ස්වල්ප දෙනෙකුගේ විනාශකාරී ක්‍රියාවක් හේතුවෙන් සමස්ත ලෝකයෙන්ම චෝදනාවට ලක් වී සිටින්නේ සිංහල ජාතිය බව අග්‍රාමාත්‍ය රනිල් වික්‍රමසිංහ මහතා පැ...
ස්වල්ප දෙනෙකුගේ විනාශකාරී ක්‍රියාවක් හේතුවෙන් සමස්ත ලෝකයෙන්ම චෝදනාවට ලක් වී සිටින්නේ සිංහල ජාතිය බව අග්‍රාමාත්‍ය රනිල් වික්‍රමසිංහ මහතා පැවසීය.
වැල්ලම්පිටිය ප්‍රදේශයේදී ඊයේ (11) පැවති ආගමික උත්සවයකට සහභාගී වෙමින් අගමැතිවරයා මේ බව පවසා සිටියේය.
එහිදී ඒ මහතා මෙසේ අදහස් දැක්විය.
“ස්වල්ප දෙනෙකුගේ විනාශකාරී ක්‍රියාවක් හේතුවෙන් සමස්ත ලෝකයෙන්ම චෝදනාවට ලක් වී සිටින්නේ සිංහල ජාතියයි. මේ සිදුවීම හරහා අප ලෝකයේ වෙනත් රටවල් සමඟ සංසන්දනය කිරීමේ තත්ත්වයක් ඇතිව තිබෙනවා. ඒ වගේම මෙය දකුණු ආසියාවේ ජිවත් වන අනෙකුත් බෞද්ධ ජනතාවටත් බලපානවා. මෙම විනාශකාරී ක්‍රියාව පිළිබද පණිවුඩය ඉතා ඉක්මණින් ලෝකය පුරා පැතිර ගොස් තිබෙනවා. කොළඹ නගරයෙන් පසු සංචාරකයන් වැඩි වශයෙන් පැමිණෙන නගරයක් ලෙස නුවර නගරය හැඳින්විය හැකිය. එමෙන්ම සංචාරකයින් ලෙස ශ්‍රී ලංකාවට පැමිණෙන අරාබි ජාතිකයින්ගෙන් විශාල ප්‍රමාණයක් නුවරට පැමිණෙනවා. නමුත් පසුගිය දිනවල නුවර ප්‍රදේශයේ ඇති වූ තත්ත්වය මත සංචාරක කර්මාන්තයට විශාල බලපෑමක් එල්ල වී තිබෙනවා. මෙම ගැටලුව පිළිබදව වහා අවධානය යොමු කර නුවර නගරය ඉතා ඉක්මනින සාමාන්‍ය තත්ත්වයට පත් කරන්න යැයි නුවර ප්‍රදේශයේ සංචාරක කර්මාන්තය මුල් කරගෙන ත්‍රිරෝද රථ ව්‍යාපාරයේ නිරත වන බොහෝ සිංහල පිරිස් මා සමඟ පවසා සිටියා.”
“මෙම තත්ත්වය තවදුරටත් පැවතුණහොත් සංචාරකයන්ගේ පැමිණීම අඩු වන නිසා අදායම් නොමැතිව දින ගණනාවක් ජිවත් වන්නේ කෙසේ දැයි ඔවුන් ප්‍රශ්න කරනවා. එසේ නම් මේ හරහා විශාල පාඩුවක් වූ බව අප පිළිගත යුතුයි. මෙම ගැටලුව ආරම්භ වුණේ එක් සිංහල රියදුරෙකුට බිමත්ව සිටී මුස්ලිම් තරුණයින් කිහිපදෙනෙකු පහර දීම නිසයි. එම සිදුවීමට අදාළ වරදකරුවන් වහාම නීතිය හමුවට ගෙන එන්නැයි මම පොලීසියට පැවසුවා. වරදකරුවන්ට දඬුවම් දීමේ ක්‍රියාවලිය සීග්‍ර කළ යුතුයි. ඒ වගේම මේ ගැටලුව ව්‍යාප්ත කිරීමට කටයුතු කළ පුද්ගලයින්ට නීතිය ක්රියාත්මක කරනවා. කෙසේ නමුත් මෙම සිදුවීම නුවර ප්‍රදේශයට පමණක් සිමා වුණා. මෙම අර්බුදකාරී තත්ත්වය නුවරින් ආරම්භ වී රට පුරා පැතිර යනු ඇතැයි බොහෝ දෙනා තුළ බියක් ඇතිව තිබුණා. එවැනි සැකයක් අප තුළත් ඇතිව තිබූ බව පැවසීය යුතුයි. නමුත් එවැනි තත්ත්වයක් ඇති වුණේ නැහැ. එය නවත්වා ගැනීමට අපට හැකි වුණා.”යැයිද ඒ මහතා වැඩිදුරටත් පැවසීය.
COMMENTS