මාර් 2, 2018 09:36 නලින් දිල්රුක්ෂ ශ්‍රී ලංකා ජාතික ක්‍රිකට් කණ්ඩායම නියෝජනය කළ සහ උපරිම දස්කම් පෑ ක්‍රීඩකයන් බොහෝදෙනකු බි...
මාර් 2, 2018 09:36
ශ්‍රී ලංකා ජාතික ක්‍රිකට් කණ්ඩායම නියෝජනය කළ සහ උපරිම දස්කම් පෑ ක්‍රීඩකයන් බොහෝදෙනකු බිහිකළ පාසල් ද්විත්වය වන කොළඹ ආනන්ද විදුහල සහ නාලන්දා විදුහල අතර පැවැත්වෙන 89 වැනි ‘සුලෝහිත සංග්‍රාමය’ ක්‍රිකට් තරගය මේ මස (මාර්තු ) 03සහ 04 දෙදින උදෑසන 10 සිට සවස 05.00 දක්වා එස්.එස්.සී. ක්‍රීඩාංගණයේ දී පැවැත්වීමට සියලු කටයුතු සංවිධානයකොට තිබේ.
මෙම දෙවිදුහලින් ටෙස්ට් සහ එක්දින ක්‍රීඩකයන් 60කට වැඩි සංඛ්‍යාවක් ශ්‍රී ලංකා ජාතික ක්‍රිකට් කණ්ඩායමට එක්කර තිබීම විශේෂත්වයකි. ශ්‍රී ලංකාවේ පළමු ටෙස්ට් ක්‍රිකට් නායක බන්දුල වර්ණපුර සහ ශ්‍රී ලංකාවේ සුවිශේෂි ක්‍රිකට් නායකයකු වන මහේල ජයවර්ධන, නාලන්දා විදුහලේ ද, 1996 වසරේ ලෝක කුසලාන දීනු ශ්‍රී ලංකා පිලේ නායකත්වය දැරූ අර්ජුන රණතුංග ආනන්ද විදුහලේ ද ආදි සිසුවෝ වෙති.
එමෙන්ම ශ්‍රී ලංකා කණ්ඩායමෙහි වත්මන් ප්‍රධාන පුහුණුකරු චන්දික හතුරුසිංහ,කණ්ඩායම් කළමනාකරුවන අසංක ගුරුසිංහ, පුහුණුකරුවකුවන තිලාන් සමරවීර සහ වත්මන් ටෙස්ට් ක්‍රිකට් නායක දිනේෂ් චන්දිමාල් ද මෙම දෙවිදුහලින් බිහිවීම සුවිශේෂත්වයකි.
ආනන්ද සහ නාලන්දා දෙවිදුහල් දායාද කළ සිදත් වෙත්තමුණි, අනුර රණසිංහ, අජිත් ද සිල්වා, ලලිත් කළුපෙරුම, බ්‍රෙන්ඩන් කුරුප්පු, රොෂාන් මහානාම, අසංක ගුරුසිංහ, මාවන් අතපත්තු, කුමාර ධර්මසේන, අවිෂ්ක ගුණවර්ධන, මහේල ජයවර්ධන සහ තිලාන් සමරවීර යන ක්‍රීඩකයෝ ක්‍රිකට් ක්‍රීඩාවට සේවයක් කළ ආදී ආනන්දියෝ සහ නාලන්දියෝ වෙති.
ආනන්ද -නාලන්දා මහා ක්‍රිකට් තරගය 1924 වසරේ සිට ආරම්භ කර ඇත. තරග 88 කදී ආනන්ද විදුහල තරග 12 ක් ද, නාලන්දා විදුහල තරග 6 ක් ද ජය ලබා ඇති අතර ඉතිරි තරග ජය පැරදුමින් තොරව අවසන් වී තිබේ. ආනන්ද විදුහල 2003 වසරේ දමින්ද කුලරත්නගේ නායකවත්වයෙන් ද, නාලන්දා විදුහල 1953 වසරේ ඩබ්ලිව්. ඩබ්ලිව්. සිල්වාගේ නායකත්වයෙන් ද අවසන් වරට ජය ලබා තිබේ.
සුලෝහිත සංග්‍රාමයේ මුල්ම ශතකලාභියා ලෙස වාර්තාගත වන්නේ නාලන්දා කණ්ඩායමෙහි පී.එම්.ජයතිලකය. ඔහු 1929 දී ලකුණු 111ක් රැස්කොට තිබේ. සුලෝහිතයේ වැඩිම ලකුණුලාභිය වන්නේ ශාන්ත කලවිටිගොඩය. ඔහු 1997 වසරේදී නොදැවී ලකුණු 149ක් රැස් කළේ සුලෝහිත සංග්‍රාමයේ ඉතිහාසය වෙනම පිටකට හරවමිනි.
මෙවර දෙවිදුහල්හිම කණ්ඩායම් සැලකිය යුතු දස්කම් දක්වා ඇත.
ළහිරු හිරන්‍ය මෙම තරග වාරයේදී ලකුණු 627 ක් රැස්කරමින් ආනන්ද විදුහල් පිලේ ප්‍රබලතම පිතිකරු බවට පත්ව සිටියි. දුෂාන් හෙට්ටිගේ(570) කණිෂ්ක රන්තිලක (520), කමේෂ් නිර්මාල්(467) නායක අසෙල් සිගේරා (423), ශමාල් හිරුෂාන් (409) ආනන්ද විදුහල් පිතිකරු ලැයිස්තුවේ සෙසු ප්‍රබලයෝ වෙති.
