දිවයිනට බස්නාහිර දෙසින් අරාබි මුහුදු ප්‍රදේශයේ පවතින ඔකී සුළි කුණාටුව කොළඹ සිට කිලෝමීටර් 650ක් දුරින් පවතින බවත් එය ශ්‍රී ලංකාවෙන් ඉවතට ඇද...
දිවයිනට බස්නාහිර දෙසින් අරාබි මුහුදු ප්‍රදේශයේ පවතින ඔකී සුළි කුණාටුව කොළඹ සිට කිලෝමීටර් 650ක් දුරින් පවතින බවත් එය ශ්‍රී ලංකාවෙන් ඉවතට ඇදී යන බවින් දිවයිනේ පවතින වැසි සහිත තත්ත්වයේ අඩු වීමක් අපේක්ෂා කරන බව කාලගුණ විද්‍යා දෙපාර්තමේන්තු ප්‍රකාශ කළේය.
කෙසේ නමුත් තවදුරටත් බස්නාහිර, උතුර, නැගෙනහිර, ඌව, දකුණ, සබරගමුව හා මධ්‍යම පළාත්වල ඇතැම් ස්ථානවලට මිලිමීටර් 100 ඉක්මවූ තද වැසි ඇතිවිය හැකි බව එම දෙපාර්තමේන්තු වැඩිදුරටත් සඳහන් කළේය.
එම ප්‍රදේශවලට පැයට කිලෝමීටර් 50ක පමණ තරමක් තද සුළං ඇති වීය හැකිය. මේ අතර ඉදිරි පැය 24 සඳහා බලපවත්වෙන පරිදි නිවේදනයක් නිකුත් කරමින් කාලගුණ විද්‍යා දෙපාර්තමේන්තු කියා සිටියේ දිවයිනට බස්නාහිර සහ දකුණු දෙසින් වන ක්‍රියාකාරී වලාකුළු පද්ධතිය හේතුවෙන් බස්නාහිර සහ දකුණු වෙරළට ඔබ්බෙන් වන ගැඹුරු සහ නොගැඹුරු මුහුදු ප්‍රදේශවල තද වැසි, තද සුළං සහ රළු මුහුදු රළ බලාපොරොත්තු වීය හැකි බවයි.
එම මුහුදු ප්‍රදේශවල සුළගේ වේගය පැයට කිලෝමීටර් 70ත් 80ත් දක්වා වැඩි වීය හැකි බවත් සෙසු මුහුදු ප්‍රදේශවල ද සුළගේ වේගය පැයට කිලෝමීටර් 50ත් 60ත් දක්වා වැඩිවිය හැකි අතර මුහුදු ප්‍රදේශද රළු වීය හැකි බව සඳහන් වේ.
දිවයින වටා වන මුහුදු ප්‍රදේශවල විටින් විට වැසි හෝ ගිගුරුම් සහිත වැසි ඇතිවන අතර බස්නාහිර සහ දකුණු මුහුදු ප්‍රදේශවල තද වැසි ඇති වන බවත් මන්නාරම සිට කොලමබ් සහ ගාල්ල හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල සුළං නිරිත දෙසින් හමන අතර සුළගේ වේගය පැයට කිලෝමීටර් 40ත් 50ත් අතර වන බව එම නිවේදනයේ දැක්වේ.
දිවයිනට වටා වන සෙසු මුහුදු ප්‍රදේශවල සුළං නිශ්චිත දිශාවකින් තොරව හමන අතර සුළගේ වේගය පැයට කිලෝමීටර් 30ත් 40ත් අතර වන බවත් මේ පිළිබඳ විමසිලිමත් වන ලෙසට ධිවර සහ නාවික ප්‍රජාවගෙන් කාලගුණ විද්‍යා දෙපාර්තමේන්තු ඉල්ලා සිටියි.
COMMENTS