ඔක්‌ 25, 2018 10:49 නලින් දිල්රුක්ෂ සංචාරයට සීමා මායිම් නැත. ඒ ආශ්වාදයට ද සීමා මායිම් නැත. එකිනෙකා විවිධාකාරයට විනෝදාශ්වා...
ඔක්‌ 25, 2018 10:49
සංචාරයට සීමා මායිම් නැත. ඒ ආශ්වාදයට ද සීමා මායිම් නැත. එකිනෙකා විවිධාකාරයට විනෝදාශ්වාදය ලබති. අද අප ඔබ වෙත ගෙන එන්නේ නැවුම් සංචාරයක් තුළ ලබාගත් අපූරුම වින්දනයක මතක සටහනකි.
සංචාරයට කැමැත්තෝ විවිධ ආකාරයේ සංචාරයන් තෝරා ගනිති. තමන් පෙර කල නොගිය ස්ථානයකට යෑමට බොහෝ පිරිස් රුචියක් දක්වති. මුහුද ආශ්‍රිතව විවේකීව සිත්සේ විනෝද වන්නට කදිම ස්ථානයක සංචාරක මතක සටහනකි මේ.
අද අපේ සංචාරය ඉරක්කණ්ඩි මුහුදු තීරය හා සින්නකරච්චි කළපුවේ වෙතට යි. කොහෙද මේ ඉරක්කන්ඩි තියෙන්නේ. ශ්‍රී ලංකාවේ නැගෙනහිර පළාතේ ත්‍රිකුණාමලය නගරයට කිලෝමීටර් 18ක් පමණ ඔබ්බෙන්. ඔබට වඩාත් පහසු විදිහට කියනවා නම් ඔබ දන්න නිලාවේලි මුහුදු තීරය කිලෝමීටර් තුන හතරක් එපිටින්. ශ්‍රී ලංකාවේ දිගම පාලම් අතර දිගින් තුන්වැනි ස්ථානය ගන්නා ඉරක්කන්ඩි පාලම පසුකර මද දුරක් යනවිට ඉරක්කන්ඩි මුහුදු තීරය හමුවේ.
ඉරක්කණ්ඩි කොරල් පරය යනු නැඟෙනහිර වෙරල තීරයේ තිබෙන සුන්දරම කොරල් තීරයයි. විසිතුරු මුහුදු මත්ස්‍යයින්, කුඩා ප්‍රමාණයේ මෝරුන්, මෙන්ම ඉතා අලංකාර කොරල් පර සමූහයකින් යුක්ත මේ ඉරක්කණ්ඩි මුහුදු තීරය තවමත් ප්‍රසිද්ධ නැති නිසංසල වගේම ඉතා සුන්දර මුහුදු තීරයකි. සින්න කරචිචි කලපුවේ මෝය කටත් දර්ශණීය ඉරක්කණ්ඩි පාලමත් ඉරක්කණ්ඩි මුහුදු තීරයේ සුන්දරත්වය දෙගුණ තෙගුණ කරයි.
ඉරක්කණ්ඩි සුන්දර මුහුදු තීරය එක් පසකින් ද, අනිත් පසින් සින්නකරච්චි කළපුව ද පිහිටා ඇත. තවමත් සංචාරක ආකර්ෂණය මහ ඉහළින් නොලැබුව ද නිලාවේලි මුහුදු තීරය ටත් වඩා අතිශය සුන්දර ස්ථානයක් බව එහි ගිය අපට දක්නට ලැබිණි. මෙහි ඇති විශේෂත්වය නම් කලපුව තුළ පිහිටි සාගර උද්‍යානයයි.
එහි මැනවින් කොරල් පර වැඩී ඇත. කරදිය මිරිදිය මිශ්‍ර වතුරේ ගැවසෙන අතිශය සුන්දර මත්‍ය ගහනයක්ද මේ කළපුවේ වෙයි. නොගැඹුරු පැහැදිලි දිය සහිත කළපුවේ මේ කොරල් පර අතර සිට සුන්දරත්වය නැරඹීමට හැකිවීම ම භාග්‍යයකි.
