පසුගිය සිකුරාදා කොළඹ විහාර මහ දේවී උද්‍යානයේ පිහිටුවා තිබූ දැවැන්ත ප්‍රචාරක පුවරුවක් ඉවත් කිරීමට ක්‍රියා කිරීම සම්බන්ධයෙන් පරිසරවේදී නීතිඥ...
පසුගිය සිකුරාදා කොළඹ විහාර මහ දේවී උද්‍යානයේ පිහිටුවා තිබූ දැවැන්ත ප්‍රචාරක පුවරුවක් ඉවත් කිරීමට ක්‍රියා කිරීම සම්බන්ධයෙන් පරිසරවේදී නීතිඥ ආචාර්ය ජගත් ගුණවර්ධන මහතා විරෝධය පළ කර තිබේ.
ඔහු පවසන්නේ, එම ක්‍රියාව කිසිසේත් අනුමත කළ නොහැකි 'අමනෝඥ ක්‍රියාවක්' බවය.
සිය ෆේස්බුක් පිටුවෙහි විශේෂ සටහනක් තබමින් ඔහු ඒ පිළිබඳ සිය විරෝධය පළ කර තිබේ.
ගෝලීය දේශගුණික විපර්යාස දිනය සැමරීම පිණිස සිදුකිරීමට තිබූ විරෝධයකට දරුවන් පිරිසක් වන වන සත්ව සහ ස්වභාව ආරක්ෂණ සංගමයේ යෞවන අංශයේ සාමාජිකත්වය ස්වේච්ඡාවෙන් මහත් වෙහෙසක් ගෙන නිමවා කොළඹ මහ නගර සභාවෙන් නිසි අවසරය ගෙන සවි කළ චිත්‍රය ඉවත්කිරීම ඉතා දැඩි අප්‍රසාදයට ලක්වී තිබෙන කරුණකි.
මෙවන් චිත්‍රයක් හෝ දැන්වීමක් හෝ ප්‍රදර්ශනයට අදාළ නීතිමය තත්ත්වය ජාතික පාරිසරික පනත යටතේ ප්‍රකාශිත 2019.11.05 දිනැති අංක 2148/19 දරන අතිවිශේෂ ගැසට් පත්‍රයේ පළ කරන ලද 2019 අංක 01 දරන දැන්වීම් පුවරු සහ ප්‍රචාරක පුවරු පාලනය කිරීමේ (දෘෂ්ටි දූෂණය) නියෝග මගින් ප්‍රකාශ කර තිබේ.
මේ නියෝගයන්හි ඇති 03 වන නියෝගය අනුව එවන් යම් දැන්වීම් පුවරුවක් හෝ ප්‍රචාරක පුවරුවක් හෝ සිතුවම්, අක්ෂර වැනි ඕනෑ ම නිරූපණයක් ප්‍රදශනය සඳහා අදාළ බලධාරීන්ලබා දෙන අවසරය අත්‍යවශ්‍යය.
එහි උපලේඛනයේ දක්වා තිබෙන අදා1ල බලධාරී ආයතන මාලාවේ 14 වන අංකය යටතේ තිබෙන්නේ "මහ නගර සභා ආඥා පනත යටතේ ස්ථාපනය කරන ලද මහ නගර සභා"වේ.
ඒ අනුව අදාළ චිත්‍රය ප්‍රදර්ශනය කිරීමට තිබෙන භූමිය කොළඹ මහ නගර සභාවට අයත් වූ නිසා කොළඹ මහ නගර සභාවෙන් ඊට අදාළ අවසරය ලබා ගත යුතු වේ.
මේ අවස්‍ථාවේදී ඔවුන් එම අවසරය ලබා තිබූ අතර එම ලිපියේ පිටපතක් මම ද දුටුවෙමි.
මෙසේ නිසි අවසරය සහිත චිත්‍රය ඉවත් කළේ, කිනම් පදනමකින් ද යන්න නොවැටහෙන්නකි.
කලකට ප්‍රථම තාප්පවල සහ බිත්තිවල අඳින චිත්‍රවලට ද මේ නියෝග මෙලෙසින් ම අදාළය. මේවා අතරින් මෙසේ අවසරය ලබා කළ බිත්ති සිතුවම් කොතෙක් තිබේ ද යන්නත් කුහුල දනවන්නකි.
කෙසේ වෙතත්, දරුවන් පිරිසක් තම සමාජ යුතුකම සහ වගකීම් ඉටු කිරීමට ගත් ප්‍රයත්නයට සහය දෙනු වෙනුවට ඔවුන් අධෛර්යවත් කිරීමටත්, ඔවුන් කරන්නට යෙදුණු සත්ක්‍රියාව කඩාකප්පල් වන හෝ ව්‍යාර්ථ වන සේ සිදුකළ ක්‍රියාව කිසිසේත් අනුමත කළ නොහැකි, අනුමත කළ නොයුතු සහ අමනෝඥ ක්‍රියාවක් ලෙස දකිමි.
අපගේ යුතුකම සහ වගකීම වන්නේ, තම අනාගතය පිළිබඳ වගකීම භාරගෙන, වඩාත් යහපත් අනාගතයක් වෙනුවෙන් යම් දායකත්වයක් ලබා දෙන දරුවන්ට ශක්තියක්, පිටිවහලක් සහ ධෛර්යයක් ලෙස ක්‍රියා කළ යුතුය යන්න බව මා සැම දා තරයේ විශ්වාස කරමි. ඒ වෙනුවෙන් ඔවුනට දිය හැකි උපකාරයක් හෝ ශක්තියක් වීමට කිසි විටකත් පසුබට නොවෙමි.
COMMENTS