මීළඟ ජනාධිපතිවරණයේ අපේක්ෂකයෙක් ලෙස හිටපු ආරක්ෂක ලේකම් ගෝඨාභය රාජපක්ෂ මහතා ඉදිරිපත් වීම වැළැක්වීම සඳහා ශ්‍රී ලංකාවේ ඇමෙරිකානු තානාපති කා...
මීළඟ ජනාධිපතිවරණයේ අපේක්ෂකයෙක් ලෙස හිටපු ආරක්ෂක ලේකම් ගෝඨාභය රාජපක්ෂ මහතා ඉදිරිපත් වීම වැළැක්වීම සඳහා ශ්‍රී ලංකාවේ ඇමෙරිකානු තානාපති කාර්යාලය විසින් රහසිගත මෙහෙයුමක් දියත් කරන බව ‘දිවයින' ඉරිදා පුවත්පත වාර්තා කර ඇත.
එම පුවත් වාර්තාවට අනුව, අතුරුදන් වූවන් පිළිබඳ පැමිණිලි විමර්ශනය කිරීමේ ජනාධිපති කොමිෂන් සභාවේ සභාපති මැක්ස්වෙල් පරණගම මහතා හමුවී ඇති ඇමරිකානු තානාපති කාර්යාල ප්‍රධානීන් පිරිසක්, හිටපු ආරක්ෂක ලේකම්වරයාට එරෙහිව ඇති යුද අපරාධ චෝදනා පිළිබඳව ඔහුගෙන් විමසා තිබේ.
එහිදී තානාපති නිලධාරීන් පවසා ඇත්තේ ගෝඨාභය රාජපක්ෂ මහතා, 2020 ජනාධිපතිවරණයට ඉදිරිපත් වීම වැළැක්වීම සඳහා ඔහු විසින් කරන ලද යුද අපරාධ පිළිබඳ වාර්තා තමන්ට අවශ්‍ය වී ඇති බවයි.
ෆීල්ඞ් මාෂල් සරත් ෆොන්සේකා කළැයි කියන ප්‍රකාශයක් මත හෙළිවුණු සුදු කොඩි සිද්ධිය සම්බන්ධයෙන් අතුරුදන් වූවන් සහ පැහැරගැනීම් පිළිබඳ මැක්ස්වල් පරණගම කොමිසමේදී හෙළි වූ කරුණුවලට ගෝඨාභය රාජපක්ෂ මහතාගේ සම්බන්ධයක් තිබේ ද යන්න ගැන ඇමෙරිකානුවන් උනන්දුවන බව දැනගන්නට තිබේ.
විශේෂයෙන් එල්.ටි.ටි.ඊ. සංවිධානයේ පොලිස්පති නඬේසන් මහතා ඝාතනය කර ඇත්තේ ඔහු හමුදාවට යටත් වූ පසු ගෝඨාභය රාජපක්ෂ මහතාගේ නියෝගය පරිදි ද යන්න ඇමෙරිකානුවන් සොයා බලමින් සිටින බව දැනගැනීමට ඇත.
මෙම කතාබහ පිළිබඳ දැනගැනීමට විශ්‍රාමික මහාධිකරණ විනිසුරු මැක්ස්වෙල් පරණගම මහතාට අප විසින් දුරකතන ඇමතුමක් ලබාගත්තද ඒ මහතා සම්බන්ධ කරගැනීමට නොහැකි විය.
COMMENTS