මන්නාරම සතොස තොග ගබඩාව අසලින් හමු වූ සමූහ මිනී වළෙන් හමුවන මිනිස් ඇට සැකිළි ප්‍රමාණය පිළිබදව පෙර තක්සේරුවක් කිරීමට කිසිසේත්ම නොහැකි බව සමූ...
මන්නාරම සතොස තොග ගබඩාව අසලින් හමු වූ සමූහ මිනී වළෙන් හමුවන මිනිස් ඇට සැකිළි ප්‍රමාණය පිළිබදව පෙර තක්සේරුවක් කිරීමට කිසිසේත්ම නොහැකි බව සමූහ මිනී වළේ කැණීම් බාර නිලධාරීන් ප්‍රකාශ කරයි.
සැප්තැම්බර මස අද (04) උදෑසන කැණීම් කටයුතු ආරම්භ කළ අවස්ථාවේද මිනිස් ඇටසැකිළි දෙකක් හමු වී ඇති අතර ඒවා සමගින් මේවන විට හමු වූ මිනිස් ඇටසැකිළි ප්‍රමාණය එකසිය එකොළහක් වී තිබේ.
මෙසේ හමු වූ මිනිස් ඇටසැකිළි පරීක්ෂණ කටයුතු සදහා යවා ඇති නමුත් මුලදී අධිකරණ තීන්දුවක්ද ලබා ගත් අන්දමට මේ ඇටසැකිළි ඇමරිකාවේ ෆ්ලොරීඩා විශ්ව විද්‍යාලයේ රසායනාගාරය වෙත යැවීමේ කටයුතු බලධාරීන්ට තව දුරටත් ප්‍රමාද කිරීමට සිදුව ඇත.
මෙම සමූහ මිනී වළෙන් මෙතරම් මිනිස් ඇටසැකිළි ප්‍රමානයක් හමු වන බවට විශ්වාස නොකළ අතර ඒ අවස්ථාවේදී තීරණය කරණ ලද්දේ හමු වූ මිනිස් ඇටසැකිලි ප්‍රමාණය ඇමරිකාවට යැවීමටය.
නමුත් ඊට දින කීපයකට පසුව මිනී වළේ තිබී කාන්තාවන්ට හා ළමයින්ට අයත් ඇටසැකිළි හමුවීමෙන් පසුව දැන් තීරණය කොට ඇත්තේ මේ සමූහ මිනී වළෙන් හමුවන සියළුම ඇටසැකිළි හමුවීමෙන් පසුව එම ඇට සැකිලි සම්බන්ධයෙන් තීරණයක් ගැනීමටය.
දැනට පවතින තත්ත්වය අනුවද මේ ඇටසැකිළි සම්බන්ධයෙන් තීරණයක් ගැනීම විශාල ප්‍රශ්නයකට ලක්ව තිබේ. ඇටසැකිළි 111 ක් වැනි විශාල ප්‍රමාණයක් ඇමරිකාවට යවා ඒ සම්බන්ධයෙන් කාබන් පරීක්ෂණයක් පවත්වා වාර්තා ලබා ගැනීමට විශාල මුදලක් වැය වීම ඊට හේතුවයි.
මේ සම්බන්ධයෙන් වැයවන මුදල විශාල නිසා එම මුදල දැරීමට කිසිවෙකුත් එකග නොවන තත්ත්වයක් දැනටමත් පැන නැගී තිබේ.
(දිනසේන රතුගමගේ)
COMMENTS