ආනන්ද විදුහල් පිලේ නායක අසේල් සිගේරා පන්දුවෙන් ද දස්කම් දක්වමින් මෙම තරග වාරයේ කඩුලු 50ක් දවා ගැනීමට සමත්ව සිටියි. දමින්ද රෙෂාන්( 24) සහ ශමාල් හිරුෂාන් (24) ආනන්ද විදුහල් පන්දු යැවීමේ බලැණිය ශක්තිමත් කරන සෙසු ක්‍රීඩකයන් වෙති.
මෙවර නාලන්දා විදුහලේ ප්‍රබලතම පිතිකරු ලෙස ලක්ෂිත රසාංජන හැඳින්විය හැකිය.ඔහු මෙම තරග වාරයේදී ලකුණු 780 ක් රැස්කළ අතර පසුසිය සුලෝහිත සංග්‍රාමයේ දී ශතකයක් රැස්කිරීමට ද සමත්විය. චමිඳු විජේසිංහ (570) සුහඟ විජේවර්ධන (627) අවිශ්ක පෙරේරා (558) දිල්හාර පොල්ගම්පළ (466) ලෙස පිත්තෙන් දස්කම්පෑ සෙසු නාලන්දීය ක්‍රීඩකයෝ වෙති.
පන්දු යැවීම අතින් නාලන්දාවේ කවීෂ මදුරප්පෙරුම කඩුලු 59ක් දවාගනිමින් ප්‍රබලයා බවට පත්ව ඇති අතර නායක ලක්ෂිත රසාංජන (49) චමිඳු විජේසිංහ (48) රවීන් ද සිල්වා (47) කඩුලු දවාගනිමින් පන්දුවෙන් දස්කම් පෑ නාලන්දාවේ පන්දු යවන්නන්ගේ බල ඇණියට ඇතුළත්ව සිටී.
89 වන වරට පවත්වනු ලබන සුලෝහිත සංග්‍රාමය මෙවර විචිත්‍රාංග සහ නවාංග රැසකින් සවිබල ගැන්වීමට ඒකාබද්ධ සංවිධායක කමිටුව සැලසුම්කොට තිබේ.මෙවර ඒකාබද්ධ කමිටුවෙහි ආනන්ද විද්‍යාලයේ සභාපතිවරයා ලෙස මංජුල විජේමාන්න කටයුතු කරනු ලබන අතර නාලන්දාවේ සභාපතිවරයා ලෙස මොහාන් ගුණදාස කටයුතුකරයි.
ආනන්ද කණ්ඩායම
පළමු පෙළ (ඉඳගෙන වමේ සිට)
රමේෂ් පෙරේරා මහතා(පුහුණුකරු)ප්‍රියංකර නන්දසේන මහතා(විෂය භාර ආචාර්ය )ජී.ඒ .ආර්.එල් පෙරේරා මහතා(නියෝජ්‍ය විදුහල්පති )අසෙල් සිගේරා (නායක)එස්.එම්.කීර්තිරත්න මහතා(විදුහල්පති )ළහිරු අත්තනායක (උප නායක)එම්.එස්.කේ.ගුණතිලක මහතා (නි.විදුහල්පති )ජගත් අල්විස් මහතා(ක්‍රීඩා භාර ආචාර්ය )
දෙවන පෙළ(සිටගෙන -වමේසිට)
දමින්ද රෙෂාන්,කණිෂ්ක රන්තිලකගේ,ගිෂාන් එදිරිසිංහ,හසිඳු ශාමික,දුෂාන් හෙට්ටිගේ,චාමික ගුණසේකර,ඛමේෂ් නිර්මාණ්,කළණ විජේසිරි,ශ්‍යමාල් හිරුෂාන්,සනත් දිසානායක,කවිඳු ගිම්හාන,ලක්ෂිත අමරසිංහ.
නාලන්දා කණ්ඩායම
ඉදිරි පෙළ
කීර්ති ගුණරත්න මහතා(ප්‍රධාන පුහුණුකරු )සමන් හෙට්ටිආරච්චි මහතා(විෂය භාර ආචාර්ය )ලක්ෂිත රසාංජන මනසිංහ(නායක)මහේෂිකා විජේරත්න මහත්මිය ( නියෝජ්‍ය විදුහල්පතිනිය)අජිත් වික්‍රම මහතා(නියෝජ්‍ය විදුහල්පති )තිලක් වත්තුහේවා මහතා(විදුහල්පති )වී.ආර්.පී කුමාර මහතා (නියෝජ්‍ය විදුහල්පති )මාලනී යටවර මහත්මිය (ක්‍රීඩා භාර ආචාර්ය )සුහඟ විජේවර්ධන(උප නායක)උමෙක්ෂ දිල්ෂාන් ,ප්‍රසන්න දහනායක මහතා (සහය පුහුණුකරු )
සිටගෙන (වමේ සිට දකුණ දක්වා)
රවීන් ද සිල්වා,කවීෂ් මදුරප්පෙරුම ,කළණ කත්‍රිආරච්චි,මනිම වීරකෝන්,රනිඳු ද සිල්වා,රුසිරු ද සිල්වා,සචිත ගුණතිලක,නිපුන් දේවින්ද,මධුෂාන් හසරංග,දිනේන්ද්‍ර කස්තුරිආරච්චි,චමිඳු විජේසිංහ ,අවිශ්ක පෙරේරා.
COMMENTS