ඒකාබද්ධ විපක්ෂයේ මන්ත්‍රීවරුන් නියෝජනය කරන ශ්‍රී ලංකා පොදුජන පෙරමුණේ තිරය පිටුපස නායකයා සේ කටයුතු කළ බැසිල් රාජපක්ෂ මහතා වෙනුවට එම ස්ථාන...
ඒකාබද්ධ විපක්ෂයේ මන්ත්‍රීවරුන් නියෝජනය කරන ශ්‍රී ලංකා පොදුජන පෙරමුණේ තිරය පිටුපස නායකයා සේ කටයුතු කළ බැසිල් රාජපක්ෂ මහතා වෙනුවට එම ස්ථානය හිටපු ජනපති රාජපක්ෂගේ නියමයෙන් ඔහුගේ පුත් නාමල් රාජපක්ෂය මන්ත්‍රීවරයාට හිමිවී ඇතැයි 'අනිද්දා' පුවත්පත වාර්තා කර ඇත.
මේ අනුව එළැඹෙන 05 වෙනිදා පැවැත්වෙන 'ජනබලය කොළඹට' මැයෙන් වූ ජනරැළියේ සංවිධාන කටයුතු නාමල් රාජපක්ෂ මහතාගේ නායකත්වයෙන් යුතු තරුණ පෙරමුණ යටතට පත් කර ඇත.
ඒ පිළිබව මහින්ද රාජපක්ෂ මහතා දිනේෂ් ගුණවර්ධන, විමල් වීරවංශ, වාසුදේව නානායක්කාර වැනි ඒකාබද්ධ විපක්ෂයේ ප්‍රබලයන්ට කතාකර නාමල් රාජපක්ෂ මහතාට සහාය දෙන්නැයි පවසා ඇති බව ද එම පුවත් වාර්තාවේ දැක්වේ.
මෙම තීරණයත් සමග පසුගිය කාලයේ නාමල් රාජපක්ෂ මහතා ප්‍රධාන කථිකයා වෙමින් බොහෝ ආසන තුළ පක්ෂයේ බිම් මට්ටමේ සාමාජිකයන් අමතා ඇත.
ඉන්පසු ඔහු අගෝස්තු 20 වැනිදා ෆේස්බුක් සමාජ ජාලයේ සිය ගිනුම උපයෝගීකර ගනිමින් ජනතා ප්‍රශ්නවලට පිළිතුරු ලබා දී ඇත.
ඒකාබද්ධ විපක්ෂයට හිතවත් මාධ්‍ය තුළ නාමල් රාජපක්ෂ මහතාට මේ දිනවල වැඩි ඉඩක් වෙන් වන්නේ ඔහුගේ මෙම නව ආගමනය නිසා බව යැයි දැනගන්නට ලැබේ.
මහින්ද රාජපක්ෂ මහතාගේ මෙම තීරණයත් සමග නාමල් රාජපක්ෂ මහතාට හිතවත් ඒකාබද්ධ විපක්ෂයේ තරුණ මන්ත්‍රීවරුන් වන ශෙහාන් සේමසිංහ, කංචන විජේසේකර, කනක හේරත්, දිලුම් අමුණුගම, ඩීවී චානක, රොෂාන් රණසිංහ, පියල් නිශාන්ත වැනි මන්ත්‍රීවරුන්ගේ සහ නාමල් රාජපක්ෂ මහතාට හිතවත් පළාත් පාළන නියෝජිතයින්ගේ ප්‍රධානත්වයෙන් මෙම සංවිධාන කටයුතු සිදුවන බව දැනගන්නට ලැබේ.
මෙම තත්වය මත ඒකාබද්ධ විපක්ෂයේ බොහෝ දෙනෙකු තුළ දැඩි කළකිරීමක් ඇති වී තිබෙන බවත් ඒ නිසා ඔවුන් සිටින්නේ දැඩි නොසතුටෙන් බවත් දැනගන්නට ලැබේ.
(අනිද්දා)
COMMENTS