සිංහරාජ රක්ෂිතයේ සැරිසරන අලි දෙදෙනා තවදුරටත් එම රක්ෂිතයේම රඳවා තබන ලෙස ජනාධිපති මෛත්‍රීපාල සිරිසෙන මහතා පරිසර අමාත්‍යාංයේ ලේකම්වරයාට සහ වන...
සිංහරාජ රක්ෂිතයේ සැරිසරන අලි දෙදෙනා තවදුරටත් එම රක්ෂිතයේම රඳවා තබන ලෙස ජනාධිපති මෛත්‍රීපාල සිරිසෙන මහතා පරිසර අමාත්‍යාංයේ ලේකම්වරයාට සහ වන සංරක්ෂණ දෙපාර්තමේන්තුවේ අධ්‍යක්ෂ ජනරාල්වරයා වෙත උපදෙස් ලබා දී තිබුණද එම උපදෙස් තමන් වෙත ලැබී නොමැති බව වනජීවී නිලධාරීහු අවධාරණය කරති.
ලෝක උරුම රක්‍ෂිතයක් වූ සිංහරාජ වනයේ සිටින අලි දෙදෙනාව අල්ලා ඉවත් කිරීමට වනජීවී අමාත්‍ය සරත් ෆොන්සේකා මහතාගේ නියෝගයෙන් ආරම්භ කර තිබූ මෙහෙයුම් වහාම ක්රියාත්මක වන පරිදි අත්හිටුවන ලෙස ජනාධිපතිවරයා ඊයේ (14) නියෝගයක් ලබා දී තිබේ.
තෙත් කලාපීය පරිසර පද්ධතියක වෙසෙන අවසන් අලි දෙදෙනා ඇල්ලීමට වනජීවී නිලධාරී කණ්ඩායම් කිහිපයක් අලි පටවාගෙන යනු ලබන ලොරියක් ද රැගෙන සිංහරාජ රක්‍ෂිතයට ඊයේ (14) ළඟා වූ බව වනජීවී නිලධාරීහු සඳහන් කළහ.
අලි දෙදෙනාව නිර්වින්දනය කොට ඇල්ලීම වනජීවී පශු වෛද්‍යවරුන් විසින් සිදු කළ යුතු කාර්යයකි. වනජීවී පශු වෛද්‍යවරුන් අලි දෙදෙනා ඇල්ලීමෙන් ඉවත් වීම නිසා ගුවන් හමුදාවේ පශු වෛද්‍ය නිලධාරීන් කැඳවීමට සරත් ෆොන්සේකා මහතා පියවර ගෙන තිබිණි.
අලි ඇල්ලීම හෝ වනජීවී මෙහෙයුම් සම්බන්ධයෙන් අත්දැකීම් නොමැති ගුවන් හමුදා පශු වෛද්‍යවරුන් මෙම මෙහෙයුමට යෙදවීමෙන් එම සතුන් දෙදෙනාව ජීවිතක්‍ෂයට පත්වීමේ හෝ වනජීවී නිලධාරීන්ගේ ජීවිත අවදානමට ලක්වීමේ ඉඩකඩක් තිබූ බව වනජීවී සෞඛ්‍ය අංශ නිලධාරීහු සඳහන් කරති.
ලෝක උරුම රක්‍ෂිතයක වෙසෙන තෙත් කලාපීය අවසන් අලි දෙදෙනාව අල්ලා බලහත්කාරයෙන් වෙනත් පරිසරයකට රැගෙන යෑමට සරත් ෆොන්සේකා මහතා නියෝග කරන්නේ දැව, දඩ මස් සහ වල්ලපට්ටා ජාවාරම්කරුවන්ගේ මෙන්ම නීති විරෝධී පතල් කැණීම්වල නිතර වන්නන්ගේ ඉල්ලීමකට අනුව බව සුරකිමු ශ්‍රී ලංකා සංවිධානයේ සභාපති පාහියංගල ආනන්ද සාගර හිමියෝ පවසති.
එම අලි දෙදෙනා අල්ලා ඉවත් කළහොත් සිංහරාජය ලෝක උරුම ලැයිස්තුවෙන් ඉවත් කිරීමට සිය අවධානය යොමු කරන බව එක්සත් ජාතීන්ගේ සංවිධානය පෙරේදා (13) වනජීවී සංරක්ෂණ දෙපාර්තමේන්තුවට දැනුම් දී තිබිණි.
COMMENTS