දැනට මේ ස්ථානයේ සංචාරකයන් සඳහා සේවා සපයන ආයතක දෙකක් පමණ පිහිටුවා ඇති අතර ඔවුන් ගේ උපදේශකයන්ගේ මග පෙන්වීම යටතේ මේ කොරල් නැරඹීමටත් බෝට්ටු සවාරි, ස්නොක්ලින්(Snorkeling), කායකින් (Kayaking) වැනි ජල ක්‍රීඩාවන්හි නිරත වීමටත් හැකිය. ජිවිතාරක්ෂක උපකරණ ආදිය ද මෙහිදි ඔවුන්ගෙන් ලබා ගැන්මට හැකියාව ඇත.
කිසිවකුගේ සහය නොලබා වුවත් මෙහි සිත් සේ විනෝද විය හැකි නමුත් ඒ උපදේශකයෙකුගේ මග පෙන්වීම ලබාගැන්ම කළපුවේ කොරල්පරයේ ආරක්ෂාවට හිතකරය. මන්ද යත් අප නොදැන කොරල් මත ඇවිදින්නට බලන්නට ගියහොත් මේ අගනා කොරල් පරයද විනාශයට ලක්වන්නට ඉඩ ඇත.
වඩාත්ම සුන්දර දසුන උදාවන්නේ හිරු උදාවත් සමගයි. රක්තවර්ණ වන නැඟෙනහිර ක්ෂිතිජය ඔස්සේ හිරු උදාවේ චමත්කාරය වචනයෙන් විසිතර කළ නොහැක. දිනක එය නැරඹිය යුතුමය. ත්‍රිකුණාමල සංචාරයකදී රාත්‍රී නවාතැන ලෙස ඔබ මේ ඉරක්කණ්ඩි තෝරාගන්න. තාමත් වඩා සංචාරක අවධානයට ලක්ව නැති හෙයින් මෙහි නවාතැන් පහසුකම් ආදියද සාධාරණ මිල ගණන්වලට ලබා ගත හැකිය.
ඉරක්කණ්ඩි සිට බලන විට සුප්‍රකට පරවි දුපතද අපට දිස්වේ. මෙහි සිට බෝට්ටු මගින් එහි යාමට ද හැකියාව ඇත.
ඉරක්කණ්ඩි සංචාරයක ඔබ නිරත වන්නේ නම් ඔබට නැරඹිය හැකි අනෙක් තැන් වන්නේ කන්නියා උණුවතුර ළිං, තිරියාය ගිරිහඩු සෑය හා ලංකාවට ආවේනික වූ මුහුදු තීරයක් සහිත ආරාණ්‍ය සේනාසනයක් වූ අරිසිමලේ යි. අරිසිමලේ යනු එහි වැල්ල සැබැ සහල් ඇට මෙන් පැවතීමයි. අරිසිමලේ මුහුදු තීරයද දිය නැමට ආරක්ෂිත ස්ථානයකි.
කොළඹ සිට කුරුණෑගල හබරණ ත්‍රිකුණාමලය හරහා යන්නේ නම් දුර ප්‍රමාණය කිලෝ මීටර් 280ක් පමණ වයෙි. ඔබේ මී ළග නැඟෙනහිර චාරිකාව සැලසුම් කිරීමේදී ඉරක්කණ්ඩි යන්නට අමතක නොකරන්න. තාමත් සුරක්ෂිතව පිරිසිදුව පවතින ඒ වෙරළ තීරය අපද්‍රව්‍යයන්ගෙන් කිළිටි නොකරන්න. අපේ ඉල්ලීම එයයි.
චාරිකා සටහන නලීන් දිල්රුක්ෂ.
COMMENTS