දිවි නැඟුම සංවර්ධන දෙපාර්තමේන්තුවට අයත් රුපියල් දෙකෝටි අනූ හතර ලක්ෂයක මුදලක් වැය කොට මහින්ද රාජපක්ෂ මහතාගේ රුව ඇතුළත් ලිත් පනස් ලක්ෂයක් මු...
දිවි නැඟුම සංවර්ධන දෙපාර්තමේන්තුවට අයත් රුපියල් දෙකෝටි අනූ හතර ලක්ෂයක මුදලක් වැය කොට මහින්ද රාජපක්ෂ මහතාගේ රුව ඇතුළත් ලිත් පනස් ලක්ෂයක් මුද්‍රණය කර බෙදාහැරීමේ චෝදනාව යටතේ හිටපු අමාත්‍ය බැසිල් රාජපක්ෂ සහ දිවි නැඟුම සංවර්ධන දෙපාර්තමේන්තුවේ හිටපු අධ්‍යක්ෂ ජනරාල් කිත්සිරි රණවක යන අයට එරෙහි නඩුව මැයි මස 04 වනදා දක්වා කල් තැබීමට කොළඹ මහාධිකරණය තීරණය කර තිබේ.
අදාළ නඩුව අද කොළඹ මහාධිකරණ විනිසුරු ගිහාන් කුලතුංග මහතා හමුවේ කැඳවූ අවස්ථාවේ නීතිපතිවරයා වෙනුවෙන් පෙනී සිටි රජයේ ජ්‍යේෂ්ඨ අධි නීතිඥ සුදර්ශන ද සිල්වා මහතා කරුණු දක්වමින් කියා සිටියේ මෙම නඩුව ගිහාන් කුලතුංග මහතා ඉදිරියේ විභාගයට ගැනීම වලක්වාලමින් අභියාචනාධිකරණය ලබන 16 වනදා දක්වා බල පැවැත්වෙන පරිදි අතුරු තහනම් නියෝගයක් නිකුත් කර ඇත.
අභියාචනාධිකරණය හමුවේ බැසිල් රාජපක්ෂ මහතා විසින් ඉදිරිපත් කර ඇති එම පෙත්සම ලබන 15 වනදා සලකා බැලීමට නියමිතව ඇති බවට අධි නීතිඥ සුදර්ශන ද සිල්වා මහතා පෙන්වා දෙමින් සිදු කළ කරුණු දැක්වීම සැලකිල්ලට ගත් මහාධිකරණ විනිසුරුවරයා නඩු විභාගය කල් තැබීමට නියෝග කර ඇත.
මේ අතර හිටපු ආරක්ෂක ලේකම් ගෝඨාභය රාජපක්ෂ මහතා විසින් ගොනු කර ඇති සංශෝධන පෙත්සම ලබන 22 වැනි දා කැඳවන ලෙස අභියාචනාධිකරණය අද (13) නියෝග කළේය.
පාවෙන අවි ගබඩාවක් පවත්වාගෙන යෑමට ඇවන්ගාඩ් සමාගමට අවසර ලබා දීම මගින් රජයට රුපියල් බිලියන 11.4 පාඩුවක් සිදුකරන ලදැයි චෝදනා කරමින් අල්ලස් කොමිසම තමන්ට එරෙහිව පවරා ඇති නඩුව විභාගයට ගැනීම වළකාලන අතුරු නියෝගයක් නිකුත් කරන ලෙස ඉල්ලා පෙත්සම ගොනු කර තිබිණි.
මෙම පෙත්සම අභියාචනාධිකරණ සභාපති ප‍්‍රීති පද්මන් සූරසේන සහ ශිරාන් ගුණරත්න යන මහත්වරුන්ගෙන් යුතු අභියාචනාධිකරණ විනිසුරු මඩුල්ලක් හමුවේ කැඳවිණි.
වගඋත්තරකරුවන් ලෙස අල්ලස් හෝ දුෂණ වංචා විමර්ශන කොමිසමේ අධ්‍යක්ෂ ජනරාල් ඇතුළු පිරිසක් නම් කරනු ලැබ ඇත.
COMMENTS