මූල්‍ය වංචා, දූෂණ, රජයේ වත්කම් හා රජයේ ආදායම් සම්බන්ධ වංචා සහගත ක්‍රියා සහ ඊට සමාන වැරදි සම්බන්ධයෙන් වන නඩු කටයුතු කඩිනම් කිරීම උදෙසා ...
මූල්‍ය වංචා, දූෂණ, රජයේ වත්කම් හා රජයේ ආදායම් සම්බන්ධ වංචා සහගත ක්‍රියා සහ ඊට සමාන වැරදි සම්බන්ධයෙන් වන නඩු කටයුතු කඩිනම් කිරීම උදෙසා අධිකරණ අමාත්‍ය තලතා අතුකෝරාළ විසින් කැබිනට් මණ්ඩලයට කරන ලද යෝජනාවක් අනුව මෙසේ නව අධිකරණයක් ස්ථාපිත කිරීමට අනුමැතිය හිමිව තිබේ.
ඒ අනුව අගවිනිසුරුවරයා විසින් නම් කෙරෙන ත්‍රිපුද්ගල විනිසුරු මඬුලු 3කින් සමන්විත මහාධිකරණයක් පිහිටුවීමටත් නිශ්චිතව දක්වනු ලබන වරදවල් සම්බන්ධයෙන් වන නඩු නීතිපතිවරයාගේ ඉල්ලීම මත එම මහාධිකරණය වෙත යොමු කිරීමටත් අවකාශ සැලසේ.
මහජන දේපළවලට එරෙහිව සිදු කරනු ලබන වැරදි, මුදල් විශුද්ධිකරණය, ත්‍රස්තවාදය සඳහා මුදල් සැපයීම, සාපරාධී විස්වාසය කඩකිරීම, සංවිධානාත්මක අපරාධ ඇතුළු අල්ලස් හා දූෂණ චෝදනා සහ අතිශය සංකීර්ණ මූල්‍ය අපරාධ සම්බන්ධ නඩු කටයුතු විභාග කිරීම මෙම විශේෂ මහාධිකරණයට පැවරෙනු ඇත.
ශ්‍රී ලංකාවේ අධිකරණවල නඩු විශාල වශයෙන් ගොඩගැසී පැවතීම හේතුවෙන් ඉහත සඳහන් වරදවල් සම්බන්ධ නඩු කටයුතු කඩිනමින් අවසන් කිරීම ප්‍රායෝගිකව අපහසු වීම මෙසේ විශේෂ මහාධිකරණයක් පිහිටුවීමට හේතුව වී තිබේ.
- රංජිත් නිශාන්ත
COMMENTS