දැනුම, ආකල්ප, කුසලතා සපිරි උපාධිධාරි හෙද නිලධාරියන් බිහි කිරීම උදෙසා ශ්‍රී ජයවර්ධනපුර හෙද විදුහල් පරිශ්‍රයේ ඉදි කෙරෙන කොළඹ විශ්වවිද්‍යාලයට...
දැනුම, ආකල්ප, කුසලතා සපිරි උපාධිධාරි හෙද නිලධාරියන් බිහි කිරීම උදෙසා ශ්‍රී ජයවර්ධනපුර හෙද විදුහල් පරිශ්‍රයේ ඉදි කෙරෙන කොළඹ විශ්වවිද්‍යාලයට අනුබද්ධ හෙද පීඨය සඳහා මුල් ගල් තැබීම ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ඊයේ (20) පස්වරුවේ සිදු විය.
ශ්‍රී ලංකා රජයේ ප්රතිපාදන මත ඉදි කෙරෙන මෙම හෙද පීඨය සඳහා වැය කෙරෙන මුළු මුදල රුපියල් බිලියන 14.5 කි. මහල් 17 කින් සමන්විත හෙද පීඨය තුළ එකවර හෙද හෙදියන් 2000 ක් පමණ පුහුණු කිරීමට හැකියාව පවතී.
එම හෙද හෙදියන් සඳහා නේවාසිකාගාර ඉදි කරනු ලබන්නේ නැගෙනහිර කොළඹ මූලික රෝහල් භූමියේ වන අතර එය ක්‍රිඩා පහසුකම්, පිහිනුම් තටාක, කායවර්ධන මධ්‍යස්ථාන ඇතුළු සියලු පහසුකම්වලින් සමන්විතය.
දීර්ඝකාලීන ඉල්ලීමක් බවට පත්ව තිබූ හෙද පීඨය ආරම්භ කිරීම මෙතෙක් ක්‍රියාවට නැංවීමට නොහැකිව තිබූ අතර ජනාධිපතිවරයාගේ මඟ පෙන්වීම යටතේ 2016 අය වැය තුළින් ඒ සඳහා ප්රතිපාදන වෙන් කෙරිණි.
දේශීය වශයෙන් හෙදකම පිළිබඳව පිළිගත් උපාධිධාරින් බඳවා ගැනීම, හෙද සේවාවේ විදේශ රැකියා සඳහා පුහුණුව හා දැනුම ලබාදීම, හෙද සේවා විශේෂඥතා දැනුම වර්ධනය කිරීම මෙහි අරමුණු වේ.
නව හෙද පීඨයේ ඉදිකිරීම් ආරම්භ කිරීමට අදාළ සමරු ඵලකය නිරාවරණය කිරීම ජනාධිපතිවරයා අතින් සිදු විය.
හෙද සේවාවේ උන්නතිය වෙනුවෙන් ජනාධිපතිවරයා සිදුකරනු ලබන මැදිහත්වීම උදෙසා උපහාර තිළිණයක් පිළිගැන්වීම ද සිදු කෙරිණි.
COMMENTS