යහපාලන ආණ්ඩුව විසින් රට තුළ කාලිංග මාඝ පන්නයේ සංහාරයක් ආරම්භ කොට ඇතැයි එක්සත් ජාතික නිදහස් පෙරමුණේ මහ ලේකම් නීතීඥ මෛත්‍රී ගුණරත්න මහතා පවස...
යහපාලන ආණ්ඩුව විසින් රට තුළ කාලිංග මාඝ පන්නයේ සංහාරයක් ආරම්භ කොට ඇතැයි එක්සත් ජාතික නිදහස් පෙරමුණේ මහ ලේකම් නීතීඥ මෛත්‍රී ගුණරත්න මහතා පවසයි.
ඒ මහතා මේ බව ප්‍රකාශ කරන ලද්දේ බෞද්ධ උරුමයන් ආරක්ෂා කිරීම සම්බන්ධයෙන් සාකච්ඡා කිරීමට බෞද්ධ භික්ෂුන් වහන්සේලා සමග රාජගිරියේ පක්ෂ මුලස්ථානයේ පැවති සාකච්ඡාවකට සහභාගී වෙමිනි.
එහිදී ඒ මහතා මෙසේ අදහස් දැක්වීය.
“අපි පක්ෂයක් විදියට සියළුම ආගම් වලට එක වගේ ගරු කරන පිරිසක් ඒ වගේම ඒ සියළු ජාති ආගම් වල පවතින විවිධත්වයට, විශ්වාසය හා ඇදහිලි වලට ගරු කරන පක්ෂයක් බව මුලින්ම කියන්න අවශ්‍යයි. නමුත් අද අමුතු ප්‍රවණතාවක් රට තුළ පැන නැගෙමින් තිබෙන බව අපිට දක්නට ලැබෙනවා. ඒ තමයි මේ බෞද්ධ ජනතාවගේ වෙහෙර විහාර කඩා බිද දමන එහෙම නැත්නම් විහාරස්ථාන වලට බලෙන් ඇතුල් වෙලා ඒවගේ අයිතිය හා පිහිටීම ගැන ප්‍රශ්න කරන අසංස්කෘතික සංස්කෘතියක ප්‍රවණතාවයක් ඇතිවී තිබීම. මේ පිලිබදව මේ ආණ්ඩුව දක්වන්නේ ඉතාම ඇල් මැරුණු දෙබිඩි පිළිවෙතක් බව කියන්න කැමතියි. එක තැනක නෙවෙයි පසුගිය කාලය පුරාවට අපි දැක්කා ලංකාවේ බොහෝ තැන් වල රටක් විදිහට අපිට ඉතා වැදගත් පුරාවිද්‍යාත්මක වටිනාකමකින් යුක්ත ස්ථාන. ඒ වගේම බෞද්ධ වෙහෙර විහාර කඩා බිද දමා ඇති බවට චෝදනා එල්ල වුනා. වෙනදා මේ දේවල් වුනේ හොරාට අද එලිපිටම මේ දේවල් වෙන්න පටන් අරන්.”
“ආසන්න සිදුවීම තමයි දුටුගැමුණු රජතුමාගේ අවසාන සංග්‍රාම භූමිය වුණු අනුරාධපුර විජිතපුර බළකොටුව ප්‍රදේශයේ බැලුම්ගල කියන ස්ථානය නිවාස ව්‍යාපෘතියක් මුවාවෙන් බුල්ඩෝසර් යොදා විනාශ කොට තිබීම. අපි අහනවා ආණ්ඩුවෙන් කොහොමද මේ දේවල් මේ විදිහට වෙන්නේ අනුරපුරය පිළිබදව දන්නා කුඩා ළමයෙක් වුනත් දන්නවා අනුරාධපුරය කියන්නේ පුරාවිද්‍යාත්මක නගරයක් සාමාන්‍ය ගොවි මහත්තයෙක් උදැල්ලක් පොලවට ගැහුවත් පුරාවිද්‍යාත්මක වටිනාකමකින් යුත් යමක් උදැල්ලේ ගැටෙන තරමට ඒ භූමිය ඓතිහාසිකයි. ඒ නිසා ආණ්ඩුවට හා මේ ව්‍යාපෘතිය භාර ඇමතිවරුන්ට හා නිලධාරීන්ට මේ ප්‍රශ්ණයට පපඩම් උත්තර දෙන්න අයිතියක් නැහැ. අපි මාධ්‍ය තුලින් දැක්කා පසුගිය දවස් ටිකේ දෙමළ ජාතික සන්ධානය නටපු නාඩගම් සුමන්තිරන් කරපු ප්‍රකාශ උතුරු නැගෙනහිර බෞද්ධ පන්සල් හදන්න ඉඩ දෙන්නේ නැහැ කියල කරපු ප්‍රකාශ මේ දේවල් එකකට එකක් බොහෝ දුරට සමාන වෙනවා.”
