‍යතුමාගේ ලිපියකුත් යොමුකරලා, සෞඛ්‍ය ලේකම්තුමාට, අපෙ සෞඛ්‍ය ඇමතිතුමියට, සෞඛ්‍ය අධ්‍යක්ෂ ජනරාල්ට ලිඛිතව ඉල්ලීමක් කරලා තිබෙන්නෙ. පවිත්‍රා වන්නිආරච්චි සෞඛ්‍ය අමාත්‍යවරිය මහ බොළඳ කතාවක්, හෝඩියෙ කතාවක් ප්‍රකාශයට පත් කළා. ඒ කියන්නෙ එතුමියගේ අනුමැතිය ඇතිව තමයි මේකෙ පළවෙනි එකත් ගත්තෙ, දෙවැනි එකත් ගත්තෙ. එහෙමනම් අද එතුමිය මේ පිළිබඳ වගකීමක් දන්නෙ නෑ කිව්වා නම් එතුමියගේ මොළේ ආබාධයක් තියෙන්න ඕනෙ.
අගමැතිතුමාගෙ ලියුම මා ළඟ තිබෙනවා, එතුමියට ඉදිරිපත් කරපු ලියුම් අප ළඟ තිබෙනවා. මේ සියල්ලම පැහැර හැරලා ජනතාව නොමඟ යවනවා නම් මම හිතනවා අපටත් බොහොම වේදනායි. අපි ආණ්ඩුවක් බලයට පත්කර ගත්තේ, ඒක ඇත්ත. උදව් කළ එක ඇත්ත. නමුත් දැන් අපටත් කියන්න ඇත්තේ "රැවටුණා, වැරදුණා" කියන කතාව පමණයි. අපට හැමදාම කියන්න වෙලා ඇත්තේ ඒකයි" යනුවෙනුයි එහිමි හැඟීම්බර ලෙස ප්‍රකාශ කළේ.
නාරාහේන්පිට අභයාරාමයේ විහාරාධිපති මුරුත්තෙට්ටුවේ ආනන්ද හිමියන් මේ බව පැවසුවේ ඊයේ (01) දිනයේදී මාධ්‍ය වෙත අදහස් දක්වමිනි.
ඇස්ට්‍රාසෙනිකා එන්නතේ දෙවැනි මාත්‍රාව ලබාදීමේ වැඩසටහනක් මීට දින කිහිපයකට පෙර අභයාරාමයේ සංවිධානය කර තිබුණු අතර එදින එන්නත නොලැබීම නිසා එහි යම් නොසන්සුන්කාරී තත්වයක් ද උද්ගත වී තිබිණි. ඒ පිළිබඳ විමසීමේදී සෞඛ්‍ය අමාත්‍ය පවිත්‍රා වන්නිආරච්චි මහත්මිය මාධ්‍ය වෙත සඳහන් කර තිබුණේ එම එන්නත්කරණ වැඩසටහන සූදානම් කර තිබුණේ සෞඛ්‍ය අමාත්‍යාංශයේ අනුදැනුමක් ඇතිව නොවන බවකි. මුරුත්තෙට්ටුවේ හිමියන් ඊයේ ප්‍රතිචාර දැක්වූයේ එම ප්‍රකාශයටය.
COMMENTS