පසුගිය යුද සමයේදී සිදුවූවා යැයි කියන යුද අපරාධ හෝ මානව හිමිකම් කඩවීම් සම්බන්ධයෙන් ඕනෑම ජාත්‍යන්තර පරීක්ෂණයක් සඳහා පෙනී සිටීමට තම සෙබළුන් ස...
පසුගිය යුද සමයේදී සිදුවූවා යැයි කියන යුද අපරාධ හෝ මානව හිමිකම් කඩවීම් සම්බන්ධයෙන් ඕනෑම ජාත්‍යන්තර පරීක්ෂණයක් සඳහා පෙනී සිටීමට තම සෙබළුන් සූදානම් බව යුද හමුදාපති මහේෂ් සේනානායක මහතා පවසයි.
පසුගියදා ඔහු සහභාගි වූ උත්සවයක් අතරතුර මාධ්‍යවේදීන් හමුවේ අදහස් දක්වමින් මේ බව ප්‍රකාශ කර තිබේ.
අවසන් යුද සමයේදී රජයේ හමුදා විසින් යුද අපරාධ සිදුකළ බවට හා මානව හිමිකම් කඩවීම් සිදු වූ බවට දේශීයව හා ජාත්‍යන්තරව චෝදනා එල්ල වී ඇති අතර ඒ සම්බන්ධයෙන් ජගත් මානව හිමිකම් සමුළුවේදීද දිගින් දිගටම කතාබහට ලක් විය.
ඇතැම් පාර්ශ්වය මේ පිළිබඳව ජාත්‍යන්තර පරීක්ෂණයක් ඉල්ලා සිටි අතර කෙසේ වෙතත් රජය දිගින් දිගටම ප්‍රකාශ කළේ එවැනි සිදුවීම් සිදුව තිබේ නම් ඒ පිළිබඳව සොයා බැලීම සඳහා දේශීය යාන්ත්‍රණයක් ප්‍රමාණවත් වන බවයි.
මේ අතර හිටපු හමුදාපති අමාත්‍ය සරත් ෆොන්සේකා මහතා ප්‍රකාශ කර තිබෙන්නේ අපරාධවලට සම්බන්ධ හමුදා සාමාජිකයන්ට එරෙහිව නිසි පරිදි නීතිය ක්රියාත්මක නොකිරීම නිසා රටම ජාත්‍යන්තරය ඉදිරියේ හෑල්ලු වී ඇති බවයි. විවිධ ජාත්‍යන්තර අතපෙවීම්වලට ලක්වන්නේ ඒ නිසා බව ද ඔහු පවසා තිබෙනවා.
මානව හිමිකම් කඩවීම් සම්බන්ධයෙන් හා යුද සමයේ සිදු වූ සිදුවීම් සම්බන්ධයෙන් 2015 වසරේදී සම්මත කර ගත් ජගත් මානව හිමිකම් යෝජනාවේ ඇතැම් නිර්දේශ ක්‍රියාත්ම කිරීමට රජය තවමත් අසමත් වී ඇති අතර මේ නිසා වහාම ජාත්‍යන්තර පරීක්ෂණයක් පැවැත්විය යුතු බවට වන මතය ශක්තිමත් වී තිබෙනවා.
යුද හමුදාපතිවරයා පවසන්නේ එවැනි පරීක්ෂණයක් සිදු වන්නේ නම් ඊට මුහුණදීමට යුද හමුදාව සූදානම් බවයි. යුද සමයේදී හමුදා සාමජිකයන් අතින් මානව හිමිකම් කඩවීම් හෝ යුද අපරාධ සිදුව නොමැති නිසා එවැනි පරීක්ෂණයක් සඳහා මුහුණ දීම සම්බන්ධයෙන් කිසිදු ගැටලුවක් නොමැති බවයි ඔහු පවසන්නේ.
COMMENTS