ශ‍්‍රී ලංගමයේත් අවසරය ඇතිව හෝමාගම නගරය මැද තිබූ බස් නැවතුම නාගරික උද්‍යානයක් බවට පත් කිරීමට සැලසුම් කර ඇතැයි මහානගර හා බස්නාහිර සංවර්ධන අම...
ශ‍්‍රී ලංගමයේත් අවසරය ඇතිව හෝමාගම නගරය මැද තිබූ බස් නැවතුම නාගරික උද්‍යානයක් බවට පත් කිරීමට සැලසුම් කර ඇතැයි මහානගර හා බස්නාහිර සංවර්ධන අමාත්‍ය පාඨලී චම්පික රණවක මහතා පවසයි.
මාකුඹුර සිට අධිවේගී මාර්ගයේ පිවිසුම දක්වා ප‍්‍රදේශයේ නාගරික උද්‍යානයක් ඉදිකිරීම ලබන වසරේ ආරම්භ කරන බවත් එම නාගරික උද්‍යානයේ ඵලප‍්‍රයෝජනත් 2019 සිට ලබා ගත හැකි බවත් ඇමැතිවරයා සඳහන් කළේය.
අධිවේගී මාර්ගය, හෝමාගම නගරය, තාක්ෂණ නගරය සහ නවෝත්පාදන බලප‍්‍රදේශය එකට යා කරන මාර්ගයක් ඉදිකිරීමට කටයුතු කරන බවත් එහි පළමු පියවර ලබන වසරේ ආරම්භ කිරීමට සූදානම් බවත් හෙතෙම පෙන්වා දුන්නේය.
ඇමැතිවරයා මේ බව පැවසූවේ බස්නාහිර මහානගර සංවර්ධන සැලැස්මට අනුව මහානගර හා බස්නාහිර සංවර්ධන අමාත්‍යාංශය මගින් කි‍්‍රයාත්මක සුඛිත පුරවර සංවර්ධන ව්‍යාපෘතියේ ප‍්‍රතිපාදන මත නාගරික සංවර්ධන අධිකාරියේ අධික්‍ෂණය යටතේ රුපියල් ලක්‍ෂ 1900 ක් වැය කර ඉදිකරන ලද හෝමාගම බස්නැවතුම්පල දෙවන අදියර ජනතා අයිතියට පැවරීමේ අවස්ථාවට එක්වෙමිනි.
එහිදී අදහස් දැක්වූ අමාත්‍යවරයා, “මේක කිසිම දේශපාලන භෙදයකින් තොරව හෝමාගම සියළුම බස් මගීන්ට නාගරික පහසුව සපයන වැදගත් ස්ථානයක්. ඒ අනුව මේ පලවෙනි අදියරින් නිම නොවිච්ච ප‍්‍රශ්ණ දෙකක් හෝමාගම තිබුණා. එකක්, මේ නගරය මධ්‍යයේ බස් නැවතුමක් තිබුණා. තව එකක්, වෙළඳසැලක් අසල බස් නැවතුමක් තිබුණා. ඒ දෙකම අපට මෙතැනට ගෙන එන්න පුළුවන්. ඒ වගේම ශ‍්‍රී ලංගමයේත් අවසරය ඇතිව ඒ නගරය මැද තිබුණු බස් නැවතුම අපි නාගරික උද්‍යානයක් බවට පත් කරනවා. මොකද මේ හෝමාගම වගේ හැම නගරයකම අපට තිබිය යුතුයි නාගරික උද්‍යානයක්.
ඒ වගේම ලබන ජනවාරි මාසයේ අපි මාකුඹුරේ තිබෙන ඒ ප‍්‍රධාන බහුවිධ ප‍්‍රවාහන මධ්‍යස්ථානය විවෘත කරනවා. එතකොට, අධිවේගී මාර්ගයේ එන බස්රථ ඒ වගේම කොළඹ බලා යන බස්රථ, දුම්රිය කියන මේ දෙකම එක මධ්‍යස්ථානයකින් මෙහෙයවෙනවා. ඒ මධ්‍යස්ථානය නිකන්ම නිකන් බස් නැවතුමක් හෝ නිකන්ම නිකන් දුම්රිය ස්ථානයක් නොවෙයි. ඒක මේ ලෝකයේ තිබෙන නවීනතම ප‍්‍රවාහන මධ්‍යස්ථානයක්. ලංකා ඉතිහාසයේ මුලින්ම ජනතා අයිතියට පත්වෙන ප‍්‍රවාහන මධ්‍යස්ථානය බවට ඒ මාකුඹුර ප‍්‍රවාහන මධ්‍යස්ථානය එකතු වෙනවා. ඒකත් අපේ කොට්ටාව මහරගම හා හෝමාගම ජනතාවට විශාල ශක්තියක් වෙනවා.
“ඒ වගේම ඒ එක්කම මේ අවට ප‍්‍රදේශයේ තවත් ඉඩම් අක්කර විශාල ප‍්‍රමාණයක්, වාණිජ, නේවාසික සංවර්ධනයට විවෘත වෙනවා. දැනටමත් විශ්ව විද්‍යාල හතරක් ඒ හෝමාගම තාක්ෂණ නගරයට ඇවිල්ලා ඉවරයි. ඒ විශ්ව විද්‍යාල හතරම තාක්ෂණ පීඨ. ඒ වගේ විශ්ව විද්‍යාල හතරක සෙනඟක් එන විට හෝමාගම හා මේ අවට ප‍්‍රදේශවල ජනතාවට අළුත් සේවාවන් සපයන්න පුළුවන් දියුණු මධ්‍යස්ථානයක් බවට අපි පත්වෙනවා.“යැයි ඇමැතිවරයා වැඩිදුරටත් පැවසී ය.
COMMENTS