"නිකන් සිරිසේනට ඕන දෙයක් කියන්න පුළුවන් විධායක ජනපති සිරිසේනට එහෙම බෑ" - මහින්ද

විධායක ජනාධිපතිවරයෙකු සෑම විටම සත්‍ය කතා කළ යුතු බව හිටපු ජනාධිපති මහින්ද රාජපක්ෂ මහතා පවසයි. ඒ ඊයේ (28) අම්පාර ප්‍රදේශයේ පැවති ජන හමුවකද...

විධායක ජනාධිපතිවරයෙකු සෑම විටම සත්‍ය කතා කළ යුතු බව හිටපු ජනාධිපති මහින්ද රාජපක්ෂ මහතා පවසයි.

ඒ ඊයේ (28) අම්පාර ප්‍රදේශයේ පැවති ජන හමුවකදීය.

එහිදී ඒ මහතා මෙසේ අදහස් දැක්වීය.

“පත්තරේ උදේ පාන්දර බලන කොට මමත් උඩ ගිහිල්ලා. ට්‍රිලියන 10ක් විදේශ විනිමය හොරකම් කර ඇත. එයින් 09ක්ම ආවගිය තැනක් නැත. මේ රටේ ජනාධිපතිවරයා. මට එංගලන්තයෙන් කෝල් එනවා, ප්‍රංශයෙන් ආවා. මේක ඇත්තද මොකක්ද කියලා. කලබල වෙලා. මම ඇහුවා ඇයි ඔයාලා කලබල වෙන්නේ? නෑ මේ මේක දැක්කම කවුද කලබල නොවෙන්නේ. ට්‍රිලියන 10 ඇමරිකන් ඩොලර් වැඩි කරපියකෝ එකසිය පනස් ගානෙන්. එක ට්‍රිලියනයක් තියෙනවලු. අනෙක් ආව ගිය ඒවා දන්නේ නැතිලු කොලේකවත් නැතිලු. කෝටි ලක්ෂයක් ට්‍රිලියනක් කියන්නේ.”

“එක්කෝ මෙයාට බිලියන, මිලියන, ට්‍රිලියන, රුපියල් දාහ, දෙදාහ මේක අවබෝධයක් නෑ. එහෙම නැත්තම් අමූලික බොරු කියලා පුරුදු වෙලා ඔහේ කටට එන එකක් කියලා දානවා. ජනාධිපතිවරයෙකුට එහෙම කරන්න බෑ. මමත් හිටියා ජනාධිපතිවරයෙක් වෙලා. විධායක ජනාධිපතිවරයා බොහෝම වගකීමකින් හැම වචනයක්ම කතා කරන්න ඕන. නිකම්ම නිකන් සිරිසේනට පුළුවන් ඕන දෙයක් කියන්න. හැබැයි විධායක ජනපති සිරිසේනට එහෙම කියන්න අයිතියක් නෑ. වගකීමක් ඇතිව කියන්න ඕන. මොකද ඒ කියන හැම වචනයකම තියෙන්න ඕන සත්‍යය මිසක් බොරුව නෙවෙයි. ඒකටම හරියන අගමැති රනිල් වික්‍රමසිංහ. හරි ජෝඩුව. මේ දවස්වල පොඩි රගපෑමක් කරනවා.”යැයිද ඒ මහතා වැඩිදුරටත් පැවසීය.