“රටේ ඉතිහාසය වෙනස් කරන්න රටේ ජාතික උරුමයන් වනසන්න තාවකාලිකව පත්වෙන ආණ්ඩු වලට අයිතියක් නැහැ. ආණ්ඩු එනව යනවා රාජ්‍ය කියන දේ ස්ථාවරයි. ඒ නිසා රාජ්‍ය සතු ස්ථාවර භාවය විනාශ කරන්න ආණ්ඩු වලට ව්‍යාපෘති හදන්න බැහැ. මේ රටේ ඉතිහාසය විකෘති කරන්න, ඒවා විනාශ කරන්න අවශ්‍ය කණ්ඩායම් රට තුල වේගයෙන් ක්රියාත්මක වන බව පේන්න තියෙනවා. මේ විනාශය නතර කරන්න ආණ්ඩුව කටයුතු නොකලොත් මීට සම්බන්ධ සියළුදෙනා නීතිය ඉදිරියට ගේන්න අපි පක්ෂයක් විදියට නුදුරේදීම කටයුතු කරනවා. විශේෂයෙන්ම අපි යහපාලන ආණ්ඩුවට අවධාරණය කරනවා පුරාවිද්‍යාත්මක දේ වගේම ජාතික උරුමයන් කියන දේවල් රටක් එක ආගමකට එක ජාතියකට අයිති දේවල් නොවෙයි. මේ රටේ ඉතිහාසය. ඒ නිසා ආණ්ඩුව මේ පෙන්වමින් ඉන්නේ ආණ්ඩුව රටට හා සමස්ත ඉතිහාසයට ද්‍රෝහි විමේ ලක්ෂණ. ඒ වගේම අපි ආණ්ඩුවට කියනවා නැවත කාලිංග මාඝ යුගයකට රට අරන් යන්න හදන්න එපා කියලා. අද වෙනකොටත් මේ ආණ්ඩුව 20 වැනි ව්‍යවස්ථා සංශෝධනය හරහා බෙදුම්වාදී උවමනා ඉටුකරමින් ඉන්න බව අපිට පේන්න තියෙනවා. ඒ සදහා අවශ්‍ය ඓතිහාසික පරිසරය නිර්මාණය කර ගැනීමට නම් මේ බුල්ඩෝසර් දමා රටේ ඉතිහාසය සමතලා කරලා කරන්න හදන්නේ ඒක ආණ්ඩුව ලොකු වරද්දා ගැනීමකට අත වැනීමක් කියලත් අපි අවධාරණය කරන්න කැමතියි”යැයිද ඒ මහතා වැඩිදුරටත් පැවසීය.
මෙහිදී බෞද්ධ භික්ෂුන් වහන්සේලා විසින් බුද්ධ ශාසන ජනාධිපති කොමිෂන් වාර්තා නිර්දේශ ක්රියාත්මක කිරීම සදහා මැදිහත් වීමක් කරන්නැයි එක්සත් ජාතික නිදහස් පෙරමුණේ මහ ලේකම් මෛත්‍රී ගුණරත්න මහතාට ආරාධනාවක්ද කලේය.
COMMENTS